HMÂR ṬAWNGA SUOK CHANCHINBU PAWIMAW ZIE

~ Lal Dena

Ei piengpui ei nu ṭawng ngei,

Khuonu mi lo ruotpêk;

Ei ram le hnam chawisângtu,

Mani ṭawng a lo nih- Rev T.Khȗma.

 

Ei chanchinbu Hmasâwna Thar (HT) Tuolbuol 6, 2021-a HMÂR ṬAWNGA SUOK CHANCHINBUHAI ti thusep Rev Rosung Sinate ziek ka lo tiem a, lungril a tâwk a, lunginsiet ei um bawk, lung a sen nuom bawk. Thusep ziek dinga huol sa iemani zât um sien khawm, ka ngai pawimaw êm a, la hung tuihni ve vak ka tih. Hun inthlâkthleng peia chanchinbu pawimaw zie tâwite hril hmasâng ei ta, ei ṭawng ngeia chanchinbu hlutsak a ṭȗl ziein sunzawm ei tih.

Mipui sawrkârnaah chanchinbu pawimawna hi hrilin a siek nawh.  Mipui sawrkârnaah Inpuihai (estate) palihai lai chanchinbu hi palina (Fourth Estate) ti hiel a nih. Inpui dang hai chu dân siemtu pâwl (legislature), rorêltu pâwl (executive), court-a dân hmanga rorêltu pâwl (ju

diciary) an nih. Chanchinbu insuotu pâwl chu (media house) ti a nih a, chanchin lakhâwmtuhai chu journalist an nih. Chanchinbu bo chun mipui sawrkârna khawm a fe ṭha thei nawh.  Chanchinbu chun sawrkâr fe dân, thilthaw suol, thaw ṭhat le thaw ding hai mi hriltu a nih. Ei vawisȗn khawvêla lem hin chu chanchinbu a pawimaw zuol. Inthlâkthlengna ṭha lem ei nei ding chun chanchinbu le lekhabuhai tiem râwn a ṭȗl. Tu lem hin chu khawvêl danga thiltlung lai zing khawm thlirhrietna (tv) hmangin ei hmuh thei tah a. Khawvêl hmun hran hran London, New York le Churachandpur-a umhai khawm thlirhmuna (video) fe thlengin, mani umna hmuna meeting (video conference) nei zung zung thei a ni tah. Vuongnaa inzin kuol khawm a ngai tah nawh. Smart fâwn hmangin ei nuom hun huna hmaibiek (facebook) ei en a, IengAm (whataspp) hmangin thu ei thawn kuol thei tah bawk. Ei khawvêl hi a chîn sâwt nuom hle tah.

Inkhârkhip (lockdown) sung khan ei sikul naupanghaiin boruokzai (online) hmangin lekha an inchȗk a; hun sâwt naw tea ei hringnun hi hrietnasiemfâwm (artificial intelligence)-in a mi la thunun ding a nih. Eini chu R pathum (reading, writing le arithmetic) bul ṭanin lekha ei inchȗk ṭan a, ram changkânga mihai chu 4Cs hmangin lekha an inchȗk lem tah. 4Cs chu critical thinking, communication, collaboration le creativity an nih. C pakhatna hin chanchinbu/lekhabu i tiem hrim hrim a ṭha tâwk le tâwk naw endik theina hrietna nei a kâwk a, C pahnina chun i thil hriet chu pe sâwng thei khawpin i hrietchieng am? ti a kâwk a, C pathumna chun mi dang le inzawmna le inkawpna a kâwk a. Chu umzie chu mi dang le hmangruo dang hmanga thilthaw  tina a nih. C palina chun thil um sa, siem sa, mi thaw sa ringawta innghat lova, thilthar siem suok, ngaituo suok a kâwk. Hieng ang C palihai hi an pawimaw seng khawma, C pakhatna le C palina hi an pawimaw zuol. Pathienin um lova inthawkin Isu Krista hmangin thil a siem a. Mihriem ruok chun thil um saa inthawkin thil thar an siem thung. Bill Gates le Mark Zukerberg chun thil um tasaa inthawkin thil thar khâwlthluoknei (computer) le hmaibiek (facebook) an siem a. Ei ṭangkaipui hle. Sienkhawm annia inthawka thil thar ngaituo suok le siem suok tum lova, ei kawpi ringawt chun, annia inthawkin iengkhawm ei inchȗk naw tina a nih. Ei pi le puhai lo nei dân sawma, lo nei dân thar ngaituo lova a pângngai ngawta ei fe hin, lohma nei kawnga hma ei sâwn dêr nawh tina a nih.

Ngaidân thar mi kâwkhmu theitu laia pakhat chu chanchin tiem râwn a nih. Chanchinbu chun mipui roinrêlna baka sumdâwngna, fâk le dâwn, thil suok thar, hrietna var (scientific knowledge), leilung insiem dân, sik-le-sa le khâwvêla chanchin pawimaw po po mi hriltu khawm a nih. A tâwi zâwngin chanchinbu chu ei khâwvêl tukver a nih. Chuleiin ei ṭawnga chinchinbu suok chauh ni lo, ei ṭawnga lekhabu suok thar hai khawm inchâwk pei tum ding a nih. Hrietna hi tu lâkpêk thei lo rohlu ei nei sun chu a nih. Inchȗklai (student) umna in lem chun mâkmawa chanchinbu lâk le tiem hi insukhmu ngei ngei ding a nih.

