Rawvakawt, June 25, 2021, Virthli (ONP): Covid hripui inleng leia Tipaimukh biel sunga khawtin a haia a tul ang anga sawmdawlna le thangpuina sin thaw dinga fe- Tipaimukh MLA- Dr. Chaltonlien Amo a Team hai chun vawisun khan Rawvakawt, Parvachawm, Sipuikawn, Tuolbung, H.Maulien le Thingpan khuo a hai fein covid le inzawma thil tul le pawimaw chi tum tum bakah kutchawi hai neiin khawtlang thuoituhai le Village Task Force hai kutah inhlanna an nei a. Dr. Amo a Team hai hi Covid Test iengkim an nei hnung, negative an ni hnunga biel fang an nih.
Hripui inleng leia a biel mipuiin harsatna an tuok mek laia Covid Awareness-cum-Enforcement Committee, 55-Tipaimukh Assembly Segment a Chairman le bieltu MLA ni bawk- Dr. Chaltonlien Amo in covid le inzawma a biel mipuihai harsatna hrea a thei ang anga sawmdawlna sin a hung thaw chu mipui an lawm hle thu dawng a nih. A biel mipuihai lai fak le dawn a harsatna tuok an um chun iengtiklai khawm Dr. Amo chun thangpui an ni ding thu Virthli Palai a hril.
