Responsive Ad Slot

LOCKDOWN 3.0: WHAT AFTER MAY 3?

Wednesday, April 29, 2020

/ Posted by Simon L Infimate
1. THUHMATHUOI 
 
COVID 19 natna leiin khawvel mihriem 2,11,609 in an hringna an chan tah. COVID 19 natna leia hringna chan India ah mi 936 an tling tah. Pathien zarin ei vangnei bik. Lawmthu hril senglo malsawmna ei dawng zing.


2. JNCASR-BANGALORE PROJECTION: 

Jawaharlal Nehru Centre for Advanced Scientific Research, Bangalore in projection a siem danin tuta lockdown 2.0 hi May 3 khin ei suktawp thut chun:

A. May 6 khin India ah mi 3,258 in hringna an chan el thei a nih.

B. May 12 khin mi 10,924 in an tuor el theia.

C. Chun May 19 khin mi 38,220 in an hringna an chan el thei bawk.

Chuleiin, tuta lockdown 2.0 hi la sunzawm ei tiu tiin JNCASR haiin projection report an lo thelut tah.

3. 4th PM-CM MEET 

Ei PM le CM haiin vel li lai lockdown thil ah meeting an lo nei tah. Lockdown suktawp dan ding le COVID 19 natna laka invenghim zing thei dan ding lampui an lo daptlang.

State tamlem hai ngaidan hieng hin zuk tarlang ei tih:

A. Orissa, Meghalaya le Goa chun lockdown 2.0 hi May 3 zova khawm extend an la tum.

B. A dang povin lockdown 2.0 hi damte te a suktawp an nuom thu an hril.

May 3 zo tieng khawm hotspot area a chu tuta strict ang hin la strict sunzawm pei an nuom seng. Hotspot a inthawka 5 km radius huomsung popo la strict an nuom. Vuongna, rel le public transport  chu la chawl hai sien pawi an ti nawh.

Amiruokchu, rambung anga ei ngirsuok theina economic activities a tamlem hai hi keihar vat an nuom thu state in sawrkar thlungpui an hril.

School le college hai khawm hawng vat dan lampui dap tha nawk inla an tih. Mipui pungkhawmna hmun hieng bazar le biekin, masjid le temple hmuna hin strict zing an la nuom thu an hril. District puotienga suok phal la ni naw sien, an tih.

Amiruokchu, district sungah private motor hmanga tlanlawn thei ni sien an tih. Mask le social distancing hi mandatory sien la, a zawmnawtu chu Police in jail ah khum el hai sien an nuom thu an hril.

4. LOCKDOWN 2.0 

Khawvel a lockdown thenkhat hai zuk tarlang ei tih:

A. China

China ah lockdown 77 days an lo thaw, January 23 a inthawk khan an lo tuor. Mi 4633 chau an thi.

B. Italy

Italy ah 57 days March 8 a inthawk khan an lo nei. 26,977 an thi.

C. Spain

Spain ah 57 days March 14 a inthawk khan an lo nei. 23,521 an thi.

D. France

France ah 56 days March 17 a inthawk khan an lo thaw. 23,293 an thi.

E. India

May 3 chen tiemin India ah lockdown 2.0 40 days, March 25 a inthawk khan ei nei ding a nih. Mi 936 an thi tah. Ei record a tha hle.

A chung inthawka suidawk thei chu

A. 57 days chau lockdown-na hmunah mi tamtakin an hringna an lo chan.

B. Amiruokchu, China ah 77 days an lockdown leiin a thi 5,000 an tling nawh.

India sawrkarin lockdown pawimawzie nguktakin a ngaiven zing a. Chuleiin Lockdown 3.0 khi "Smart" Lockdown a ni el thei, titu ei tamlem.

COVID 19 leia ramdang hai tuordan en chun, ei sawrkar hmalakdan hi inpak a um hle. Lockdown ei tan inhnu met a chu, ei lo strict rak lei khan vawisunni chen hin a thi 1000 an la tling nawh.

Ni sawmli chau lockdown hnunga May 3 khin suktawp hmak ei tum a ni chun, JNCASR hai projection khi a takin inchangpal a tih ti inlautu ei pung zing.

Chuleiin sawrkar in thawk le khatin lockdown 2.0 hi May 3 khin a suktawp vawng ring a um nawh. Amiruokchu, lockdown exit plan thatak induong tum ngei a tih. Chu taka chun state ngaidan rawllut a tih.

5. EXIT PLAN 

Dawnril mi thenkhat chun May 3 zo tienga Lockdown 3.0 khi phase nga a the ning a tih, an tih.

An hisap dan a hnuoia hin zuk tarlang ei tih

A. Phase 1 

Hi phase hi May 4 a inthawka May 10 chen khi a ni el thei. Green zone ah lockdown rules tamtak inthlada ning a tih. Anachu, state tinin lockdown 3.0 Rules siem an tih.

Hi hun sung hin kum sawmpahni chungtieng in mask le social distance an zawm zing tul a tih. Public le student pungkhawmna hmun chu an lan thla zalen ring a um nawh. Chun state puotienga suok an la phal ring a um bawk nawh. Public transport an la khar ring a um. School, college le university la khar an tih.

B. Phase 2 

May 11 to May 17. Hi hun a inthawk hin repair shops, non-essential dawr phase 1 a la khar hai hawngsa ning an tih. School le college hai khawma summer vacation chawl an nei hman ring a um.

C. Phase 3 

Hi hi May 18 to June 7 hun sung a nih. School, college le university an hawng tum ring a um. Amiruokchu, disinfectants, soap le water an ngai thupui ring a um. Small group class system nei ding an ti el thei. Mask le social distance uluk an tih. Private transport khawm an phal ta ring a um.

D. Phase 4 

Hi hi June 8 to August 30 sung ning a tih. Public transport an hawng hman ring a um. School, college le university class khawm a regular hman ring a um.

E. Phase 5 

Hi hi August 31 zo tieng khi ning a tih. Malls, bars, bazar, market le public gathering phal ni tang a tih. Public transport hawng vawng tang an tih. Nundan pangai ei hung hmang nawk ta ding a nih.

Amiruokchu, COVID 19 natna le inzawma May 4 a inthawka inkaihmat dan inkhina National Risk Assessment Index (NRAI) en peiin lockdown exit plan hi sawrkarin a la sawidanglam pei ring a um.

6. THUKHARNA 

Karnataka chun green zone ah lockdown 2.0 an inthlada tah. Mall chu an la hawng chuong nawh. Mask le social distance tieng an uluk.

Kerala le Orissa khawma licensed dawr an inhawngtir tah. Mask le social distancing an thupui zing tho.

Bangalore khawpui hmun thenkhatah saloon, electric rawmrawk zawrna, computer le mobile dawr an inhawngtir tah.

May 3 zo char khin state tinin an student le sin thawa fesuok labourer le damnaw lockdown leia puotienga la chambang hai inter state movement chungthu an ngai pawimaw hle ding a nih.

Public health le running economy hai pahni hi indiktaka chawkpawla a telpui damsuok thei dan ding ngaituo zingtu sawrkar hin May 3 khin SMARTER LOCKDOWN EXIT STRATEGY a puong ring a um.

-Ziektu

Dada le Jojo-Pa,
Hmarkhawlien

28.4.2020

Don't Miss
© all rights reserved
made with by Simon L Infimate