Khâwl thilsiem (technology) tienga hmasâwnna leiin thlîrhrietna (TV), thlîrhmuna (video), biek hlatna (phone/mobile) le hmangruo dang dang hmangin ei khawsa mêk a. Ei nauhai nusery-ah kai hai lem chu digital class-ah lekha inchȗk an ṭan an tah hih. Chu umzie chu new digital age-ah ei khawsa mêk a nih.  Pawisa nei siin, pawisa bo khâwtlng (cashless society) ei indin ṭan mêk a nih. Khawvêl chanchinbu le national paper hai khawm boruoklên (interne-ah) tiem thei chu a nih a. Amiruokchu chanchinbu a suta sutdawk (print) tluk a um nawh. Thu ṭha tak tak zieka tiem theia um hai hi tiem a, inchik le sieṭhat tlâk hai sieṭhat pei chu mi var thaw dân a nih. I Pathien thu sermon buotsainaah  khawm ṭhangpui a ti che.

Khawtlâng nun inher danglam peia chanchinbu pawimawna hreiin ei mi hmasa haiin ei ṭawnga chanchinbu hmasa tak Hmasâwnna kum 1941 khan an mi lo insuo ṭanpek a. A châng a tlu a, a thonâwk a. Tuta Hmasâwnna Thar hi chu sunzawmna pei chu a nih. Pu Lalmalsawm Sellate le a editorial staff-hai ṭhahnemngaina leia mani sum sêng pawisa lova hring ṭâwk ṭâwk a nih.  Chanchinbu dang Inchȗklainun le Sikhawvar kum 1952 khan a suok ve ve a. Hieng lai hun bawk hin Hmâr Ârsi chanchinbu  khawm a suok a. A bo nâwk a. Kum sâwt fe hnunga Shan Weekly, ni tin chanchinbu (late) H.A.Lalrohlu ṭhahnemngainain kum iemani zât tiem theiin a suok nâwk a. Sakei huoi ei that chun sakei huoi dang bawk a hung suok nâwk hlak Hmâr thuvarin lo ti sienkhawm, Shan chanchinbu chu sunzawm thei ding mi huoisen vawisun chen hin tu khawm an la um nawh. Hnam lungsietum tak chu ei nih. Mani hnampui chunga ei huoia, hnam dang chunga ruok chu ui mei khup ei thaw nâwk hlak.

Inchȗklainun kha a ṭha êm êm a; a bîkin inchȗklaihai ta bîk deuh a nih a. Hi khawm hi a chângin a tlu a, a tho nâwk a, a tlu nâwk a. Thla tina suok magazine ṭha tak tak iemani zât ei lo nei tah a, ei vui liem nâwk pei a. Kohran tinin magazine ei nei fur a, ei la enkawl thei seng chu a ni âwm. Amiruokchu hienghai khawm hi Kristian Tlângau anga standard ruok chu an ni nawh. Kohran sum hmuna, entirnain Lalpa Ropuina, Malsâwmna Robâwmin phêk tam tak an hluo hlak a, sermon ṭha tiem ding a tlâwm pha. Thilpêk Pathien kuoma ei pêk a nih chun suklang a ngai kher am? “I kut changtiengin a thaw chu vawitiengin hre naw raw se” ti a nih a. Mihriem kutah mi dang hrieta ei pêk a ni ruok chun thu dang; chuong a nih chun Farisaihai angin ei lâwmman ei hmu nghâl tina a nih.  

 Ni tin chanchinbu thuah hin chu mi hnunghnawt ei ni tah. Entirnain tuhin unau Paitehai chun ni tin chanchinbu pahni Manipur Express le Lamka Post phêk riet lai vêla tam an nei. Eini chanchinbu chu phêk li chauh a la nih. Chu khawm chu mi khâwl hawa sut ei nih.  Ei chanchinbu nei sun hi Hmâr ṭawng tiem thei taphawt chun ei lâk seng amani ka lo ring a, a latu hi ei lo tam rak naw a nih âwm. A la sun hai khawmin a man ei pêk ṭha naw thu dâm hriet a la ni nâwk deuh deuh. Huihah! A pawih ngawt el. Tuta HT lâk man hi thla khata Rs.200 chauh a nih a. Ni khat lâk man chu pawisa 70 vel chauh a nih. Ei ni tin sa fâk le hmer-le-hmuor ei chînghai hi hei suktlâwm met inla, ni tin chêng khat chanchinbu man dingin sie pei inla, thla khata chu cheng 300 chanchinbu man nêka tam ei inkhâwl thei ding a nih. Thil hi awlsam taka thaw dân khawm a um pei hlak. Ei ngai a sam taluo.

