Chang thlang: Chu lai ram khaw daia chun berampuha’n an beramhai an veng a, zanah an riek nghah a. Luka 2:8. (Delhi Version)
~ Lal Dena
Tukum chu Covid-19 hrileng leiin kum dang angin Krismas
chu biekin le lengkhawmin ei hmang thei naw tawl ding a hawih. Pawih ti naw
rawh. Social distancing thaw ngai lovin, kei chu khaw ram daia ringnain berampuhai
kuomah fe dingin ka’n siem a nih. I nuom leh, hung ve rawh.
Berempuhai umna chu Bethlehem khuoa inthawka mel khat
le a chenve vela hla, phula a sun a zana beram vengna hmun a nih. Hi lai hmun
hi a pawimaw em em. Jacob khawmin beram a lo veng hlak a, a nuhmei a hmangaih
le a dit em em Rachel-in Benjamin a nei tumin a thi a, hi lai hmunah phum a nih
nghe nghe, a thlan khawm vawisun ni chen hin hmu thei a la nih. Hi lai hmun
bawk hi Boaz, Juda lal tlangval le thlawibuong Ruthi intawngna hmun kha a nih.
Ruthi chu tui infai zovin, perfume rim inhnik inchulin, zana Boaz ke thluonah a
zu zal a. Zan lungmawl lai Boaz a hung thanghar khan thlawibuong puon an keizawm
pui nghal a: “vawizana ngilneina I hung inlangtir hin a mi suklawm a nih” a tih
chu. Zuk hril pei inla, Bethlehem le a se vel hi hmun pawimaw hriet ding a tam
em em. David pieng le seilienna, a bikin hi lai phul hi a tleirawl lai a beram vengna hmun a nih. A khaw hnungin Judahai lal
dingin Samuel-in hriek a nal a, Bethlehem chu David khawpui ti a hung ni tah
peih.
Hi lai hmuna hin a nih berampuha’n an beramhai an
vengna chu. Berampuhai hi Juda khawtlang (society)-a mi hnuoihnunga ngai ni hai
sienkhawm mi fel, mi ringum, inngaitlawm, thudik tantu, rabbi-hai inchuktirna
hnuoia beram enkawl dan training tha tak nei an nih. An beramhai khawm beram
naran ni lo, a chi tha bik Jerusalem Templeah Israel nauhai suol tleng faina
dinga inthawinaa inhlan ding an ni leiin hliem le panser, dem kai lo uluk taka
enkawl an nih. A enkawltuhai hi Levi chia thiempu shepherd priest tia hriet
khawm an nih. Juda lekhabu Torah dan iengkim inchuk, zawlneihai lekhabu le
hrillawkhai tiem le Judahai lal Messiah pieng ding nghakhla taka thlirtu an nih.
An beramhai hi sawisel bo, hrisel le hliemna panser chite
khawm an nei nawna dingin, sun le zanin ramsa ti um laka an veng hlak a nih.
Berampuihai an inraia an intena (nau neina) in Tower of the Flock Bethlehem khawbul
ela, tien laia Lal David royal compound sungah sawng hni neia bawl a nih a; a
sawng chung chu beramhai ralkhata hei thlir theina le riekna nih. A sawng hnuoi
(ground floor) chu beram intena ding (birthing chamber) le ranthleng, beramte
pienghlim pieng suolna a nei am tia enfie hnunga inzalna ding siem a nih bawk.
Beramte tuomna ding bik puon naran ni lo, puon thienghlim le innem, (swaddling
cloth) sie a nih bawk. Levi thiempuhai ser-le-sang hmanga sukfai le sukthienghlim
hieu vawng an nih bawk. A san chu beramte chu pieng suolna nei lo, dem kai lo a
ni ding a nih a, pawp le hliem a um nawna dingin puona fimkhur taka tuom a nih
hlak. Kum khat an tling phaa Fekan
Ruoiah suol thawina dinga inhlan an nih hlak. Chuleiin, berampuhai chun rabbi-hai
inchuktir dan ang thlapin an beram nau nei hai an enkawl hlak a nih.
