Responsive Ad Slot

MIHRIEM THILTHAWTHEINA A BO MÊK

Wednesday, April 15, 2020

/ Posted by Simon L Infimate
"Mi var varna chu sukbo hmang ka t'a, remhretu remhrietna chu pei thla'ng ka tih,"
(1 Korinth 1 : 19)

~ John L Pulamte

Vânkhup hnuoia hin Pathien thil siem tinrênghaiin tâwp hun an nei seng a. Amiruokchu mihriem thiemna/varna ruok chun tâwpintâi a nei nawh.

Mihriemin a dit dân le a nuom dân dânin ro rêlin rem ruot hlak sien khawm, thutlûkna siemtu ruok chu Pathien tho a nih. Mihriem thiemna chun Vân tawng rak sien khawm, Pathien remtîna naw chun ieng thiemna khawmin thilthawtheina a pâi naw a, iengma lo vawng a nih. Thiemna thlâwn el, iengma lo vawng a nih.


Mihriem thiemna hi nî tin, dârkâr tin, minute tin le second tinin tâwp intâi nei lovin inṭhang lien deu deu peiin, châwl lova thil thar siem suok zut zutin um zing sien khawm, lungawina, thlamuongna le nun châwl hâdamna thurûk ruok chu a formula hmû suok tik um naw nih. Mihriemin Pathien thû nêka ei buoipui lem, iengkim thaw thei ang tluk hiela ei ngai tangka sum hi nei râwn deu deu inla khawm, lâwmna le lungawina hun tâwk mi pe chuong naw nih. Pawisa hlutna a bo mêk.


Khawvêl intlânsieknaa insâng tak chu, râlthuom nei ṭhata in-elna hi a ni a. Hî inruolsieknaa a hma ṭhuoitu tak le a chunghnung tak chu khawvêla thil thaw thei taka ngai an nih. Râlthuom mak le ṭibaium tak tak el chu siem suokin a hung um pei a. Mihriem kutsuok el, hringna nei lo khawm ni sien, thal mit nei le ngaituona thluok nei ni âwm hiela thil thaw thei, mihriem inbîk rûkna hmun chen khawm zawng suoka bitum chat chat thei khawpa râlthuom thil thaw thei dâm chu siem suokin a hung um ta pei a. Chuong tawpa râthuom nei ṭha ni ta inla khawm, mihriem hringna hum thei pakhat khawm siem suokin a la um naw a, um ngai bawk naw nih.


Ei Pathien thûin, "Mihriem thiemna le remhrietna chu la la hmang ka t'a..." a tî kha a tlung indik mêk zing chu a ni ta hi. Rambung ṭhenkhata chu tangka sumin damna tak tak a mi pêk thei nawh tî hrein beidawngin an pawisahai chu lekha ṭha lo ang elin hnuoia an thê chek êi uoi a. Khawvêl ropuina hin thlamuongna le lâwmna famkim a mi pêk thei nawh tî hrein, mi tam tak chun Pathien bêl nachâng hre lo le an thlarâu fena ding chu ngaituo dêr lovin manî le manî hiel an inthat a. A pawiin a râpthlâk em em el a nih.


Pawisa sum ringawt hi ei dam san ni âwm hrimin mi tam tak chun hringna nêkin ei ngai hlu lem a, ei hmû theina ding a ni phawt chun tuolthat khawm ei pawisa ta naw a, mi ṭha deu hleka ei lo ngaihai khawmin mi hlêm hlum ṭhak khawm an pawisa ta bawk nawh. Pathien nêka ei sie chunghnung lem a lo nî tâk leiin, Pathien hminga tuor le chân ngam lo hai khawmin, pawisa leiin manî hringna chen khawm ei inhlân ngam ta hiel a nih. Pathien hminga tuor ngam sî loa kohran pâwl hminga martyr chang ngam nâwk sî ang hi a ni âwm. Ei nasa. Ei nâ khawm la sâ pei bawk a tih, ben hara ei um hmâkhat chu. Ben har thei la ni lo rawp hai chu ben hlum khawm la tuok pei ei tih. Coronavirus hi Pathien mi ben har tumna ni naw nih tu am ti thei? Hi taka la har suok zo nawhai chu mi ngaituo-um tak ni'ng an tih.


Einî nêka hnam ropui le changkâng lem haia inthawkin thil hi inchûk dawk tum ei tîu va, har suok zâi rêl ei tîu khâi. Pawisa sum hi lungawina le lâwmna mi pe theitu, ei mamaw po po mi phuhrûkpêktu ni sien la beidawngin tu'm inthat that an t'a? A sum hau hau hai hi an ni lem el ta naw maw tûlaia beidawnga manî le manî inthat inthat el ta hai hi?


Khawvêl thiemna a bo mêk ruol ruolin khawvêl lâwmna khawm a bo ve mêk zing bawk. Thiemna hmanga mihriem hringna hi hum thei ni ngai naw ni a, pawisa sumin thlamuongna le lungawina inchâwk thei a ni bawk nawh.Thiemna le varna a'n sâng deu deu pei ruolin, thilthawtheina ruok chu thlâkhnuoi tieng a lo pan ve mêk thung. Khawvêl thilthawtheina a bo mêk. Khawvêl hâusakna le ropuinahaiin zuol tieng pan pei sien khawm, lungâwina le lâwmnahai ruok chun rê tieng an pan pei. Khawvêl lâwmna a bo mêk.


Krista chau hi damna le lungâwina famkim chu a lo nih. Chu chu khawvêlin a hriet suok huna chu a lo inhnu se let dêr el ta âwm si a. Sienkhawm a la'n hnu nawh. Tûhi hun ṭha le hun lâwmum chu a nih.

Lalpa'n a thû mal mi sâwmpêk raw se.
Don't Miss
© all rights reserved
made with by Simon L Infimate