~ Isaac Hmar
Taksa
lê hrietna tieng nâupang el ni lang khawm. Ei ram dâm ei hnam dâm hi ka thlîrin
ka lungril hi a na ve êm êm hlak chu tie. Nehemia'n Jerusalem kul chu a ram ti
dam, a kang ti dam le a kawtkharhai khawm a um ta naw ti a hrietin, a'n vawi êm
êm a, bu nghei khawpin Pathien a buon hlak ang el hin, ka'n vawi ve bêk bêk el
hlak a. Thaw theitu ni nâw lang khawm, ka um hmun a'n thawk bêkin tîin ka nîna
hre a, inthlahrung tak pumin ka tlin tâwka ngâiin ka hung buoipui nâwk hlak
hlawl chu a nih.
Ei hnam hi ei thawna tieng tieng chu inthuruol tak ei n'a, ei invawng zâwng khawm ṭhangruola ei bei tak zet phâ bu tak khûk hin ei khu bur hlak, ei thawna tieng tieng khawm thaw tlâng duol duolin, lungril le nuom dân khawm hi a ruol ruolin ei thâw duol duol hi ei hnam zepui ni pakhatin ka hriet.
Chuleiin, ei ṭhang tlânga ei thaw tlâng phâ zet chu, Pathienin mi ṭhangpuiin ei la'n dawk vê zut hi beiseina lien tak ka nei tlat a nih.
Ei hriet seng ta angin, ei rama 1910-in chanchin ṭha hung lûtin, chu chanchin ṭha zâra chun ei kâwl le kieng ei sîr le vêla hnamhai khawmin an mi chung en at hlak a. Rawngbawltu lê lekha thiem khawm tam tak ei hung suok a. Mî mi'n hnar hnam ei hung ni a, ei tienga ṭhang nuom khawm mi tam tak an hung pung ta pei a. Ei ram khawm mihai mi'n hnar ei hung n'a, Tipaimukh ei tîhai dâm hi, hnam dang dang ha'n an hung dâwr a, Machi dâm, dâwr thuomhnâw, khawnvartui lê ṭûl dang dang dâwrna hmun a ni a, Mizoram Khawlien tlâng dung lê unâu Paite khawmin an hung dawr lut lut a; sumdâwng lien Isvalli ti dâm kha an lo tuolchaina a ni a.
Bawtauk puon dâm lê sehriet pheikhawk dâm an hung inchawkna hmun; an lo thlâi pat hmarcha lê sîhai dâm an hung zawrna hmunpui ei trade centre pakhat a lo ni a. Mi khawma inhawi an tiin a rama chêng hi muongum an ti a, mîhai ta dinga damna lê malsâwmna intluntu hnam ei lo nih. Chuong ang bawkin Kohran khawmin Senvawn khawpui dâm lê Pherzawl khawpui dâm lê khaw dang danghai hi ro pui an lo rêlna hmun lê Sartuinêk khuo dam hi hlimna revival ropui lo tlungna hmunpui lo ni'n, Assam ram chena chanchin ṭha lo lût theina dinga sirbi pawimâw pakhat a lo ni hiel a ni kha.
Ei pi le puhaiin kristien an lo ni hma a'n thawka inthuruolna, tlâwmngâina le taimâkna hai hi an irochung lê kristien ei hung ni hnung khawma la pawimaw êm êm lê ei la sawm hring pei hai chu an nih.
Pathien khawma nasa takin mal a lo sâwmna ram a lo n'a. Khawvêl hmasawn peina lê inzawmin kohran khawmin hmasawn lemna beiseiin, Tuiṭhaphai tieng ei hmunpuihai ei hung sawn tâwl ta pei a, ei skul le ei Bible skulhai dâm khawm ei sawn tâwl ta pei a nih. Hi thua ka hril nuom tak chu, mi tam tak buoina Tipaimukh biel ei ti a, A khuo ieng bêk ni lo tî ngâi dân ruoltharhaiin ei ti hlak khu, ei hriet chieng ka nuom a, chu el khêl a, khawvêla Hmar po po hai MLA um theina san hi Chanchin ṭha lei lieu lieu a lo nina theinghil pal rawi ei tih ti ka'n lâu bawk lei a nih.
