CCpur, June 17, 2021, Virthli (ONP): Thlado 17 inhma tawk takin mani (personal) ngei fe in Pu Ngursanglur chun Tuolbung le H Maulien hai mamaw bêk bêk damdawi emergency thil a an inenkawlna ding tam tham tak CCPur anthawk a team hai leh an zu thak. Khawsûnga cheng VA,Val Upa le HYA haiin lo dawngin intin a semna an nei. Meeting tawite nei a nia, EFCI Tuolsûng Upa Darrothang in Pathien kuoma thilpêk inhlanna neiin damnaw haiin damna an chang thei ngeina dingin dingțhațhuon meuin damnaw hai țawngțai pekna hun leh inhlanna a nei.
Pu Sanglur in thuhril tawi a nei na ah chun," In harsatna tuok ang hi ka tuok ve taa, ka pa'n minister hai lo chel sienkhawm rinumna tam tak a min chûktira local bufai nêka vâibu ka fâk hi a tam hle a nih, Damdawi man ding cheng 10 ka nei naw chang a um a, dal kan hme rawn leiin dal khawm ka du pha hle a nih, khawpin țam a hriet nawa nangni ang ngirhmun tawngtuhai naw chun hrethiem naw ni hai, kei chu in ngirhmun ang tawngtu ka ni leiin ka hriethiem pui cheua kei ngei hungin in natna hai ka tuorpui zie cheu suklangna in a hmuna ka hung a nih, chun Hmâr hnam hi a nawlpuiin ei inthuruol a țul a nih" a tih.
VA Chairman in lâwmthu hrilna le Doctor le nurse hai an nei țhatnaw thuhai hrilin thuneitu insâng lem hai kuoma lo bawzui dingin a ngên bawk. Hun khar a ni zoin bufâk puina nei nghal a nih. Pu Sanglur le a teamhai hi zîng bufâk khawpin an umna tieng an kir nawk nghal a nih.
Lockdown leiin nuom nuoma inzin harsatak karah hmangaina le lunginsietna in ramri (boundary) a nei nawh ti hrezingin a hnam chanpui hai zânmu tuoloa nu le nau khûmbeta an zâl el chu ngâingam thei lul loin Tuolbung khuo hi zânah an pan vang vang a nih.
Pu sanglur in,"Pathienin malsâwmna a mi pêk hai laia mi nangni a dawngtuhai laia in lo țhang hi vangnei kan ti baka lâwmum kan ti hle a ni ti thu hai a hril sa bawk"
Tuolbung mipuihai chun Samari mițha an tawng nawk ta thu hrilin Pu sanglur hi taksa le thlaraua malsâwmna tamtak dawngpei dingin Tuolbung mipuihaiin ditsakna an inhlan.
Report petu: Ltv Hmar
