Patpuihmun, October 24, Virthli (ONP): Patpuihmun Joint Churches Committee hai huoihawtna hnuoiah vawisûn Patpuihmun ICI Biekin-ah Vangai tlânga khuo hran hran ta ding Hmar Pulpit Bible semna nei a nih.
Hi huna hin Thingkal, Ngampabung, Phulpui, Sartuinek le Patpuihmun-a kohran tin hai kuomah Patpuihmun Joint Churches Committe Chairman Upa Lalchunghnung le Dr. Chaltonlien Amo, Tipaimukh MLA ha'n Hmar Pulpit Bible hi inhlânna an nei.
Hi hunser hi Patpuihmun Joint Kristien Ṭhalai Pawl-haiin an uop el bak ah inpâkna hla khawm sakin refreshment khawm hnetakin PJKṬP hai hin an buotsai bawk a nih.
Hi huna hin Dr. Amo chun thuhrilna neiin 'Hmar Pulpit Bible' hi vote zawngnaa a hmang naw thu le, Pulpit Bible hi kum 5 lo liem taa a lungrila um, tu ta sukpuitling theia a umna hih Pathien zâr chau a ni thu hrilin Pathien kuoma le khuolrala inthawka hung ṭawiawmtuhai kuoma a lawmthu nasa takin a hril. Bible hi phawa hmang lova ringzo ding a ni zie le, innghat ngam a, chel tlat ding a ni zie hrilin iengkim ei thawna ta phawta Bible râwn hmasa hlak dingin fekhawmtuhai kuomah uor takin a hril.
