Muolvaiphei khuo sattu (L) Pu Lienkhum hrietzingna dinga 5 Men Football Tournament an huoihawt chu November 13, 2020 dar 3:00 PM khan Muolvaiphei playground-ah Closing Ceremony hmang niin Final match hmu nuom um tak el inkhel a nih. Hun hmangna hi Nk. Christina Buongpui le Mr. Lalruotnghak han an keithuoia, hun hawng tawngtaina Pastor Ramenglienin a nei a, Mr. E. Ramngailien Lungtau anthawk lawmlutna thucha ngaithlak a ni zoin Pi Chiinneinuam Darngawn in Pu (L) Lienkhum a chanchin hrilna le to tawka sunna hunser hmang a nih.
Hi huna hin Chief Guest- Pu Zaihnun (Social Worker), Guest of Honour- Pu Laltlanchianga (Social Worker) le Funtional President - Pu Lalrammawi Hmar (Propietor, KT Spring) hai anthawkin thu tha tak tak ngaithlak a ni a, thuhrilna an nei zoin chawimawina thuziek inhlan an ni a, khuollien hai khawma organiser hai thilpek inhlanna an nei ve.
Hi huna hin Special Invitees- Muolvaiphei VA, Saikawt VA, Muolvaiphei HWA, CDSA, Kim's Aqua hai khawma thuhrilna neiin thilpek inhlanna an nei tawl.
Program hmang ani sung hin hun kar lakah Nk. Lorinda Varte, Mr. Jason T. Pulamte, Nk. Lalrinsangi le Nk. Deborah Lalnunmuong han mipui fekhawm hai hla mawi tak tak sakin an inawi a, mipui na a tlei hle.
Final Match a hin Xope Point FC le Pi Pong FC hai an inkhel a, an ball pet a mawiin mipui mit a tlei hle. Pi Pong FC chun an khingpui Xope Point FC hai 3-0 a hnein Champion Cup an lo dawm ta a nih.
Hi tournament a thang Team 16 hai laia individual players a thiem filawr bik, Best Keeper- Mr. Joshep Lalmawizuol, Top scorer- Mr. James Hangbiaklian le Best Player- Mr. Israel Lalrawngbawl hai kuomah lawmman inhlan an ni bawk. Lawmthu hrilna Pu Ramlawmsanga in a nei zoin hun suktawp a nih.
