Responsive Ad Slot

EI HRIET NAW LEIA EI ṬI NAW?

Monday, April 6, 2020

/ Posted by Simon L Infimate
~ Jr. Amo

A hming khawm ti ṭhem ṭhum el, a ziek le a lam tam takin an thaw fuk thei der lo. India ram hluotu vai tam tak hai lem chun a hming an thawfuk thei der lo hripui - Coronavirus, Covid-19 ti a WHO in hming a lo pek ta le tam takin CCP virus an lo ti ta hi ei hriet naw lei chaua ei zuom a hawi. Rambung hmasawn tawpkhawk, a ni ang hrima khawvel rambung hai po po chunga thuneitu a insal US President Donald Trump khawma a cho suol leia vawisun hin thaw ding tam tak nei hai sienkhawm mihriem thi zat tiem chu an sin pui tak pakhat an chang tah!



Hripuiin khawvel a hung fang ṭan ti chieng taka an lang ta hnung le US a khawm an vawi an um zing ta hnung March châwlkâr khatna chena khawm khan Trump chun a theina le a office suongin iengkim thaw theitu le hneban theitu anga an ngaina chu a la chel ṭâng ṭâng a nih.

US hi Covid-19 ṭi naw pawl ram, a zuom pawl tak ni mei a tih. Ama lem hi chu a nei le a theina hai enin hripui cho khawm awm hrim a nih. Nisienkhawm, a cho ringawta chu Covid-19 chun America hi ieng ang rambung a hrat hrim amani ti ni awm takin a khup a thalin a sawihning zing chu a nih.

Chuong ang chara tuor ve tu - Italy le UK hai khawm an huoisen (huoisenna indiklo) em leia an tuor a zuol a nih ti inla an khel lien ring a um nawh. Hrildawk kher naw hai sienkhawm tuhin chu an lungril ruk takin, "ei lo cho suol deu a ni ie maw" an ti nuom ta ka ring. Hripui nekin an mimal zalenna le ropui lema an inngaina a lien lem a, vawisun hin a ra an siek ta zing ti ei hmu seng.

Hi hripuiin India a hung bâwm ṭan tak tak ding tawm khan Article pahni - Hmar le sapṭawngin insawi deu ṭutin ka lo ziek ta a. Pawimaw ka ti em leiin tuta ṭum hin ka hung ziek nawk a ni, ka la ziek nâwk pei khawm ka ring. Tuta ṭum chu a sei zâwnga ṭhang khaw ka tum nawa, amiruokchu, tet den deu awk a, inrum ṭal a hung thlak tum ka nih. Ka thawfuk dim!

Hi hripui hi ṭi a umna tak chu, thlierbik nei ṭhak lo, a pieng hlima inthawka tar kawngkawi, ram pase tawpkhawk le hausa tak hai khawm indawina ṭhang der loa man le sawi tu a nina hin ṭi a um zuol a. Ei ni rawi, keru thliek le kut ru thliek hai khawm la enkawl dam mumal ṭhat thei nawna rama ding lem chun tlansiet san thei nisienla chu a cho khawm cho loa hla taka zamhmang san dai ding chi lem a nih.

Ei rama innghatna ding a um ṭhak nawh, in nghatna thlak thiemna le hmangruo ei nei der naw lei hin ei ni rawi chun a cho khawm hi cho sin tum dal ding a nih. Ngam a um naw bek bek!

Ei ram sunga hin hung inleng pal ta sien chu ei Hospital hai chu mithi um zat inchikna chaua ei hmang ṭangkai ding a hung nih. Nghaisan bo, ei hmangruo neisun chu insunga in kal khum a nih. Chu chu ti loah, ei iring Pathien hril ngailoin a um.

Mi ringna ka sawisel tum lem chu a ni nawh, kulmut tam tak ei um ve. A ṭhen chun inkhawm ei tawpsan hai chen an sawisel nasa hle ti khawm ka lo hriet ve ṭat. Pathien hin nuompawnga a mihai hi a hum vawng el a ni ngai nawh, an sie le ṭha hrietna a pek hai hmang dingin a fie ve hlak. Ni naw sienla chu, sie le ṭha hrietna kha lo in nei tir kher loin sun le zanin lan pawlpui zing a ta, kawng iengkim tak meua mihriem hai hi a mi la umpui el thei. Chu lem chu chu, ka ngairuotna chau a nih.

Vawisun a khawvelin "super spreader" hming anbuk South Korea a inthawka Nizamuddin hai chenin sakhaw hmunpui an la ni ti hi innghil lo ṭhang a tih. Thina ngam tak tak ei um nawh, Isu meu khawm a hun tawp a tlung ding meu chun a thlan thisen (angin) a far hiel a ni kha teh! (Luka 22:44) Pathien naupa Isu neka huoisen lem ei ni lai ei um ring a um nawh.

