Saikawt, September 28,2021, Virthli(ONP): Hmar Youth Association, Saikawt Branch huoihawt 4th Sizo Festival (A Hmar Festival) 2021 chu vawisun khan SDO Complex, Saikawt hmuna hlawtling taka hmang a nih.
Pu G.S. Haupu, Hon’ble Chairman, MTDC & MANIREDA, Manipur chu Chief Guest a hmang ani a, Pu Khaipao Haokip, Caretaker, ADC,Churachandpur chu Guest of Honour in, Pi Esther Laltankim Serto, IFS, District Forest Officer, Churachandpur chu Functional President in a thang. Chief Host Pu James Cole aiin Pu Lalhriet Famhoite, President HYA Tuithaphai a thang bawk a nih.
Hun hmasa tieng Pu Joseph M Pakhuongte, Organizing Secy.in mipui fekhawm hai lawmlutna hun le khuollien hai chawimawina thilpek inhlanna hun a hmang baka Sizo Festival Visioner Pu Timothy in keynote address peiin Sizo Festival hi tangkaina tamtak a nei thu hai a hril baka khuollien hai kuomah pawl hran hran hai Memorandum iemanizat pekna a nei.
Hieng memorandum pekluta umhai a hin Saikawt HYA Office siemthatna ding, Sizo vawngtha le humhim dan ding le suklar nawk zuol dan ding, Saikawt khuoa Solar Street light 100 ngenna, Saikawt SDO a Revenue Staff le SDC hnina, lampui siemtha, Saikawt High School chu Higher Secondary a hlangkai, Saikawt CHC chu District Hospital ang tluka hlangkai ti hai a nih.
Hi huna hin khuollien haiin thu hrilna hun an hmanga, nunghak Esther Laltankim Serto chun Sizo hi eini Hmar laia ding chun a pawimaw hlea, Sizo khêkna kawng le suklar dinga hma la ding le thangtlang dingin a hril. Pu Khaipao Haokip chun a thu hril huna hieng anga Sizo Festival huoihawt na chang hriea hmalatu hai chunga lawm um a ti thu, politics tieng panga Saikawt Assembly Constituency ah a ngir tum thu le mipui hai ta dinga hma a lak nuom thu hai a hril. Pu G.S. Haupu in a thu hril huna memorandum an peklut hai le inzawmin Saikawt High School chu Higher Secondary a hlangkaina dingin Education Minister kuoma hma a hung lak ding thu le thildang dang hai khawm a thaw thei ang angin hma hung la dingin an tiem a nih.
HWA Saikot Branch in Sizo hme chi hrang hrang a buotsai chu khuollien hai le pawl hran hran thuoitu haiin intemna an nei a nih.
Hun tawp tieng Sizo Festival Theme Song sakna le lawmthu hrilna Donald L Hmar, Organizing Chairman in a hmanga,
hun khar tawngtaina le ruoi inhlanna Rev. Vanlalhlun Traite in a hmang zoin mipui fekhawm hai chun sizo hmepawk le sizo le suong hme chi hran hran hlimtlang takin an kiltlang a nih.
