Aizawl, July 9, 2021, Virthli (ONP): Tv. Andrew Lalmalsawma, tuta Ramhlun North, Aizawl a chêng mêk chun Mizoram Land Resource, Soil and Water Conservation Department hnuoiah Assistant Soil Conservation Engineer sin a lo buon thlûk der el tah.
Vawisuna Mizoram Public Service Commission (MPSC) in interview result a suksuok ah Andrew hi candidate 4 thlang a um hai lai a pahnina ni phâk ngat a nih.
Kum 26 mi, Andrew hi Sielmat, Churachandpur, Manipur-a pieng a ni a, Pu Francis K. Sungte le Pi Daithangpui hai nau pahni laia an nau pasal nei sun a nih.
A school kaina hi Aizawl ah niin pawl-10 distinction in a pass a, pawl-12 (science) first division ah a pass hnungin 2014 khan Joint Entrance Examination (JEE) inziek tlingin Mizoram quota in College of Engineering, Trivandrum, Kerela ah B.Tech Civil Engineering a'nchûk nawk a, kum 2018 khan ṭhatakin engineering a zo a nih.
Andrew hi lekhathiem thei tak el, tlangval fel tak le nu le pa thuawithei tak a ni a, nikum khan Mizoram Engineering Service (MES) khawm lo inziek tlingin sienkhawm interview-ah a vangduoi pawlah a ṭhang ta hlau a nih.
Tuta a sin hi a hmu theina di’n MPSC huoihawitna hnuoiah tukum February khan technical competitive examination a peka, mi 162 laiin exam an hmasawn a nih.
Ama hi HSA, Joint Headquarters, Aizawl a member a ni nghe nghe.
A hlawtlingna ah ei lawmpui em em a nih.
Andrew a unu Nk. Jasmine Ramtharmawii khawm hi lekhathiem thei tak a na, hmasak laia Staff Selection Commission (SSC) in Combine Graduate Level (CGL), Tier-III result a suksuok a khan tlingin tuhin Tier-IV (Skill Test) hmasawn dingin an buotsai mêk a nih.
Jasmine hi HSA, Jt. Hqrs, Aizawl a treasurer sin lo chel ta hlak a nih.
Hlawtlingna hung chang tung pei dingin ditsakna ei inhlân bawk a nih.
