Taithu, October 8, 2021, Virthli (ONP): Tipaimukh MLA Dr. Chaltonlien Amo-in vawisûn Zawlliensuo kaia Tuiruong Leilâk daw mêka um a kan a, a kan huna hin sin thaw mêka umhai enfelna sin a thaw. Dr. Amo chun Taithu le Patpuihmun kâra Tuiruong vadung chunga Bailey Bridge daw mêka um hi buoina dang a um naw chun October thla tâwpa zo fel hman dinga sin thawtuhaiin hmâ an lâk mêk thu a hril a, October thla tâwp a'n naw khawma November thla bula hawng hman dinga riruong a ni thu a hril.
Leilâk daw mêka um hi a'n hma tienga zo fel vat a ni theina dinga Chief Engineer, Contractor le sinthawtuhai chu hma nasa taka a lâkpui hlak thu hrilin, sum le puona a ṭhangpui hlak thu a hril bawk. Jiribam-a leilâk hmangruo a um lai a lo inhmang leia hun sâwt tak daw sunzawm thei loa a um thu hai hrilin, a part-hai khawm Kolkata company-a mi incha vawng a ni hnunga leilâk hi daw sunzawm thei a ni thu a hril a. A kalpui thîr chunga a ṭuong dâp ding hmangruo thing ṭha chi ngawt thak lût mêk a ni thu a hril.
Leilâk daw mêka um hi Jiribam le Imphal kâra Bailey Bridge dawa um hai nêka hrât lem ding le det-in-do lem dinga daw a ni thu, a kûr nawna dinga a lâi pâwng meta daw a ni dân hai le truck lien heavy load phur hai khawm tlân thei vawng dinga leilâk hi dâw a ni thu hi hmuna sinthawtuhai chun an hril.
Dr. Amo-in Zawlliensuo-a leilâk daw mêka um a kan huna hin Parbung le Taithu-a a workers han an ṭâwiâwm.