Chuleiin, unâu chanchin ṭha Gospel-in ro a rêl ta nawna ram hnam insûng lê mimal chen khawm hi nghâwng a nei sei hle si lei hin. Mimal in sûng khawtlâng ram le hnam a chen khawm ṭium a ni leiin, eiin sut hlak hi thil ṭûl le pawimâw êm êm chu a nih.
Vawisûn huna ei Tipaimukh biel khawm hi ei sut chieng chu nuom a um tak zet. Roreltu a chîn tak a'n thawk a lien tak chenin ei ṭha ti ang takin ro ei rêl am? Pathien ṭha ti ang takin am aw ro ei rêl? A nîna tak ei ngâituo chun, ziek lang ngam khawm a ni ta nâw deu tak a nih.Nehemia chun, Jerusalem kul chim tî dâm, a ram tî dâm, a kawtkhârhai a kâng tî dâm a hrietin; a siet nawna a um nawh a i ti ang el khawm ei hawi ta'm a ni âw! tî ding deu thâwnin ei um am a ni ta ding maw?
Ei indik nawna ei hei indawn leh țhuoitu'n mipui ei intum a, mipuiin ṭhuoitu eiin tum bawk a. Ei indik vê vê, ei indik nâw vê vê tî dingin ei um chu tie mâw?
Mipui khawm hin ei ram dânpui ei hriet chieng hi chu a ṭûl ta hlein ka hriet. Ei hlutna ei rama ei PM lê state tina ei CM hai lê ei hlutna angkhatna chuh ei VOTE hi a ni a, ei hmang thiem nâw chun, ei mimal in sûng lê khawtlâng chau ni lo ei hnam lê ei ram chenin a kang siet thei a nih. Chu bâka chun, ei right ei (zalenna lê thuneina) khawm hi ei hriet a ṭha. Ei khuoah Sawrkârin scheme a hung ruohmanghai hrim hrim a ni ang taka a puitling nâw chun, do ngam ei tîu khai, țhuoitu khawma Imphal khawpui a'n thawk ei biel hi chu zuk sir ta nâw unlâ; a hmuna ngêi kanin sawrkârin ei biela dinga sceme an duonghai sukpuitling ngêi dingin hma la unlâ; a pawimaw tak chu ram le hnam ngîrsuokna ding chu Isu krista chanchin ṭha bawk hi a nih.
A chunga ei ziek met tah ang khin, Tipaimukh biela chu hnam dang ta ding hin vacancy um chuong lo; hi biel hi chu Pathien mi pêk lieu lieu nî'n ka ngâi a, ei ram lê ei hnam ngîr suokna Gospel chanchin ṭha tienga ei ṭhuoitu inzâum tak tak hai um khâwmna hmuna khin MLA pahni bêk ngîr suok nâwk tum ta inlâ chu nuom a va um char char de aw! Unâuhai hnama mi siemtu Pathienin Tuiṭhaphai hmuna ei sakhuo ṭhuoituhai a rem ruotna a, a mi sawn tungpêk hi beiseina lien tak el ka nei chu; ei hnamin MLA dang mi pêk belsa a tumna hmangruo pawimâw tak el, ei la hriet fuk lo pal a ni el naw ding maw ka tih? Unâu ṭhang har a hun ta ie, khawvêl inlumlet dân hi ngun takin hei sui chieng sin ta. Ei hnam mi'n kaisangtirtu kha Lalpa a ni naw mâw? A nuom chu a ben dei a, A nuom chu a dawmkâng el a ni naw mâw? Ei kohran ṭhuoitu um khâwmna hmuna khin ieng leiin am a thupêk ang taka ei um chun MLA mei mei chu mi pe nâw'ng a tia mâw? Chuleiin, pumkhata ngîrin HUNG TA Û'M KHAI ṬHANG RUOL EI TÎU.
