~ Rev. Huolthangsei Thiek
Palm Sunday hi ei hriet lar anghuin ei hrietchieng bêk naw el thei a. A ṭhen chun, Passion Sunday khawm an ti hlak. Ei tidan izirin ngaituona rama a thawk dan hai khawm a danglam thei bawk. Palm Sunday ei ti chun, Pathienni taka tûmkau châwia Isu an chawimawina kha mitthlân a min hmutir a. Amiruok chu Passion Sunday ei ti ruok chun, Isu lungngaina hapta, a zing nawk ela hung tlung ding a min ngaituotir nawk dai hlak bawk. Asan chu, ei Lal Isu hnuoia a hunglaia rawngbawlna a nei lai khan a hun vawrtawp tienga, a thil tuok hai inkhanlo bek bek el, pawimaw bawk, lotheilo vawng, hung tlung indawt zut el hai kha ei Pa, Pathien remruot dan a lo ni ve tlat a lo nih.
Ei Lal Isu chun a tawpkhawkin a tuor a, a tawpkhawk bawkin chawimawina le ropuina a dawng a nih. Iengkima a hmasatak le a nuhnungtak niin, ropuina le insangna,thilthawtheina le thuneina po po a ta a ni zing laiin, hnuoi hmun inhnuoitaka khawm ei hnuoitieng a inthawka mi dawm kang thei khawpin an phahnuoi a nih. chu chu a tuorna le a thina le a thonawkna hai hin a sukdik a nih. Chawimawina insangtak dawng tlak hrim a nih. Chuong ang taka a hun a hmang ta leiin ei hringnun lampui hraw ding a mi sâtpek a nih, ti hi hriet ve hrim hrim ṭhaa an lang leiin, chuong lai thu hai te chu ei thupui taka ei inchâwmlut hma deuin ei hang pakai ve zau a ni ie!
Palm Sunday chu iem?. An leh, Palm Sunday hi ieng leia hung um am? Ieng lei taka Isu an chawimawi am ning a ta? Sabengtungte kher kher a hmang hi iem an entir” ti hai hi indawnna siema um hlak hai chu an nih.
A ngielangana inlet ding chun, Palm Sunday chu Tumkau Pathienni a nih. Tumkau mipuiin an chawi hai hin hnena ropui tak an entir a nih, an ti hlak bawk.Isu hi hnuoi Jerusalem a hin hnena leh a lut ngei ding anih.Sabengtungte chunga chuonga a hung hin Lal a nina, inremna thuphura hung a nizie a tar lang a, chu chu hnuoia a sin (mission) a nih.
Huoi le van inremna chu Krista sinthaw a nih. Zawlnei hai rawngbawlna ei en chun, Pathien Thiltum an hril hlaka, mipui haiin an hriet thiem theina dingin lemchang (drama) an thaw hlak. Hosea chu Pathienin Israel helna entirna in nuhmei uire, nawchizawr leh a hrilkhi a. Lalpa Pathien chu Israelin uiretsan hlak sien khawm, Pathienin a hmangaia, a la ko nawk rawp hlak chu inentirna in zawlnei Hosea chun nawchizawr nuhmeiah a nei a ni kha. Film shootingangin Inchûktirna Drama ân chang a nih. Chuongang bawk chun Isu Krista chu Lal a nizie nungchangin ân chuktira, Inremna intlun dingin Sabengtungte a hmang a, Lal a nizie le hnena chu ama ta a nizie sukchiengna in mipui haiin tumkau leh an lo chawimawi a nih.
Palm Sunday hi Kohran hmasa hai a inthawk khan pawimawtaka ngai le hmang a lo ni hlak hrim niawm a nih. Isu Jerusalema chawimawia a um ding hi Pa, Pathien chatuon remruotna leh a lo inthlungmat dan hi ngaituo a hlaw zonaw khawm a ni el thei. Hnuoia rawngbawlna a nei sunga ei Lal Isu thil tuok ding laia makmaw pakhat chu Jerusalema chawimawina hi a nih. English in “Triumphal Entry” an tia, ei ni chun “Jerusalema Hnena ropuitak le a lutna” ti ve awm tak ei na, “Jerusalema Chawimawia a umna” ei ti lem a, ngaituona ram a sukfienaw met khawm a hawi a nih.. Isu kha hnetu nia Jerusalema a lut kha a damlaini (history) a khan a tuok ve ngei ngei dinga Pa, Pathienin a lo ruot hrim a nih.. Isun a rawngbawlna a zo tah a, Van Jerusalem pana a fena chu hnuoi Jerusalema chawimawina a dawng hin a lo ep a, a namnghet bawk a nih.
