Diphu ah 81st HSA Day phuisui taka hmang

Diphu, the 3rd Oct, 2020: Vawisûn khan Hmar Students' Association, Diphu Unit hai chun 81st HSA Day Celebration cum 23rd HSA Diphu Unit Founding Day chu phuisui taka hmang a nih. 1st Session huna HSA Flag keipharna Tv. James Selate, General Secretary, HSA Assam Hills JHQ in a nei a, chu zoa 2nd Session hun Tv. Gideon Hmar, Asst. Secy, HSA Diphu Unit in a keihruoi a, hi huna hin Tv. Isak Rohmingsang Sungte in inchûkna tienga hlawtlingna changhai chawimawina Memento inhlanna hun a hmang. Chun kum tina lo nei hlak Late Thangpui Memorial Award (Class-X Overall a insangtak) le Late L.C. Neitham Memorial Award (Cl-X English Subject a insangtak) hai kuomah inhlan an ni bawk. Upa Henry L. Varte in infuina thucha le țawngțaipekna a nei bawk a nih. Nk. Rose Riengsete le Pu Jehova Jire Zate hai a'nthawk hla mawi tak ngaithlâk a nih.

Thuhrilna hun Tv. James Selate, General Secretary, HSA Assam Hills JHQ in 1939 a'nthawka HSA chanchin le Diphu HSA chanchin (1997-2020) tlângpui hrilna a nei a, Tv. Ramsiemlien Khawbung, Secy, HYA Diphu Branch, Pu R.H.Hminglien Hmar, Vice President, Karbi Anglong Hmar Association (KAHA) le Pi Ringthang Țhiek, President, HWA Diphu Unit hai a'nthawk lawmthu hrilna le HSA Chibai bûkna hun an nei bawk a nih. Tv. John Lalsandam Hmar, President, HSA Diphu Unit in lawmthu hrilna (Vote of Thanks) a nei a Upa Henry L. Varte in Pathien kuomah țawngțaina hun neiin program hlawtlingtaka hmang zo a nih.

Program hmangzo ani hnungin Refreshment inhnik tak el kiltlâng ani bawk a nih.

NB: Covid-19 (hripui) inlêng le inzawmin mipui tamtak fekhawm a remchâng naw leiin HSA members hai bâka ei hnam sûnga organization țhuoitu hai chau an țhang a nih.