Tuițhaphai, March 18, 2021, Virthli (ONP): Pathien inpakna hla hai saka rawngbawlna nei hlak- EAC Assembly Choir le ICI Central Choir chun March 18, zantieng dar 5:00pm- 7:00 PM hun sung khan Vision Turf Ground, Muolhlum Rengkai ah hlimtlang takin futsal fellowship an nei.
Inkhel tan ani hmain Choir members hai inhmelhriettuona nei a ni a, ICI Central Choir Chairman- Rev. Alan L. Thiek-in an hun hai tawngtaina'n inhlanna a nei zoin inkhel tan nghal a ni a, 1st match a hin Choir members pasal hai an inkhel a, 2nd mtach ah nuhmei hai an inkhel ve thung. ICI Central Choir chun hratna an chang ve ve a nih.
Hi hunser hi Virthli palai khawma va uopin inkhel hi a hmun ngeiah a va en ve a, Choir members ha'n physical fitness an nei tha el bakah an ball pet a mawiin hmu nuom a um hle. EAC Assembly Choir hai hi Choir Chairman- Pu Benjamin Hrangchal le Choir Conductor- Tv. Nehemiah L. Buongpui han an inrawia, ICI Central Choir tieng khawm Choir Chairman- Rev. Alan L. Thiek le Choir Conductor- Tv. Lalthlawnpek Tusing han an inrawi ve.
Pathien inpakna hla hai saka rawngbawl tlang seng an ni hlak angin inunauna le inlaichinna tha lem a um nawk zuol theina dinga futsal fellowship hi an huoihawt a nih.
Inkhel hai zofel ani zoin Tv. Nehemiah L. Buongpui, Conductor, EAC Assembly Choir in hun khar tawngtaina neiin hun suktawp a nih.
Virthli chun EAC Assembly Choir le ICI Central Choir hai hi an rawngbawlna a hai mi tamtak ta dinga malsawmna intluntu ni ding le thlarau nun chawm thei ding inpakna hla hai hma tieng peia khawm buotsai nawk pei dingin ditsakna insangtak an hlan nghal bawk a nih.