Eini ringtu hai khawm ei hnuoi rinum, harsatna tireng tuorpuma ei invaina rama hin, van Jerusalem ei inlawi pha a ei thil hmu ding hai hlimthla, a angpui, (intluktawk ninaw sien khawm), a mi dawntleina hmangruo hai chu Lalpan a min hmutir ve bawk hlak kha tie,(hrietna dinga na nei chun hre raw she!).Hnuoiachawimawina le malsawmna, a mi dawntleina hai hman hi a ropuiin lawmum ei ti hlak a, nakie tienga chawimawina Krista le ei lan ṭawm ding hai lem chu a ropuiin hrilkhipui ding a um naw tawp el a nih. Chuong ang chawimawina chu ei ta dingin Krista zarin tiemsa ei nih, a san chu, ei Lal Isu’n a lo chang chu ei chang ve ding a ni sih a.
Palm Sunday nia chawimawina ang hin tienlai a inthawk khan, Israel hai chanhchina, hnena changa an khawpui Jerusalema hung lut hai an lo chawimawi vet ta hrim a lo nih. Isu pieng hma Kum 150 hiel lo liem tah a khan Simon Maccabaeus, sipai hotu huoisen chu, hmelma Antiocheius, Syria lal hnein Jerusalem khawpui a hung luta, mipuiin tumkau leh nasatakin an lo chawimawi a. Israel hai hin 2 Lalhai 9:13 ei en chun, Lal Jehu kha thisen kai hnienghnuongin lal dingin hriek nalin a um a, chu huna lampuia an puonhai an pha a, chawimawina an pek khawm kha, an hnam nunphung , thil thawdan reng chu a lo nih. Hossana Lalpa hminga hung chu inpakin um raw se..!le “Hossana Lalpa hminga hung chu a eng an thawl” ti dama inlet a ni hlaka, a thu hi tlawmin danglam met hlak sien khawmngaibuoi a ni ngai nawh.Hieng thu hai hi Sam 118:26 a mi anga Lalpa inpakna hla an lo nei ta hrim a na, Messie hung ding beiseina leh, hlataka an lo thlir chu, hla a inzawtin, Isu Krista a hung inlang phing khan, a takin a hung tlungkim tah, ti hrein, “Hossana, Lalpa hminga hung chu a eng an thawl ie,” an ti a nih.
“Hossana” ti hi a umzie tak chu, “Lalpa tuhin sandam rawh” tina a nih.. Mipui haiin Lal kuoma sandamna an ngenna thusam a nih; (2 Samuel 14:4, Lal.6:26). Isu chu a hming umzie khawm Sandamtu a ni angin, Sandam rawh, ti chu chawimawina hla in an hung hmang a nih. Lalpan a mi hai a sandam ding a nih, ti chu mipuihai inhnemna a nih. Hi sandamna hi a nih Isun khawvel mipui hai ta dingin ântluna, chu chu chawimawi a dawngna santak khawm a nih. Messie a hung ding pa chu anlo tung em em a, a hming sam kher lovin, “A hung ding pa” tiin an lo hril hlak. Chuleiin, Isu Jerusalema a lut hi, Juda hai Lal hung dinga an lo tung em em Messie a ni zie sukchiengna’n “Hossana, Lalpa hminga hung chu a eng ânthawl” an ti a nih.
A thubul tienga kirnawk ang elin hang suikir nawk inla. Bethphage le Bethani khaw kawl Olive tlang an tlung chun, Isun a inchuktirhai laia mi pahni a tir a, “Inhmazawna khuoa sawn va fe unla, in hang lut chun, sabengtung thlung, a kawla ate leh hmung inta, chu chu sut unla hung kei ro..” a tih a. Marka, Luka le Johan zieka hai chun sabengtungte kha an hung suta an hung kei dinga a ti chu a ni zie chieng taka hriet theiin a uma, Matthai zieka hin Sabengtung thlung, a kawla a te leh, a ti a, a ieng lem am an hung kei dinga a ti hrietchieng an tak deu a nih. Chanchinṭha ziektu a tamlem hai zieka inthawka ngaidan ei zam chun, sabengtungte, a pui kawla an thlung, a chunga khawm tu la chuong ngainawna chu niin ngaidan ei siem a nih.
