Responsive Ad Slot

Indo-Hmar political talks sunzawm, Political solution um vat beisei

Saturday, June 27, 2020

/ Published by Simon L Infimate
Guwahati, June 27, 2020, Virthli(ONP): Hmar People Convention (D) in Assam rama Hmar Autonomous Council a lo ngenna le inzawma Tripartite [Centre, State le HPC(D)] Talks fe mêk hun iemanichen Covid-19 hripui inlêng leia sunzawm thei ta lo chu tarik ni 26 June 20 khan Guwahati ah put thar nâwk dinga inbiektlângna emergency meeting State Commissioner, Home & Political inrawina hnuoiah nei a nih. Hi huna hin India Sawrkar le HPC(D) Suspension of Operation (SoO) chu Assam state sûnga dingin pawtsei nâwk a nih.

Assam Indo-Hmar talks a hin Pu David L Hmar Chairman HPC(D) Assam Region, Pu Remsang Joute, Secretary HPC(D) Assam Region le Spokesperson Pu Chawnghmunlur Varte hai Assam Region Hmar aiawin an ṭhang.

Home Commissioner chun Covi-19 hripui leia inbiekna'n harsatna a tuok ani thu hrilin pawi a ti thu palai hai kuomah an tlun. Thuhma le thutlângkâwm hai ngaithlâk a ni zoin inbiekna tluontling a um vat theina dinga thil ṭûl um hai chu hril le sukfel a nih.

Ei palai haiin ''inremna um vat ta raw se'' tia an intlunna chu nguntaka hriltlang a ni zoin India Sawrkar palai hai chun inbiekna hi tuta inthawk chawl loa sunzawm pei ani ngei ding anih tiin an hrila. An hmatienga political solution a um an beisei thu an hrilsa bawk. Chun, Center Interlocutor thar ruot mêk a ni thu le MoS (Memorandum of Settlement) suk fel vat ani ta ding thu ei palai hai kuomah an hril.

Assam aiawa ei palai hai ngênna angin 2/3 nêka tam khawm a ṭûl chun 'table discussion (political) nei nghal an remti bawk. Hi le inruol ruolin HAC (core & satellite) settlement political level (Assam Chief Minister le Minister danghai) ah inbiekna um zawm pei tang a tih tiin thu sukthlûk a ni bawk.
Assam Indo-Hmar talks le inzawm hin Assam hotu hai le Hmar hnam huopa mi pawimaw iemanizat hai chu inhmu tlângna hun HPC(D) Assam Region, Assam Hmar Peace Team,  Hmar Inpui Barak Valley Region le Cachar Hills Tribe Headman Association hai inrawina hnuoiah siem mêk a nih.
Don't Miss
© all rights reserved
made with by Simon L Infimate