Theologian hmingthang Dr Juergen Buhler, S.Corbitt,
Troy Brewar, Ran Cantor, Christopher Kirkland le Chaim Bentorah-hai chun Isu
Krista kha hi Tower of the Flock-a
pieng ni ngei dingin an ring. Hmar Holy Bible BSI/BFW/Hydrabad version chu
Tower of the Flock hi “ran ruol kul”
ti’n an inlet a; DV chun “ran ruolhai vengbuk”
ti’n an let a; BSI (Haflong) version chun “beramruolhai
venghimna insang” ti’n an let thung. Khi a chunga ei hril theologian thenkhat
lem chu Tower of the Flock hi a hmun
ngei zu sirin, nasa taka research an thaw hnunga, an thilhmu suok (finding) hi
an ziek a nih. Ei ring dan chun Isu chu bawnginah ei inpiengtira, ei thu le
hlahaia khawm “Van Lal nau a hung suok Bethlehem bawnginah” ti’n ei sak kur
duom hlak. Hmar Holy Bible version pangahai ka en vawng a “bawng in” ti
inziekna ka hmu der nawh. Isu Krista Hringna Bei vana inthawka hung tla, bei in
Bethlehem ngeia hung pieng le Pathien Beramte khawvel suol phur hmangtu ding
ranthleng (beramte zalna) ngeia a hung zal hi Pathien chatuon remruotna a lo ni
zing. Khuolbuka tlungna hmu zo lova, beramruol
vengna
insanga (Tower of the Flock) an tlung hi, Joseph ni sien, Mary ni sien,
Davida thlaa mi ve ve an ni leiin, a awm hlie hlie. Zawlnei Mika khawmin Lal
Messiah piengna hmun ding kum 700 dana a lo hmu vawng a, hieng hin a lo ziek
kha tie:
Nang aw,
beramruolhai venghimna insang,
Zion naunu chengna muol,
in lalna hmasa kha I ta dingin tungding nawk ning a
ta,
Jerusalem naunu kuoma chun lal ram chu hung kir nawk a
tih.(Mika 4:8/ BSI-Haflong version).
Isu piengna khuo khawm Mika bawkin hieng hin a lo
hrillawk nawk a: “Sienkhawm nang,
Bethlehem Ephrata,
Judai khawpui lai chin hle la khawm,
I sunga inthawkin ka ta dingin,
Israel roreltu hung suok a tih,
A tobul chu tiena tlanga mi,
Chatuona inthawka suok a nih. (Mika 5:2/Delhi
version).
A chunga ei hril theologian-hai ringdan hi ei Bible
thu leh khawm a’n mil bik. Zanrila Lalpa vantirko Gabriel-in berampuhai kuomah,
“Vawisun hin in ta dingin Davida khuoah Sandamtu a pieng tah, Lal Krista chuh.
Hi hi in ta dingin inchikna ning a tih, naute,
puona tuom, ranthlenga zal hmu’ng in tih” a ta (DV). Kha zo char khan vana
mipui tam takin Pathien inpakin blessed
choir hlapawl an hung sak a:
“Chunghnung taka Pathien ropui raw se,
A ditsakna changtu hnuoia mihriemhai kuomah,
Inremna thu inleng raw se”(DV) tiin.
Khawvel hlapawl saktuhai chu nal tak taka incheiin
mipui tlim hmur hma, inkhawmpui liena hai an sak hlak. Van zaipawlhai ruok chun
mipui tam le tlawm an uksak nawh, ngaithlatu berampuhai (thenkhat chun panga an
nih an tih) kuomah an hla mawi an hung sak tawp el. Hmun fienriel, ram khaw
daiah hin thlarau pawlna hi dawng a lo awlsam lem a hawih. Tuta tum hrileng leiin
biekina le lengkhawm hawlah Lal pieng lawm thei naw la khawm, unau, beidawng
naw la. I pindana thingthiin lal chibai buk tum el lem rawh. Thawfu lem I tih.
Berampuhai kha khawsak mivarhai angin an buoi ve nawh.
