Singer: Lalparzo Sanate
Words: Lalparzo Sanate
Tune: Bobby R. Songate
Music & Record: Zaia Valte (Green Studio)
YouTube Link: https://youtu.be/nmBgeKheL4s
CHÛNNU
1. Kanun hi fahra le rethei taka in ngai in,
Thlasietna le beidawngna tamtak tuorin,
Hringnun hmangin um hlak langkhawm,
Kanu mi hmangaina kadawn changin,
Thlamuong maktak kanei hlak.
Nu, kata din ilo va hlu ngei,
Nang chun sula inthawk mi vawnin,
Hmangaina leiin rinum tamtak tuora mi chawilien in,
Lalpa mi hmangaina thu mi hrilin,
Ka damna thu imi kawk hmu hi, kalawm ngei, kalawm ngei ie,
Kalawmna ka puongseng nawh aw...kanu.
2. Nitina kata dinga i țawngțai na leiin,
In palthlûk theina tamtak laka hai khawm,
Lalpa vênghimna chang peiin,
Taksa le Thlarauva in țhanglien in,
Malsawmna tamtak kadawng hlak.
3. Hmangaina hlutak in neitirtu che LALPA chu,
Hi khawvel ahin chawimawi in um sienla,
Ama chun i hringnun țhuoi in,
Hnuoi malsawmna, Vân malsawmna hai le,
Thilțha tinrêng pe rawse che.
Bridge:
I lungzîngni chun Lalpân dawn rawse che,
Jacob Pathien chun hmun insang ah dawmkai sien che,
Hmun inthienga inthawk chun țhangpui na tirpek sienla che,
Zion a inthawk chun sukhrât rawse che,
I thil inhlân popo chu hrezing sienla, i pumrawhmang thil inhlan chu lawm rawse, i lungril ditzawng chu pephal sienla che, i remruot popo chu in hlawtling tir rawse che.
>>
Ka chînlai ka nu le ka pa an ințhe a, naute ka ni lai ka nu'n ami zampui a, kum 5 mi ka ni-in ka nu'n pasal dang ami neisan a, ka nu'n Pasal dang ami neisan phingin ka pa ha'n an mi hung țhuoi a, ka pa hai kuomah ka um hnungin ka nu ka ngai thei em em a, kum iemanizat chu inhmu lo le inbiepaw theiloin kan um a, hun hung fepeiin, phone hmangin ka nu leh kan hung inbiek paw thei tah a, Pathien zarin a tak ngeiin kan hung inhmu thei nawk tah a, ka nu chun Pathien kuomah nitin ami țawngțai pek hlak thu hai ami hril a, ka thla a muongin ka lawm em em a, kei khawm ka phâk ang tawk le Lalpa'n kawt ami hawng pekna angpeiin rawngbawl a hai suokin, ka phulo malsawmna tam tak ka dawng tung pei a, chuong hai popo chu Lalpa Pathien zar ani lai zingin, ka nu mi țawngțai pekna zar ani zie hriein, Pathien le ka nu chungah ka lawm em em a, ni dang chu Mother's day hi ka țap ni ani hlak a, sienkhawm Thlarau le Taksa ah puitling peiin, Pathien mi țhuoi dan ka hrietthiem tah peia, chuleiin, thi hnunga inchawimawi nekin, damlai ni a in chawimawi hi hlu ka tiin ka ngaipawimaw lem a, ka nu leh umhmunkhat theinaw inlang khawm, ka nu mi țawngțai pekna leia malsawmna ka dawng hai le ka chîn laia ami'n rimpuina hai ka ngaituoin ka nu chawimawinain hi hla hi kum 2015 khan Mother's Day Gift in ka lo phuok khum a, ama khawm a lawm hle a, buoina hran hran leiin a video khawm ka la siem theinaw a, tuta țum Mother's Day khawm hin ka nu ka chawimawina le ka hmangai zie suklang nawkna dingin, Lyrics Video in ka hung siem a, Pathien in rem a ti chun a video khawmin kala siem tum bawk a nih.
Hi hla lo ngaithlatuhaiin nu hlutna hrie a, nu neihaiin, in nuhai in thei ang anga chawimawi ding le nu Petu cheu Lalpa kuomah lawmthu hril mawl mawl dingin ka ditsak cheuva, chun, nu nei talohai khawma, hnuoia ei nuhai neka mi hmangaitu Lalpa Pathien ei nei a nih, ti hrie a, hlim taka Mother's Day hmang seng dingin ka ditsak cheu.
Ngaithlatu hai popo Lalpa'n malsawm seng raw se cheu.
- Nk. Gladys Lalparzo Sanate
