Responsive Ad Slot

HSA in SHC thuoituhai inhmupui

Thursday, December 17, 2020

/ Published by Simon L Infimate

Aizawl, December 17, 2020, Virthli (ONP): Hmar Students' Association (HSA), Joint Headquarters, Aizawl ṭhuoituhai chun zani December ni 16, 2020 khan Sinlung Hills Council (SHC) office kanna hun an neia, Chief Executive Member (CEM)  Pu Lalthlamuana Hmar le Executive Member (EM) Pu Lalvenhima Hmar hai in lo dawng sawngin SHC area le hnam hmasawnna ding thil tamtak an hriltlang.



HSA, Joint Headquarters, Aizawl President Pu Henry L. Khojol in hrilhawngna huntawi hmangin organisation ang zawnga SHC member hai lawmpuina malama, ṭhuoituhai leh inpawltlangna nei chu hun sawt taka an lo tum tah, amiruokchu, Covid-19 hri lêng lei le harsatna dang dang leia an sukpuitling el thei naw thu a hrila, SHC khawm ei ta a nina angin hnam organisation hai leh inthuruol le inpawtlang taka ram le hnam ta dinga hmalak tlang a pawimaw thu a hril a, SHC tha sukhratna dinga HSA anga hma an lo lâkna ding awm a um chun inphalam lova hrilhriet pei dingin a ngên a nih.

Hi huna hin SHC office building sungah a hminga HSA in office anga an nei ding room siem dan dam, Sikpui Ruoi le Martyrs' Day hai restricted holiday beka puong dinga sawrkara nawr ding dam, SHC member hostel cum multipurpose nei dan ding dam, Hmar house nei dan ding dam le hmasawnna rurel dang danghai an hriltlang a nih.


Pu Lalthlamuana Hmar chun hnam organisation ang zawnga SHC office ah HSA ṭhuoituhai an hung lênglût chu la um ngai lo thil a ni leiin ropui a ti thu a hrila, HSA bâkah hnam anga pâwl ei nei hai le SHC chu inṭhangpui intuoa inthukawpa kal pen ding an ni thu a hril a, SHC in budget la neinaw sienkhawm an thei ang angin SHC huom sungah hmasawnna rurel an fe pui mek thu a hril bawk.


HSA General Headquarters President lo ni hlak Pu Lalthlamuana chun HSA thu hung intlun hai chu a ngai pawimaw thu le thei ang anga an bawzui ding thu a hril a, Council hi  bul ṭan chau ei ni a, Act hnuoia inkhai ni inla khawm a structure hi siem mek a ni a, chulleiin dan le dun (Rules) hai khawm siem fel mek a ni a, tuta term khatna a hin a structure rem fel zova a um thei chun council ngirhmun nghet thei a ta term danga hai chu hmalak a hung awlsam pei ding thu a hril.


Pu Lalthlamuana chun salary & allowances Rules chungchangah thenkhatin thu hrechieng lova a sie tieng zawnga an thlir chu pawi a ti thu a hril a, mipuiin SHC a hin beiseina insang tak nei de hai sienkhawm mi harsa hai ṭhangpuina ding sum le pai ti tham a la neinaw leiin memberhai lawmman (pocket money) a'nthawk pêk a ṭul hlak leiin mipui duthusam an phâk ngainaw leiin inphalam um an ti thu a hril.


SHC huomsunga infepawna lampui bakah agriculture link road siem dan ding, kuva ching theina ding project le thil dang dang an buoipui mek thu a hril.


Pu Lalvenhima Hmar khawma HSA office nei dan ding chu an ngai pawimaw thu hrilin, hun nuhnung tieng chu Hmar rim innam met lo member khawm an la hung inlal thei leiin tuta term sung ngei a hin nei dan an ngaituo thu a hrila, Hmar house nei dan ding, Sikpui Ruoi le Martyrs' Day hai restricted holiday bêka puong dinga HSA ang zawnga nawr chu kawngro a dengsei a ring thu a hril a, council member ha'n hlawtak tak le development fund an la neinaw leiin mipui rawngbawlna kawng harsatna tamtak an tuok thu a hril.


HSA ṭhuoituhai hin Christmas chibai bukna'n Pu Lalthlamuana Hmar hi SHC aiaw in Hmar Thangsuopuon an insil tir a nih.

Don't Miss
© all rights reserved
made with by Simon L Infimate