Mizo Bible chungchanga Ankhasuo le Khangbor khawtlang thupuong

THUPUONG

(Declaration)

25th July, 2020:

MIZO (Lushai) BIBLE CHUNGCHÂNG A ANKHASUO & KHANGBOR KHAWTLÂNG ṬHUOITUHAI JOINT MEETING

Tarik 13th february 2020 hin Mizo (Lusei) Bible raw ti thuthang le inzawmin, Ankhasuo le Khangbor Khawtlâng ṭhuoitu, Village Authority, Vâl-Upa, HYA le HSA joint meeting nei ani, hieng a hnuoia ang hin mitin hriet ding THUPUONG (Declaration) siem a nih.

Social media, Article, Lekhabu, Sermon le ṭawngbau hai chena mi ṭhenkhatin an hril rawp hlak Ankhasuo le Khangbor khuo haiah kum 1968 lâi bawr vêla Mizo (Lusei) Bible raw a nih, ti a hril le zieka um hlak hi, keini a khaw mihai ngêiin chipchier takin, suichiengna le bawzuina (Study & Research) nei a ni a, Ankhasuo le Khangbor khuoa mihlun tak tak le pitar, putar, vawisûn chena la dam le khânglai huna HNU party-a taima taka sinthaw le la damhai a inthawka thudik tak hrietchieng a ni hnungin, Ankhasuo le Khangbor khuo, Pherzawl District, Manipur a Mizo (Lusei) Bible raw ti hi, thu bêlchieng lo, khuol thuthang le thukhêl a nih ti KHAWVÊL LE MITIN hriet dingin kan puong.

THUDIK CHU HIENGANG HI A NIH
Kum 1968 lâi vêla MNF helhai vangaitlâng le Tuiruong dunga Hmar khuo ṭhenkhata an hung huongintâu le inzawmin, Sikh Regiment ha'n Military combing operation an thaw hlak a, khawsûng mipui an sukbuoi thei hle a, Sikh Regiment lai Sawrkar CID Mizo ṭawng hmang (Hmâituom) an ṭhuoi hlak a, anni chun Hmarhai insûng a Mizo (Lusei) lekhabu, bible, hlabu le a dang dang an hmu pha MNF helhai intlungtir le lo mikhuol hlak ni dingin ringhlana an nei ta hlak a, hi lei hin Sikh Regiment (Indian Army) le Mizo CID (Hmâituom) hai lakah harsatna nasa tak le kuttum chen tuor tam tak an um rêng a nih. Chuleiin, Hmar mipuihai Sikh Regiment le Mizo CID hai laka an him theina ding ti'n Hmar National Union (HNU) Divisional Conference chun Mizo (Lusei) lekhabu, (Bible, Hlabu le a dang dang) hai dâwl a Hmar Bible, Lekhabu a thleng nisien ti a ngaituo a nih.

Hi thu le inzawm hin Tarik 19th December 1968 khan Pu Kama Sûngte ll commander. HNU kuomah Mizo (Lusei) Bible copy 8 (Pariet) a hung tlung a, Pu Darneisawng lll Commander HNU Khangbor a in ah siekhâwm a nih. Pu Kama Sûngte in a hril le a diary tarik 13th february 1969 a inziek angin Pastor Neilien, UPC Chandikhal a kutah copy 5 (Panga) a pêk a, chun Pu L. Dina, Chief of Khangbor, tuta la dam zing (ama ngêiin a hril) copy 2 (Pahni) ama ta ngêi a lâk kîr nawk a nih. Chun, Pu Darneisawng kuomah copy 1 (Pakhat) a um a, chu Pu H. Rotluong, Khangbor (ama ngêiin a hril) in a lâk nawk a nih. RAW A NI NAWH.

Chun, hi thil le inzawma mimal hming hrilsa veta um laia mi Pu Taivel lem hi chu hi thu le inzawm hin inrawlna iengkhawm a nei naw a, HNU a commander a ni bawk nawh.

Chuleiin, Ankhasuo le Khangbor khuo a Mizo (Lusei) Bible raw a nih ti thuthang hi THUKHÊL let der, thedar le hrila um rawp hlak hi Hnam, Khuo le mimal muolphona le sukhmingsietnaah kan ngai a, tuta inthawk hi thil le inzawma mimal, pâwl, hriltu le ziektu an um nawk a ni chun keini ANKHASUO LE KHANGBOR khuo mipui haiin dân angin kan khinglêt ding a nih ti kan puong.

ANKHASUO  khawtlâng ṭhuoitu aiah:
L.Huoplien
Chief of Ankhasuo,  Khangbor & Khasurvali.
1. Th.Doyamoy
2. Lalpiengthar
3.Lalrawngbawl

KHANGBOR khawtlâng ṭhuoitu aiah:
J.Neilien
Chairman Village Authority
1.Lalruotsang infîmate
2.Hrangthansang
3.Laltlanthang