(Nu nei lo hai hnêmna thucha le nuhmeihai hlutna)
~ John L Pulamte
Nuhmei var chun a in chu a bâwl a, nuhmei invêt ruok chun a kuthaiin a ṭhiek hlak.
(Thuvarhai 14 1&2)
Kum tina khawvêlin a lo inser hlak Mothers' day, nûhai châwimâwina nia ei lo hmang hlak (Nûhai nî) chu May ni 10 hi a lo ni nâwk dêr el ta a. Hî nî hin nûhaiin châwimâwi an phû ang hrimin châwmâwina ei pêk hlak a. Nûhai pawimawzie hrilna hunah ei hmang hlak ang hrimin, ei hei suklang ve tum a nih.
Nûhai nî hi ni ropui le lâwmum tak ni sien khawm, nu nei ta lo hai tâ ding ruok chun ni lungngâithlâk le mitthli tlâk nî a lo ni ve thung a nih. Nûhai hin châwimâwi le inpâk an phû ang hrimin, thu zieka hei châwimâwi ve hi ka'n hâwk hle a, sienkhawm chu lâi zing chun, nu nei ta lo hai ngîrhmunah ka hei insie sin leh, intîmna thlarâuin a mi man a, chu chun ka kut a khuokhir a, ka thâ a suktho naw pha sawt a, ka pâmṭhul vâng nghe nghe. Hei pâmṭhul ding hlakin nûhai châwimâwi ka nuomnain a mi tur ut ut el bawk sî leiin, nu nei ta lo hai hnêmna ni fâwmin ka tum naw dân deuin ka hung her danglam ta a nih.
Nûhai hi motor engine ang an ni a, pâhai ruok hi chu driver ang an nih. Motor engine chu a ṭha ta naw chun driver thiem ringawtin umzie a nei ta naw a, a engine a se ta lem chun driver pawimawna a um ta nawh tî thei tluk hiel a nih. Chû umzie chu nûhai bo chun motor nam lîr fâwma chuong ang mei mei hi ei nih.
A hmasa'n nûhai mi lo rimsikpuina tieng hei suklang ei tih.
Nûhai hin an mi hei rimsikpuizie chu hrilin a siek nawh. An phîng sûnga ei um lâiin, ei ṭhatna dingin damdâwi man tam tak tak le fâk ṭha ṭha an fâk a. An dû naw zâwng khawm ni sien ei ṭhatna ding a ni phawt chun an tâ dinga thil tenum khawm in-uok pumin an fâk lui a. An dû ngâwi ngâwi khawm, nâuhai hmakhuo ngâina leiin an nghei ngam a. Damdâwi kha em em chu fain, an thil ṭî ngâwi ngâwi injection (inkâp) dâm a hung ṭûl a. Operation dâm ngâi hiel khawpin nâu leiin rimsikna an tuor a, thil ṭîum tak tak chu hmasawnin, rimsikna namên lo phîng sûnga ei um lâia lo tuor ṭan an ni tah.
Nûhaiin phîng sûnga an mi vawn lâiin, ieng ang hmêl putin am ei hung suok ding, piengsuolin am tî dâm ngaituonain lungril rimsi takin thla kuo lâi hiel an mi pâi a nih. An mi pâi sûng an phîng inbêl thupna dingin thuomhnaw mâwia inbel khawm a hung thei ta naw a. Inzak dâwk dâwkin mî lâi sâ lâi an khawsa hlak. Ei pieng suok hmâin an mi lo muolphopui dêr tah tîna a ni chu.
Chuong thil po po chu pawisa suma ei thung kîr ding ni sien la, ei dam sûng khawmin rul tik nei nâwm ei nih. Ei pieng hmaa an mi lo rimsikpui po khawm kha dam sûnga ei rul sêng lo ding le ei theinghil ngâi lo ding, thil sinsie tlâk a tling a nih.
Mî nûhai angin thiemna neiin lo var zo naw hai sien khawm, hmûsit ding hi an ni nawh. Ei thiemna ei varnahai hi nûhai hnuoisienaa hmang ding a ni ngâi nawh. Annî zâra hieng ang ngîrhmuna um thei chau ei nih tî hi a hre ta sa khawmin hre nawn mawl ei tîu.
Mî nûhai angin thiemna le piengpui varna nei naw hai sien khawm, an mi lo ṭawngṭâipuina zâr le an hma lâkna zâra ngîrhmun inhnarum chang thei chau ei nih tî hi hriet a ṭha. Ei hriet lovin vawi ieng zât tawp am mittui ei chungah an lo sêng ta ding, ei hriet lovin mitthli tla pumin vawi ieng zât hiel am an mi lo ṭawngṭâipêk hlak ding. Manî ngîrhmun inhnuoizie le sietzie hi ngaituoa beidawng nachâng ei hriet naw lâi khawmin, annî chun ieng ang tawpa nasain am ei chungah lungril an lo sêng ding tî dâm hi ngaituo hlak ei tîu.
Mothers' day hi nûhai châwimâwina nî el chau khawm ni lovin, ei chunga an lungril rimsikna po po kha hrietpui ve a, ei lâinatzie suklangna dingin an thla huolna nî khawmin hei hmang sa inla a nuomum hle.
French mi ropui Napoleon-in "Nu ṭha mi pe inla, khawvêl ṭha pe'ng ka ti chêu," a lo ti hiel a. "Nûhai hi zirtirtu hmasa tak an nih" tî dâm a um a. Chun "Nu ṭha pakhatin zirtirtu 100 a hen" tî khawm a um bawk. Nûhai pawimawna hi inzâwt sêng ding an' nawh.
Nu nei ta lo hai khawm Mothers' day hi mitthli tlâkna chaua hmang tum bîk naw inla ka hei nuom tak zet a. Nû taphawt hi nu inhnarum le nu ṭha an ni vawng chuong nawh. Nu uiret chîng le inrui thei thil chîng mî dâm tam tak an um ve tho a nih. Chuonghai chun an nâuhai an sukbeidawng a, nu nei lo hai chen dâm an inhnar pha vawng vawng hlak a nih.
Nu neihai nêkin nû nei ta lo hai hi kawng iengkimah an ṭhang lâk a na bîk a, ruol elna khawm an nei lien lem a, mi dang chunga innghat lo a, mania ngîr tum tlatna lungril khawm an nei lien lem bawk a nih.
Nâufahrahai hi fahra rinumzie a takin an hriet a, an fahra chanpuihai ngîrhmun hrietthiemna khawm an hau bîk a, hmangaina khawm an hau bîk a nih. Chuleiin nû pawimawna hi an hriet chieng a, pasalin nuhmei duot khawm an thiem pha a, nuhmei ruok chun nâu nuhmei hlutna an ngâi pawimaw bîk.
A tâwp taka dingin; nu nei lo ni inla khawm, a ṭhen chu nû dâm la hung ni'ng ei t'a, nâu nuhmei nei ding dâm ei la ni pei bawk a. Chûleiin Mothers' day hi ngai thâ nâwm ei nîu a, chuong nêkin sukphuisui deu deu tum lem ei tîu. Nûhai hi khawvêl siemtu an ni a, chuleiin nû a dam chun khawvêl khawm a dam ding a nih.
Nû pawimawna hi hre tharin, nû la hung ni ding nuhmei hrim hrim chu hlutsakin, inzâna pe'ng ei tîu.
