Responsive Ad Slot

I Tourna Hliem ~ Rengkai ICI Gilgal KTP

Saturday, June 27, 2020

/ Published by Simon L Infimate
Hla phuoktu - Pu Ngulsang
Sponsor tu - Upa D.Neithang &  Pu Lalbieksang Ruolngul
Music - James Rochullo
Recording - Ruolngul Records
Videography - Angelo Indie Films

Hi hla phuoktu Pu Ngulsang hi 1st March,1925 khan Parbung khuoa a pieng a,1947 kuma Tuolbung khuoa Pastor Thangler, Pastor Khuonga, Upa Rokung le Upa Tinsawi haiin Sandamna camp an zu nei ṭuma piengtharna chang a nih.


Pu Ngulsang hi Rengkai Gilgal Independent kohrana Independent hla phuoktu umsun ani nghe nghe a nih. Hi music video hi Pathien chawimawina ding le Rengkai Gilgal KTP in a phuoktu damlai ngeia music video hi siem ṭha a ti leia hi music video hi siem ani bawk a nih.


Pu Ngulsang a chanchin tawi

Pu Ngulsang (Ruolngulsang) hi Pu Aia le Pi Hemchong hai karah kum 1925, March 1 khan Parbung khuoah a pieng a. A hming hi a nu Hemchong a phuok a ni a. Ama hin piengpui unau pali a nei a, nuhmei 3 le pasal pakhat niin, an urengin mi 5 an nih. An unau indawt danin Ngulsang, Hriemtinchawng (Sesawng), Fimsangkim, (L) Sumtuokim, le Nghila (Tuolbung) hai an nih.


Kum 1944 khan Tuolbung ICI biekinah Pi Lienkhohnieng leh Kohran dan angin Pastor (L) Thanglerin kut insuina an nei tir a. Kum 2009 khan a nuhmei hin cancer natna lein chatuon ram a lo pan tah. Pu Ngulsang hin rila ra nau malsawmna pariet lai dawngin a nauhai chu: (1).(L) Lallienkham, (2). Upa D. Neithang (Headmaster Retired) h/o Mrs Dameimawi, Rengkai, (3). Pu Lalchawllien (Medical Grade IV retired) h/o Mrs.Kamkhawhnieng@ Hniengte, Rengkai, (4). Mrs. Thanglienkim w/o Ramnghak, Saikot, (5). (L) Darlienchawng, (6). Lalbieksang Ruolngul, ASO, Ministry of Finance, New Delhi h/o Mrs. Maryjone Lalrosiem, New Delhi, (7). Mrs. Mrs.Lalthazam w/o Lalzawmlien, Saikot le (8). (L) Lalneihlim hai an nih.


Kum 1938 khan Parbung khuo suoksanin Tuolbung ah an pem a. Ama hi a pumin mi tiet naw sien khawm khawtlang le Kohran a hai sin pawimaw tak tak a lo thaw hlak a. Thing um nawna hmunah ruo an hmang hlak an ti ang elin khawtlang le kohran ta dingin a tangkai em em.Tuolbung Lal a thi tumin ama hin Village Authority Chairman sin a chel a, adviser sin khawm kum iemani zat a lo chel a nih.

A hung tleirawl suok hlim kum 13/14 vel ani lai  khawtlangah tlangval le upahai ko khawmtu a an i hmang hlak a nih. Kum 19 mi a niin khawvel Indopui II hung inhersuokin Japan ral a hung lien a, hieng hun lai hin pawt phurah a fe ve hlak.


Tuolbung khuoa an pem hnungin khawsunga mithi vuitu ding Pastor le Upa an um remchang naw leiin mi pahni lai a lo vui ta bawk. Pu Ngulsang hi pate tak nisienkhawm silai le sapel a fe hi a nuom zawng a ni a, vawi tamtak a sa kaphai chu kohranin Krismas ruoi le Thlai thar lawmna'n an hmang hlak.


Piengtharna a chang hnungin hla iemanizata ziek ve a chuhai laia pathum chu Independent hlabu ah a chuong nghe nghe a nih. Chuonghai chu;

 1. "Hung kir ta rawh" (Independent Hla bu No. 218). Hi hla hi Japan rallien laia pawt phura fe a hung kir hnungin sum tlawmte a hung hawna, chu sum chu sukhlawk tuma khuo ramtinah thil zawr dinga a fe suok lai Kailam tlang dung a hraw laia a phuok a nih. "Duamna leiin sim le hmar l tlung a, hung kir ta rawh ka nau lungsietumtak, I Kuoma Sandamna um hin nuor san a che" ti hi a hla laimu tak chu a nih.

2. "I Tuorna Hliem" (Independent Hla bu No.172). Pathiena piengtharna a chang hnung kum 1945 vel khan hlimna revival nasatakin a hung tlung a.Khanga an hlim kha a then chun khawhri thlarau a nih ti damin sawiselna an dawng nasa em em, amiruokchu ama chun a hlimna hi iengdang nilovin Lal Isu'n a pek ngei hlimna a nih tiin hi hla hi a lo phuok ta a nih.


3. "Sinlung ram Thlaler" Independent hla bu No. 156, hi hla hi a nau upatak Lienkham a thi a, lusun beidawng a tuok laia a phuok a nih.


Pu Nugulsang hi tuhin a naupa Upa D. Neithang, Bridge Street, Rengkai bulah kum 96 mi niin a khawsa mek a. Ama hi tawngtai mi tak niin kum upa hnung khawmin inkhawm inthlada ngailo mi a ni a, thlasik dei hnuoia khawm zing tawngtai dingin biekin la pan hram hram mi a nih.




YouTube Link: https://youtu.be/waCDQjAeMmE
Don't Miss
© all rights reserved
made with by Simon L Infimate