Responsive Ad Slot

COVID 19 NATNA A NA HMASATAK HAI

Thursday, April 23, 2020

/ Posted by Simon L Infimate
1. Patient Zero

China sawrkarin COVID 19 natna a na hmasatak "Patient Zero" hming le address chiengtakin an la suidawk thei nawh.

Amiruokchu, natna hriet lova insawisel hmasataktu chu November 17, 2019 lai daia hriet an tah. Hi mihriem hi sa zawrna hmun Huanan sea food market ah a fe ngai nawh, ti pawl an um. Huanan khuo a rannung bazar an ti hi coronavirus in bak a inthawka saphu annawle saphu a inthawka mihriema a kaihmatna hmun ni ngei dingin tamtakin an ring.

Amiruokchu, COVID 19 natna ni dinga ring damnawna a thi hmasatak kha pasal a nih. Sa zawrna Huanan sea food market a fe ngun a nih, ti pawl an um bawk. Hi pa hi ni sari a khuo a sik a. An khul a re thei ta naw leiin hospital ah admit a nih. A nuhmei khawm a lo kai hman a. Traditional Chinese medicine le Lopinavir le Ritonavir sukkawp damdawi an zuk pek a chu a thawk chuong nawh.

2. Hubei Provincial Hospital

COVID 19 natna hri inlengna hmunpui Wuhun khawpuia damnaw hai in-admit-na sawrkar hospital kha Hubei Provincial Hospital a nih. Hubei Provincial Hospital a in admit hai kha COVID 19 natna a na hmasatak hai an nih.

Dec 26, 2019 khan natna hrietlo damnawna chikhat a damnaw mi pali Hubei Provincial Hospital ah admit an ni a. Pali laia pathum hai chu sungkhat an nih. Doctor an pan hmasatak kha Dr. Jhang Jixian a nih. Nuhmei doctor a nih.

Dr Jhang Jixian hin X Ray a thaw tawl a. Flu le pneumonia natna a na an ni nawh, ti a suidawk a. Chun an chuop a lo danglam hle tah ti a hmusuok bawk. Anachu, an natna tak hi a hriet bik nawh.

A zingah damnaw pathum hi hospital a hin an in admit nawk a. An chuop a lo danglam ve. Hieng damnaw pasari a pali hai hi sa zawrna Huanan sea food market a lut ngun hai an nih.

Dec 29, 2019 khan natna hrietlo a na chu hospital insanglem ah refer pei ta dingin Hubei Provincial Hospital chun thuthlukna a lo siem ta a nih.

Dr Jhang Jixian a medical report kha COVIT 19 natna le inzawma medical report hmasatak a nih.

3. Wuhan Jinyintan Hospital

Hubei Provincial Hospital a inthawka hla raklo ah Wuhan Jinyintan Hospital a um a. Kum 2019 December thla tawp khan hi Hospital a hin COVID 19 natna a na damnaw sawmli pakhat admit an nih.

December 31, 2019 chen khan China ah COVID 19 natna a na mi 266 an tling tah.

Natna hrietlo a na Wuhan Hospital a in admit hmasatak sawmnga le pakuo laia sawmli pakhat hai kha hospital ah tha taka enkawl an nih. Hieng damnaw 41 positive hai lai hin pasal 30 an um a. Nuhmei 11 an nih. Kum 25-49 kar mi 20 an um. Kum 50-64 kar 14 an um. Naupang an um nawh.

Damnaw 41 a 27 hai hi sa zawrna Huanan sea food market a fe ngun hai an nih. Damnaw 13 hai ruok hi chu sa zawrna ah an va fe ngai nawh.

4. Jinyintan Hospital a COVID 19 a damnaw hmasatak sawmli pasari hai

COVID 19 a na 41 lai hin Diabetes a na 8 an um a. Lung tieng tha lo 6 an um. Biri hawp hlak 3. Liver tieng sawiselna nei pakhat a um bawk.

COVIT 19 a na hmasatak 41 haiin an doctor pan hai kuoma an thil intlun hai zuk tarlang ei tih:

1. Khawsik 40

2. Inkhul ngun taluo 31

3. Inthuok harsa titu 12

4. Pang lum (Temperature 39 degree neka insang) 14

5. Pang lum (Temperature 38 le 39 inkar) 18

6. Sawl taluo 18.

Wuhan hospital doctor haiin CT scan an thaw a. Damnaw hai chuop chu a lo derthawng hle ti an suisuok. Chuleiin enkawl an nih. Amiruokchu, January 22, 2020 khan paruk an thi.

Hospital a inthawk mi 28 suok hai sien khawm January 24, 2020 khan COVID 19 a na mi 835 an tling hman. The rest is history.

Courtesy: The Lancet, etc.

-Lakhawmtu

Dada le Jojo-Pa,
Hmarkhawlien

23.4.2020


Don't Miss
© all rights reserved
made with by Simon L Infimate