Tu khawm chanchinbu la dinga inphȗtlui thei chu ei ni nawh. Manipȗr University-a ka thawk lai khan Thukizâkna (Ni tin Chanchinbu) unau Paitehai chun ni tin an tiem zing thei. University-a sin ruok hai khawm a hun taka an insuo thei zat zat; thawktu khawm an tam pha hrim. Iengti ziea Hmasâwnna Thar ei tiem thei naw bîk? tia kâ’n dawn chun, a semtu ding an um nawh tih a nih. Anleh, unau Paitehaiin an thaw thei si a, ieng dinga ei thaw thei naw bîk? tia kâ’n dawn nâwk chun, “anni chun hnam thil (national duty) angin an lâk a nih” an ti nâwk a. Anleh ei ni khawma hnam thila lâk ve thei a ni naw maw? ka ti nâwk leh, “chu tak ku chu ei tlâksam a nih” an mi tipêk nâwk a. Hnamah chiengna ding hin thisen khera in-baptis ei ṭȗl a ni? Hnam boral ding chu ei nih ma ma!

Ka ngaidân chun Hmâr ṭawnga lekhaziek tiem thei phawt chun bengvarna le chanchin hriet zauna dinga chanchinbu chu lâk ngei ngei chi niin ka hriet a. Ei pasiet lei niin ka hriet nawh a, lekha tiem nun (reading habit) le hnama ei chieng naw lei ni takin ân lang. Nupui papui lekha inchȗk sâng naw khawm, Bible bâka ni tin chanchinbu Hmâr ṭawnga tiem theia um hi chu la seng inla. Pathien thu sermon khawm mi ṭhangpui naw nim!  Ei sikul naupanghai khawmin Hmâr ṭawng tiem inchȗkna’n hmang hai sien. Hmâr tâwng tiem dik le ziek dik inchȗkna ding khawmin a ṭha. Kohran tinin kum tluon thupui an siem ang bawkin Hmâr Inpui khawmin “ṭawngah le hnamah pieng thar kum” mi hung rawtpêk hiel hai sien ei nuom el. Ṭawng a dam chun hnam khawm a dam a, hnam a dam ding chun ṭawng a dam a ṭȗl a nih. Ṭawng tieng suituhai chun Hmâr ṭawng hi ṭawng thi el thei (endangered language) lai an zêl sa. Mizorama lem chu Hmâr ṭawng dam khawsuokna dingin SHC-in hma nasa taka a lâk a ṭȗl tak meuh.

Pu Rosung Sinate-in a rawt angin Tuithaphai dunga Hmâr in tinin HT hi ei lâk bâka, dârkâr khat le a chanve chauhva hla, Imphal Hmâr in tina hei la nâwk bawk inla chu ei chanchinbu buoipuituhai ta ding khawmin thafân um deuh a tih. Imphal chanchinbu ni tin Churachandpur a hung tlung zinga, kawfi mȗt vir pumin ei tiem hman a. Tuiṭhaphaia inthawka chanchinbu Imphala Hmârhaiin an tiem hman nawna ding san a um nawh. Ṭawng dang chanchinbu khawm tiem ei tah, mani ṭawng chanchinbu a ni lei tak khawmin lâk ngei ngei ding a nih. Mani ṭawng ei ngaihlu ding a nih. A san chu degree level chena Central University pahnihaiah MIL sapzek ei hang nei phâk dâm hi a ropui. Hmâr MIL leiin pâwlsâwm le pâwlsâwm pahnihaia ei sikul naupanghaiin division insâng lem an hmu pha a nih ti hi I ngaituo hlak am? Assam rama lem chu unau suopui Gangte, Kuki, Vaiphei, Chorei, Nepali, add, hai chen khawm Hmâr MIL latu an nih. Ṭhahnemngaina chang hre nâwk zuolin, a hma nêkin ṭawngah hin ṭhang la nasa nâwk zuol ei tiu. Hmâr ṭawnga lekhabu suok le chanchinbu suok chu a man tam khawm a um nawh, inchâwk hmak hmak pei ding a nih. Ei khawvêl inhêm dân khawm hi en ei ta. Tuta new education policy dâm hin mani ṭawnga elementary education-a hmang uor a tum a nih.  

Rev.Pu Rosung Sinate hi Pathien thuah chauh ni lo, hnamah khawm hin a chieng hle a nih; role model a tling tak zet. Ziek ding tam siekhawm, Pu Rosung Sinate kamsuok bawkin ei thusep khâr ei tih: “Hnam a dam ding chun ṭawng a dam a ṭȗl a, ṭawng a dam ding chun a hmang chauh ni lovin a hawrawp le a ziek humhal le dawmsâng a pawimaw a nih. Mani hnam ṭawnga chanchinbu le lekhabu hauh hi hnam le ṭawng damna a nih. Ei literachar a damna dingin mani ṭawnga chanchinbu le lekhabuhai tiem uor ei tiu va, ziek uor bawk ei tiu.” NI khat laia Pu Lalthanzau, Social Woker-in HT ṭhangpuina chêng sîngkhat chuong zet a hei pêk dâm kha a va ropui de aw!. Ei chanchinbu ku hi ei hnam dârthlang a nih. Inen nawn ei tiu. Ei mawi am?