Pastor Thangngur-in, “Mivarhai ruola fe dingin, Aw ka thla insiem ve rawh” a lo
tih a chuh, kei chu mivarhai zui remchangin ka hriet naw ngei. Inkhawkpui ding
an hauh. An thiemna an varna an suong amani ding, zawlneihai lekhabu ram tin
keuvin research an la thaw vel a, lal in sir lo ding dam an sir kuol vel a, nu
le pa tam tak tapna hre lo ding tap nau an inchangtir. Kut chawi ding nei naw
hai lem chun zui chi an ni nawh. An thil chawi hai kuh kha thil man tam, mi
nazawng chawi thei an nih nawh. ‘Lungril
a kuom tieng hawng inla,
Rothil dang a ngai
tah nawh’
ti kuh hi a lo tha lem ie.
Gabriel khan inchikna ding a hril chieng bawk, berampuhai
kha an buoi nawh, a hmun an hrietchiengsa a nih leiin ‘Thaw ro, tuhin fe nghal
ei tiu’ an tih a, an inringzo, Pathien mi hriet an nih leiin. Bethlehem
kawtthlera inpal buoi um lovin “BERAMRUOLHAI
VENGHIMNA INSANG”(Tower of the Flock)
an pan nal nal a, Joachim, Anna (Joseph tarpupa le tarpinu), Joseph le Mari le ranthleng
thienghlima zal VAN MIRIL BUNG DAWNTUOI
Gabriel-in a hril ang ngeiin an va hmuh a, lawm em emin bawkkhupin chibai an
buk a nih khah. An kir tieng mitin ta dinga chanchintha lawmum bek bek an hril vel
nghal a nih kha. Entawn tlak an va ni
de!.
Hi thusep ka ziek lai hin Israela lo inpem tah le kum
15 zet um tah Pu Kaikholien Singson, (Bethel Hausapu hmasa) biekhlatna’n tum
hni lai kan zuk biek a. Bethlehem le Jerusalem inkara berampuhai beram vengna
phul kha um ta naw nih a, vawisun ieng tin am a um ta a? Tower of the Flock kha
a la um am? Jacob nuhmei Rachel thlan kha te? Bethlehem bula muol le
phairuomhai beramhai chettlatna kha, a boruok iengtin am? Tower of the Flock khela Jacob puonin zarna
dam kha te? A zieka ka hmu angin ka zuk indawn pei a. Hieng hin a mi hung dawn
a, “E he! Chuong ang awzawng chu hmu ding a um tah nawh. Bethlehem khawpuia
inthawkin highway lampui nam zurin a um a, a sir haia pakka building Jerusalem
chen a’n tlar nghuon tah a. Chu hluotuhai chu Pangal vawng an ni tah. Rachel
thlan le hmun pawimaw danghai tha taka humhim an la nih. Sienkhawm Palestina
ram sunga um an ni leiin, kan fe ngam nawh. A mi chenghai chun an zakuofuol
hnuoia chemte an pai zing a. Ramhnuoi mi an tam bawk. Security thang lo chun fe
ngamna ruol a’n tah nawh” a hung tih chu!
Vawisun lem hin chu Bethlehem khawpuiah khawm kum dang
angin inzinmi (tourist) khawm an tam nawh. Covid-19 leiin Bethlehem kawtthlera
leng vel khawm an tlawm. Chuleiin, unau, lunghnur nawng ei ta. Ei umna senga,
ei pindana ei lungril robawm hawngin:
Isu, ka lungrila
hung la,
I hmun ding ka
lungrila um;
Aw Lalpa Isu,
tuhin hung la,
I hmun ding ka
lungrila a um.
tia tawngtaiin Lalpa ko ei ta, ei tawngtaina mi dawn ngei a tih. Taksain berampuhai chengna muola ei zu leng thei tah nawh, leng chak khawm a um tah nawh, a hluotuhai le a boruok a dang tah. Sienkhawm ringna’n berampuhai lungril putin ram khaw dai hmun fienrielah tukum KRISMAS chu hmang lem ei tiu. Krismas chibai.
