Rengkai, October 4, 2020, Virthli (ONP): HSA Rengkai Unit huoihawtnain October 3, 2020, dar 6:30 PM khan Life Cafe, Rengkai Road ah HSA kum 81 a tling lawmna le Rengkai khawsunga inchuklai Cl-X le XII exam result suoka toppers hai lawmpuina le chawimawina hunser hmang a nih. Hun hmangna hi Zosanglurin a keithuoia, hun hmasa tieng Lungruolpui Sungte, Vice- President, Rengkai HSA Unit in lawmlutna thucha a hril a, Andy Laltlingthang Zote@Gulith Hriler, President, Rengkai HSA Unit le Finny Lalthansiama, Secretary, Rengkai HSA Unit haiin HSA Day Cake khawina hunser an hmang.
Hi huna hin Mr. George F. Tuollai, Public Relation, HSA GHQ a'nthawk HSA Day thucha ngaithlak a ni a, thu a hril zoin single music video Mr. S. Lalramhlun-in a phuok le Grace Famhoite-in a sak " HSA kan Hlimna" ti hla a tlangzar nghal bawk.
Hi huna hin Mr. S.Lalramhlun, Education Secretary, Rengkai HSA Unit in Rengkai khawsunga toppers hai Award inhlanna hunser a hmang a, kum 2020 a Board of Secondary Education, Manipur in Cl-X exam a huoihawt huna Rengkai khawsunga HSA members hai laia an sangtak- Mr. Caleb Zothangvunga s/o Pu Lalchhuankima chu H. Thuomte Memorial Award inhlan a nih. Council of Higher Secondary Education, Manipur in Cl-XII exam a huoihawt huna Rengkai khawsunga Science stream-a an sangtak- Mr. John Lalhmangai s/o Pu Lalthansang chu " Upa Sangzuol Memorial Award " inhlan a ni a, Arts stream-a an sangtak - Ms. Cross Laltlingzo Changsan d/o Pu Solomon kuomah " Pu V. F. Tusing Memorial Award " inhlan a ni bawk. Award hai sem ani zoin Rev. Thangsuolien Taite'n toppers hai tawngtaipekna a nei.
Rengkai HSA chun tukum a Award hung tumtuhai po po chungah Rengkai HSA Unit hmingin lawm thu an hril a, Award hin chawimawina thuziek le sumfai a sawmsa nghal a nih.
Hi hunser hi HSA GHQ, HAA GHQ, HSA CCpur JHQ, Rengkai Village Authority, Rengkai Val Upa, Rengkai HWA Unit, Rengkai HYA Branch, RACC le Rengkai Nunghak Pawl hai khawma uop vein HSA Day chibai bukna thilpek chawiin thuhrilna hun an hmang tawl.
Hi hunser hmang ani sung hin hlasak thiem- Grace Famhoite, Joshua Buhril, Florence Sungte le Pengpelep han hnam hla sakin mipui fekhawm hai an inawi a, vote of thanks Mr. S. William, Asst.,Secy., Rengkai HSA Unit in hrilna a nei zoin Rev. Joseph R. Joute in tawngtainain hun a khar.
