Responsive Ad Slot

A THO NÂWK TAH (Easter Sunday thucha)

Sunday, April 12, 2020

/ Posted by VIRTHLI
~ John L. Pulamte

"Ṭi naw ro. Isu Nazareth mî, an hemde kha in zawng a ni âwm. A tho nâwk tah..."
(Mathai 16 : 6)

Mihriem hringnunin a thil tawng laia thil beidawngthlâk tak le nun sukrinumtu tak chu thîna hi a ni âwm e. Mihriem mitthli sukthla râwntu tak khawm a ni bawk.

Natna le harsatna tam takin a sukṭap thei lo hai khawm thîna bawk hin a sukṭap nâwk hlak. Mihriem tukdawl zo lo le sukbo thei lo khawm thîna bawk hin a rêl fel nâwk hlak. Thîna chungchâng thû ringawt hi phêk tam inzâwt ding a um a nih. Amiruokchu tûta ṭum chu tho nâwkna tieng ei thlûr bing tum a nih.

Ran le mihriem ei inang nawna tam tak laia pawimaw tak pakhat chu, mihriemin Thlarâu ei nei a, ran ruok chun an nei ve naw hi a nih. Mihriemin Thlarâu ei nei hi ei vângneina tak le ei vângduoina tak pakhat a nih. A piengtharhai tâ dingin ei vângneina tak a ni a, a piengthar nawhai tâ dingin ei vângduoina tak a hung ni nâwk.

Isu Krista thîna le tho nâwkna ṭâwmpuituhai ei nî leiin, Isu ang bawkin ei thi phât khawm ei tho nâwk ngêi ding a nih. Tû khawm thlâna zâl sawng ding hi ei um nawh. Mi thienghlim lâwr hunah Isu ringtuhai chu Vân rama Ama kuom tienga chêng kum khuo ta dingin tho an t'a, a ring nawtuhai ruok chu hremhmuna fe dingin an tho ve ding a nih. Tho nâwk man a um naw hle ding a nih.

Mî sermon naw ang takin ram tin ram tang hei pet lâwr pei ei tih ei hmû dân ang peiin.

Isu Krista'n ei suolna po po kha kraws-a phurin thlânah a phûm hmang a. Nun tharin a tho nâwk a, chû nun neituhai ei ni sî chun, ei nun hluihai kha ei sawm zing a thieng ta naw a nih. Isu ka ring, a tho nâwkna ka ṭâwmpui ti zing a, danglamna ei nei sî naw a ni chun, Isu thîna le a tho nâwkna kha ei la ṭâwmpui nawh tîna ni'ng a tih.

Nang hi i nunah danglamna, Krista hmêl ieng khawm hmû ding a um nawh hei inti inla hlak chu, lungsenin Wuhan (China) khawpuia mi thawn hmang nuom vawng ding hi ei ni tâwl nghâl sî. Coronavirus hrikin a law law mi law dingin. Chu hlak chu ei ngam sî nawh. To inchû hmak a ṭha. Chu chu Coronavirus laka himna khawm ni ta ve'ng a tih.

A ṭhen chu Isu thîna ṭâwmpuia tho nâwk ta loa thlâna zâl tlep sawng el pâwl dâm, a ṭhen chu Isu thîna tak ngiel khawm ṭâwmpui phâk loa taksa dam kur sia Thlarâu thi hmin dêr ta dâm ei um bawk. Isu Krista kha ei suolnahai kraws lêrah ei inhem detir sî naw chun Ama suolna nei lo taksa ringawt kha ei intuor thlâwntir el ding a nî? Chuong a ni sî chun, a hem dehai pâwl le khan ieng am danglamna ei nei bîk a? A hem dea ṭhang pâwlhai nêkin hremhmunah i chan nêp bîk deu dingin inring lul naw rawh. I'n ring sâwl thlâwn mei mei.

Hring dinga thî ei ni a, chûleiin ei thi sî naw chun iengtin am tho ei t'a? Thi loa tho i ni chun a thî ni lovin a ininnghil mei mei i nih tîna ni'ng a tih. A inhai chun an ṭhang har phât a ngâi bawkah an lût nâwk hlak. A thihai ruok chun chu chu an thei ve nawh. Thî hi ei rin taluo lei kuhin ieng khawm kuhi ei thîsan thei naw a ni hi. Thi lo chun Isu tho nâwkna kha ṭâwmpui thei a ni sî nawh.

Thî hi rin nâwm ei nîu, thi dinga pieng ei nî ang bawkin, hring dinga thî ei nih. Dam sâwtna hi thî pumpelna a ni naw a, suol thaw râwnna mei mei chau a nih. Taksa thîna chu thî sawngna an' naw a, Vân ram kawtsuo a nih. Chatuon hringna changa tho nâwk dinga thi dingin inpei rawh. Tû khawm thîna intem lo ding mihriem hi ei um sî nawh. Mi thienghlim lâwr huna lo la damhai chau naw chu.

Lalpa'n a thû tlâwm te ei zuk suklanghai chu thar takin mal mi sâwmpêk raw se.
Don't Miss
© all rights reserved
made with by Simon L Infimate