COVID-19 le inzawmin HSA in Fielna le Ngênna a siem

Fielna le Ngênna

HSA/GHQ/I&P/2020/05, the 6th April, 2020

India ram chau ni loa khawvel huopa hripui ṭibâium tak Covid-19 inlêng leiin India ramphêka ni 21 sûng (March 24-a inthawk April 14 chen) khawser (lockdown) puong a ni a. Inchûkna hmun po po khara umin, lockdown zo hnung khawm hin inchûkna hmun hâi hawng hun ding hi hril thei a la ni nâw ta rawp a. Inchuklâi hai hma sâwnna ding nasa takin a kei châi pha ta a nih.

Hmar Students' Association, General Headquarters chun mâkmawa a ramphêka inchûkna kei châi a ṭûl hi pawi a ti tak zet. Hi le inruol ruol hin Hmar inchûklâi hâi chun hî khawser hun sûng hi TV le Mobile Phone hâia film enna le mobile games hâi inhnelnaa hmang a, hun khawral mei mei el lo dingin ei inngên a. Lockdown hi ṭangkâi taka hmang a, ralkânga inchûk theina hieng online class & courses, YouTube etc hâia inthawk inchûkna hi sunzawm pei ding le nû le pa hâi khawmin nau hâi infûi le thunun tlat dingin ei infiel tak meu meu a nih.

Covid-19 hri inlêng leiin World economy nasa taka tla hnuoiin fâk le dâwn le thil man hâi nasa takin a kâi sâng ding niin â'n lang. Inchûkna le inzawma khawpuia in hluoa um le mânî ina chêng mêk Hmar student hâi le mi tinin sum le pâi hmang dân thua fîmkhur nâwk zuol a, mamaw tawm tawm thil hâi thlier thiem a inchaw ding lê, sum hmang dân thua ei inren thiem a ṭûl bawk ding a nih. Hieng lâi zing hin lo neitû le huon neitû hâi khawma nasa nâwk zuola țhang la a, thlâi le bu le bâl tam tak ei inthar suok a ngâi bawk a nih. Hmun le ram nei hâi khawmin mânî ram le hmun hâi țangkai taka thlâi chîngna hâia ei hmang chun nasa takin ei hlâwkpuiin sum tam tak ei hlêp thei ding a nih.

Mi tam takin Covid-19 hi invawi a, an thîpui tâk hnunga hi natnâ'n eini Hmar hâi a mi kâi ve ta ti thu thang hriet ding a la um nâwna thua Hmar Students' Association chun Kohran nû le pâ lê sûngkuo tin hâi chu Pathien kuoma lâwmthu hril a, hi hri lênga inthawk ei fihlîm pei theina dinga ei ibiek Pathien hi hnâi nawk zuol sau sau ding lê, hi natnâ'n inkieng zâi a rêl theina dinga mâni in lum chita Pathien lo hang buon nâwk zuol sau sau dingin ei infiel thar a nih.

HSA dam zing raw se.

Inchûklâi hâi ta dinga in thâwpui,

Sd/-
Lalringsan Darngawn
Secretary, Info. & Pub.
Hmar Students' Association
General Headquarters