By: Rev. Dr. Lalrosiem Songate
“Nang hlimin lawm i ta, ama pieng chun mi tamtak lawm bawk an tih,” (Luka 1:14)
Khawvela hin mihriem tamtak ei pienga, thenkhat chu nu le pa lunginzingna dinga pieng dam, thenkhat chu mi thina dinga pieng dam, mi sietna dinga pieng dam, mi natna dinga pieng dam ei ni a. Pieng man ei nei tawlnaw ngei! Baptistu Johan pieng ding thu vantirkoin a hrillawkna ruok hin chu a piengna hin a nu le pa suklawm a ta, mi tam tak khawm an lawm bawk ding a ti a nih. Pieng man a um bik awm ngei!
Baptistu Johan a nu le pa chu Zakaria le Elizabeth an na, thiempu hnama mi ve ve innei an nih. Anni nupa hi mi fel le sawisel bo, Pathien thupek hai khawm zawm tlat mi an nih. A pawi pekna chu tar tak anni chen khawma nau neilo an nih. Tienlai chun nuhmei ching, nau nei theilo ni hi thil vangduoi thlak tawpa ngai a ni a. Nau a khawm nau pasal an neinaw chun nuhmei hi an pasal hai laka an ngai a ngam thei tak tak naw a ni awm. Jakob a nuhmei Leah khawm kha a pasalin a tumnaw sa a a nei a na, dit khawm a dit bek naw ning a tih, nau pasal Reuben a hei nei pek khan, “.. tuhin chu ka pasalin mi hmangai tang a tih,” (Gen.29:32) a ti chau a na. A pasal Jakob hin ditlo deu hin sawisak hlak a ta, a pu Laban a dit lei le a sangnu Rakil kha la hlawsuok a nuom tlat leiin nuhmeiin a nei tawk tawk khawm ni mei a tih. Nau pasal pathum a hei nei pek zet khan chu “.. ka pasalin mi zawm tang a tih,” (Gen.29:34) a ti nawk chau a ni kha. Chuong ang kara nuhmei ching, nau neitheilo hang ni chu inzak a um a, muolphona a ngai a nih. Elizabeth khawma an rai ti a hriet hlim chun, mi laka ka hmingsietna inkhumna dinga Pathien thil mi thaw pek a nih, tiin a hriel hiel a nih (Luk 1:25). Chuonga khawtlang mithmua nau neitheilo a muolpho taka an um lai khawmin Lalpa laka an nuor chuong naw a, ringum takin an thiempu rawngbawlna ah an inpek tlut tlut lem el a nih.
Hienga ringum taka Lalpa rawng an bawl hnungin an hun nuhnung tienga Lalpa malsawmna an dawnga, naua khawm nau nuhmei nilo, nau pasal ngei, nau pasal a khawm a nu le pa chau niloin mi tamtak lawmna intluntu ding nau an hung hringsuok ta a nih. Baptistu Johan thilthaw ding Luka in a hrilna a chun “Israel thlahai tamtak Lalpa an Pathien kuom tieng innghattir nawk ding” ti le “pahai lungril chu nauhai tienga innghattir ding dam, mi kawmawhai chu mi feltak varna tienga innghattir ding dam, Lalpa ta dinga mihai lo buotsai dingin” tiin a hril a nih. Hi taka a umzie chu Israel mipuihai le Thlarau tienga hartharna nasa tak leiin khawtlang le insung tieng haia khawm insiemtharna nasa tak an tlun ding tina a nih.
Hihi Israelhai ngirhmun le ei hang en chun thil rapthlak tak a nih. Kum 400 lai veng vawng Lalpa laka inthawka thucha an dawng taknaw hnung, Lalpa zawlnei hrim hrim hmu ding le hril ding an um taknaw hnung, Pathien tieng hrim hrim a re a a re tawk tawk hnungin Baptistu Johan hmangin Isu Krista hungna ding lo buotsai lawkna in Pathien a mipuihai lai a hung che tan nawk ta ding a nih. Chutaka dinga Pathien hmangruo thlang chu Baptistu Johan hi a hung ni ta a nih! Daktawr hai dam hi damnaw inrim em em enkawla sukdam nawktu anna, an va hlu de aw! Zirtirtuhai dam lekhathiemlohai lekhathiem le bengvar tak taka cher suok hlaktu an na, an va hlu de aw! Israel mipui, an Pathienin kum 400 veng vawng a nghatsan hnunga an Pathien inhem hmang hnung hung keihem nawka amipuihai le inremtir nawk thei khawpa rawngbawlna hring hung intluntu Baptistu Johan mawl hi a va hlu ngei! A piengna hin a nu le pa muolphona chau an khum naw a, Israel mipui po po, an Pathienin a nghatsan tak leia an muolphona inkhumpektu a nih! Dam man, pieng man a nei khawp el!
Luka 1:17 tawp tienga Elijah lungril le thilthawtheina putin a ti hi, amahi Elijah kha tina an naw a. Thuthlung Hluia Elijah le Enok kha thi loa van kai anni a, anni kha hnuoia la hung thi nawk ding ang deua ngaidan nei ei um hlaka, hihi indiklo a nih. Eini vawisun ringtu dama umhai khawm hi Isu hungin a mi nang chun thiloa vanram kai ding vawng ei nih. Rapture huna thiloa vanram kai dinghai in entirna lem an nih. Elijah lungril le thilthawtheina a ti hin Elijah hun lai le a tekhina lem a nih. Elijah hun laia a ram mipuiin an Pathien nghatsana an lal Ahab rawia Baal pathien an bieksan angin Johan hun lai khawm hin a ram khawpheka Pathien nghatsan an ni a. Elijah hun laia Israel mipui tamtak Baal laka inthawka Pathien tieng a thuoikir angin Johan khawm hin Pathien thilthawtheina nasa tak leiin Israel mipui tamtak Pathien tieng a keihar ding a tina lem a nih.
Hieng khawpa nasa a Pathienin a hmang nasan chu ama Baptistu Johan khawm Pathien hmang thei dinga a lo insie tum lei a nih. Lalpan ieng angin mi hmang nuom sienkhawm a hmang thei dinga lo insie tum chuong loa mi thaw thaw thaw thei vawng, mi fak fak fa thei vawng ei ni chun Lalpan mi hmang ngai naw nih. Baptistu Johan kha Thuthlung Hluia Nazarite dana Lalpa ta dinga insie tum a ni a, zu le uoiin hrim hrim thawlo a nih. Tulai nisien chu zu le drugs ti chau niloin hawp le hmuom hai laka khawm insie kieng mi ani ding a nih. Hi ang dan hi ei zui ding tina niloin eini khawm Lalpan a mi hmang ei nuom chun a hmang thei dinga ei insuk thienghlim a ngai a nih. Hieng anga Lalpa hmang tlak dinga mani lo insuk thienghlim hlak mi eini chun Baptistu Johan anga nu le pa le mi tamtak suk hlimtu le suk lawmtu ei ni ngei ding a nih.