Hi hripui hi a ṭhen chun ṭi a um nawh, a thi rate khawm an hnuoi an tih, mithiem hai khawma a ti an um. Anachu, ṭi a umna tak chu, sungkuo a keiṭhe a, inhmu nawkna chance um ta loa hringna a lak pei theina hi a ṭium na chu a nih. "Mangṭha raw" in ti na hun khawm siem pek loa an vawi hai chu khawvel hmua inlang nawk ta lo ding anga a sie an ni a, vangneia damsuok haiin khawvel le an sunghai an la hmu nawk thei a. Vangduoina chang tam tak hai an sunghai chun an inhmu tawpna ngaituo in hun an hmang liem sawng el a nih.

Hla dit tak le Bible chang thlangna hun khawm a pek hman le...! Nel chu a va zuk um naw vang vang de e!

Thlang ram le rambung ṭhenkhat a hai chu kum upa tieng deu hai a thaw nasa an ti a. Amiruokchu, ei ram India a chu a thaw inruol tlang puot a. ṭhalai khawm a tâwk nasa hle el. Chu laia chun, India hi natna invawi hai zawngna test thaw in hnuoi pawl tak, a mawngdapa um a ni a. Test loa invawi hi an um a ni chun, thawk le khatin tam takin la thi phang ei tih, a ni naw chun ei vangnei hle.

Hi hripuiin a nuoi nasa pawl tak laia mi pakhat Italy hai Prime Minister Giuseppe Conte lem chu a bei a dawng hle a, law ngaina a hriet ta naw a. Hnuoi beiseina le theina hai po po chu a thlawn vawng tah, beiseina um sun chu chungtienga inthawk a ni tah a lo ti hiel. Italy hi khawvela healthcare nei ṭha pawl tak laia mi ni phak ve ngat a nih.

Italy a hin mihriem 13,915 neka tam an thi ta a, Spain a hin 10,935 neka tam an thi ta bawk. India khawm nitinin ei kaitung zar zar peia, hripui mi nuoi tak tak na ding lampui ei hraw chu a la tluong tung zar zar a. Ei che fuk naw vai chun a chunga ka hrillang hai ei phak hun chu aw sawt naw nih.

Ei ni rawi lem chu, ei seilien dan hrima khawm in pan duol duol hlak hnam. Lungngai le lawm huna a hawna in pan a, in tuorpui - in lawmpui hlak hnam. Ruol ngaina hnam, pansak panthlang, tuolbâwm le chawrsang hai le dai kei awnga infepaw hlak hnam. Bu le hme in thur hlak hai ei ni a.

Ei rama hlak chun, hripui symptom inlang chieng hlea ringhla naw hai chu test an thaw mei mei si nawh. Thaw ding hrim ni inla khawm a tam lem deu thaw hai test thaw thei lo ngirhmuna um ding ei ni nâwk a. Sawrkar thlungpuiin lockdown a puong ta hnung khawma khawsunga ei in pan le inhmukhawm hai bansan lo ei la ni tawl zing.

A chu hril tak lovah! Tuol suok lo dinga ei dam le himna dinga sawrkar meuin a puong ta hnung khawma awi nuom loa, tuol suok an um chun ti a, mihriem suok le suok naw enkaitu dinga volunteer hai chen in siem ngai hielin ei la hang um ta deu deu.

Ei dam le himna ding chau ni loa, khawtlang le khawpuite a khawsa mihriem hai an him ve theina dinga ei in khum a ni a. Hi natna hi ṭi a um talawa, khawvel sawrkar thilthawthei le mithiem hai khawma a law ngaina hre lova a damdawi umsun le invengna um suna an la hriet chu mani inluma in khum a mi dang le in paw lo ti hi a la ni hri.

Hieng lawm lawm a hripui ṭibaium, mihriem hringna a singtel suot mek le la suot belsa pei tu hi ei la tuok ngai naw leia ei ṭi naw am "EI HRIET NAW LEIA EI ṬI NAW?" Mi sang tam tak thina dinga mawphurtu I ni thei ang hrimin ina in khum khan sang tam tak hai ta dingin damna le muongna intlun thei bawk a nih ti hi ei hriet thar nuom a um.

Amiruokchu, sawrkar le thuneituhai thu ṭha taka ei awi a ni chun hi hun harsatak hi ei paltlang ngei ding a nih.

Kumpinu (Queen Elizabeth II) in ni tla seng lo rama cheng hai ta dinga thucha a siem hin suktawp ka tih - Ni ṭhalem hai chu ei hma ah a um. Hi hripui hi ei hneban ngei ding a nih, ei ruolhai le ei sunghai leh ei inhmukhawm nawk ding a nih. Tu hri a ding chun ka ditsakna insâng tak kan hlan hri cheu.


Dâwrkâwn
April 6, 2020
Don't Miss
© all rights reserved
made with by Simon L Infimate