A hmaa ei hrillang tah le inzulin, ram le ram, Lal le Lal hai inkara thu intlun ding a um pha chun, an chuongna sabengtung am, sakawr am anhmang hai khan ralkhata lo thlirtuhai chun ngaidan an lo siem thei hlak a nih. Isu hi Jerusalema a hmain vawi iengzat am a ni lo fe ta hlak sienkhawm tuta ṭuma a lut ding hi a rawngbawlna a tlingtlak ta ding a na, a lampui hraw a tawp ta ding huna hin Laltak a nina le hlado insama, hnena thu a puongna ding hun chu a lo nih. Zekaria 9:9 a ei hmu angin Jerusalema hin Lal a nina le khawvela a hungna san tak Zion naunu ta dinga sandamna thu a hung phur chu an tlun ding a nih. Khawvel le Setan thawdan kalhmang (sakawr le tawailir hmanglovin) naw ang takin, sandamna neiin, inngaitlawm takin, sabengtung chunga, sabengtungte chung ngeia hung chuongin.. a ti a nih. A khel tieng ei tiem pei chun “Ephraim a inthawkin tawlailir chu salthlang ka ta, sakawr chu jerusalema inthawkin, chun indona thalngul chu sat thliek ni tang a tih; chun, ama chun hnamhai kuoma chun inremna thu hril a ta, a ram awp chu tuisuoriet a inthawka tuisuoriet chen, Vadungpuia inthawka khawvel tawp chen ning a tih”, tiin a lo hrillawk diem tah a nih.
Sabengtungte hi rannung lai po pova nalnaw pawl tak, a lu le pum a kehai chena inbûk indiklo ang ela mawina reng reng neilo, ransalai po pova hmusit um pawl tak khawm a nih. Amiruok chu, phurrik phur zawnga chu, hrat em em, a pum inphutawk nek daia phurrik phur hrat a nih. Taimakna zawnga ding khawm, a riktawk an inphurtir hmakhat pensuok tumlo a nih, inawn ṭeng ṭenga a phur tawk dinga rik an siem chen, nghak fan fan hlak sa taima le ringum a nih. A hmel ena mawina neinaw sienkhawm, Lal Isu chuong nuomna zawngtak ransa a ni ve tlat. A piengzie hmusitum sienkhawm, a ringumna le taimakna, a rinum tuor peina dam, inremna thuphurtu ransa a ni ve tlat a nih. A piengzie’n ransa danghai tluk zo naw sienkhawm, Isun, a hmang khan chu, a fena dinga mipuiin an puon ṭha ṭha an lo pha pek nuom a ni kha tie. A chunga chuong kha Lal le Sandamtu. Hnuoi le van siemtu, iengkim chunga thuneitu le roreltu a ni si a.
Isu chuong nuomna ding mi ei ni ve dim maw? Ei ni rawi chu sabentungte nek chun ei nal lem an nawm, amiruokchu Isu’n a mi hmang nuomtak tak dingam maw” Inremna thuphurtu dingin sakawr chu a hrat taluoa, a tlaknaw a nih. Sabengtungte chu a hratnaw ema a tlak lem si a nih. I hratna le thiemna, varna le mawina hai kha indona thuomhnaw dingin a ṭhalem el thei, inremna ding chun, Lalpan a dit naw el thei a nih. I hratnawna le tlaktlainawna hai kha, Lalpa chun a hmang nuomna san che a lo ni lem el thei bawk a nih.
Chun, Sabengtungte kha a chunga tukhawm an la chuongngainaw kha, Lal Isu ditzawng tak a nihmel a nih. A chunga tukhawm an la chuongnaw kha a thienghlimna a nih. Ei ni rawi chu, ieng ieng am ei phur tah a, hril seng a ni dal thei a nih. Krista ditnaw zawng, tamtak phur hlak mi ei lo ni chun, Isun a chuongna dingin a mi dit dal thei a nih.
Awle.. ei hril chen neng tah a, ei hriet dinga pawimaw pakhat chu, Isu hi Van Jerusalema chawimawia a um ding entirna’n hnuoia a rawngbawlna a tlingtlak tah leiin Jerusalem, Lalpa khawpuia chawimawia a lut ding hi a tuok dinga thil makmaw a nih, ti hi a nih. Lal a nina inpuongna le sandamtu a nina, mi popo sandamtu a nina chu puong suok hrim hrim dinga Pathienin a lo ruot lawk a nih. Khanglai huna Isu chawimawia mipui khek hai kha Thiempuhai le Pharisai haiin khap dingin Isu an hrila, Isu’n, “Hienghai hi an khek naw chun, lungte hai bêk an khêk el ding a nih”, tiin a dawn a ni kha. Chuleiin, Isu Jerusalema chawimawina a dawng ding hi iengkhawmin a dal lo ding khawpa Pa Pathien lo ruotlawk a nih, ti a chieng a nih.
Ei ni ringtuhai ta dinga lawmum bek bek nawk pakhat chu, ei damlai ni hin chawimawina inhlan ei ni, ti hi a nih. Khawvelin mi chawimawinaw sienkhawm, ringtuhai hi Vanrama ei inlawi pha Lal Isu chawimawina inṭawmpuitu dinghai ei ni ang bawkin, hnuoia ei damsung khawm hin tuorna le chawimawina Lal Isu leh ei inṭawm a nih. Lalpa’n a thu mal sawm raw sen..!
