~ John L Pulamte
Isu'n a lo hriet chun, "Hi natna hi thîna ding a ni nawh, Pathien ropuina ding a ni lem. Hi lei hin Pathien Nâupa hi châwimâwiin a um ding a nih" a t'a.
(John 11 : 4)
Harsatna le rimsik tuornahai hi vângduoina a lo ni vawng kher naw ang hin, natna khawm hi thîna ding a lo ni vawng bîk chuong nawh. Chuong ang bawk chun hlawsamna khawm hi hlawsam sawngna a lo ni chuong naw a, hlawtlingnahai khawm hi malsâwmna vawnga ruot ding hi a lo ni nawh. Innuina khawm ṭapna hma ṭhuoitu a lo ni thei ang bawkin ṭapna khawm innuinain a zui ve châwk hlak.
Natna hi tuor naw inla mi sukdam theitu chu Pathien a nih tî hi inhmai awl vieu a tih. Dam beisei um ta lo, mi tam tak el mak tak taka A sukdamhai zo zâi hieng zât ei hmu ta khawmin ei la ringhlel ta rawp sî chun. Harsatna khawm hi tuok dêr naw inla ei dam sûngin, harsatna chingfeltu chu Pathien a nih tî hi inphat awlsam hle'ng a tih. Amiruokchu harsatna ei hei tuok a, Pathien ei ko a, a mi hei dawn zet chu Pathien hi ring tlâk Pathien a nîzie ei hung hriet chieng tak tak chau hlak.
Pathien hi mi tin deu thawin mamaw ei nei huna le harsatna ei tuok huna chau hin ei ko deu tak hlak a. Natna amanih, harsatna dâm ei tuok hunah Pathien hi ei hriet fûk chau hlak. Hieng harsatnahai hi vawi khat khawm ei dam sûngin tuok dêr naw inla chu, vûr rama barap (ice cream) ei mamaw naw ang char hin Pathien hi mamaw nâwm ei ni a, a um le um naw khawm ngaisak kher nâwm ei nih. Pathien le ei kâr khawm hla nuom sâwt ngawt a tih. Chu chu thil chu Pathienin a lo hmu fai vawng leiin, Ama le ei kâr a'n hlat nawna dingin natna le harsatna chi hrang hrang dâm a mi pêk hlak. Chu chu a nih Pathien mi kona ei tî vet hi.
Mihriem taksa bung hi 100-ah 60 chu tui vawng a ni a, chu chun mihriem hi tui boa khawsa thei lo ei nîzie a sukchieng hle. Mihriemin chî ei inthlâna hmangruo khawm hi tui tho a nih. Chûleiin tui hi mihriemin ei damna dingin ni khatah litre 3 annâwleh litre 2 bêk hi dâwn hlak ding a nih. Tui dâwn râwn ṭhatzie hi mi tinin ei hriet seng; amiruokchu ei dang a châr naw chun dâwn ei tum chuong nawh. Chuong ang char chun Pathien hnâi hi a ṭhazie ei hriet seng khawmin, rinumna ei tuok zet naw chun a hnîmhnâi pei hi ei um chuong nawh. Chûleiin Ama ei hnâi theina dingin hling inzum tak tak mi sun natû ding hi a mi pêk ta hlak a nih. Ṭawngbâuin mi ko chie naw sien khawm, râwl (harsatna) chi dang dang hmangin a mi ko hlak a nih. Chu chu einihaiin hre thiem lovin vângduoi thilah ei ruot a, mi tam takin ei tuor thlâwn pha rawp hlak hrim a nih.
Kei ngei khawm hi, thî ngama accident râpthlâk tak ka tuok kha mi ngaia chu vângduoina tâwpkhâwk lo ni sien khawm, vângduoi leia tuok ka ni naw a, ka vângnei luot leia malsâwmna danglama Pathien mi vurna a lo ni lem a, Ama le kan kâra hnuoi kak lien takin hun sâwt tak infe pâw thei ta loa a mi lo kârṭhena leia ka lo sir riel ta hnung chu, insir pâw nâwkna dinga leilâk a mi hung dâwpêkna a lo ni lem ta zing a. Suol mi dâidanna bang sâ tak el nêr tlang ruol lo chu ka natna hmangin a mi hung ṭhiek darpêk ta a nih. Ka accident tuok kha a hâihû lai khan vângduoi thilah lo bel hlak lang khawm, tû tieng ruok hin chu Pathien mi kona râwl mak le danglam, malsâwmna ropui tak a lo nîzie ka hung hriet thiem ve deu deu tah. Ka natna kha mi tam tak thîpui a nih. Sienkhawm ka thîna dinga ruot a la ni tlat sî naw leiin, a nat em leia zuk thi el ding hi ka lo ni bîk nawh. Ei thîna dinga chu nat rak khawm a lo ngai nawh. Cancer invawi kher khawm a ṭûl chuong nawh. Pathien tâ ding chun Cancer khawm hi thil hming pakhat ve el chau a nih.
Kei hî thusep ziektû ngei khawm hi, mihriem hringnain a dawl zo lo ding khawpa râpthlâk hliempui ka tuor a. Ka damkhawsuok a ring hi tû khawm an um ta nawh. Ni iemani zât hiel chu, mîthi dâr phawt kha chu mi dang chanah bel lovin, ditsak takin neitu chan pêkin ka um a, kei le mi hmet bel naw mang mihriem an um nawh tî thei a nih. Kei ngei khawmin ka thîna dâr ka sâwn vâng châng khawm a bo bîk nawh. Rîng lâwm lâwm tlieka mihriem la dam suok chu vâng khat tê an nih. Sienkhawm Lazar natna chungchâng thua Isu thukhawchâng, "Hi natna hi thîna ding a ni nawh, Pathien ropuina ding a ni lem. Hi lei hin Pathien Naupa hi chawimâwiin a um ding a nih," ti kha keima chunga ngei khawm sukdika a hung um ve theina dinga accident kha tuok ka lo ni lem zing sî. Lalpa ka lâwm ie; I hming nasa taka sukropui le châwimâwiin um zuol pei raw se.
Lalzar a damnaw thu Isu an hei hril khan Lazar kuomah va sukdam dingin a'n thawk suok el nawh. Ni hnih Jerusalemah a la châm a, a la tosan vang vang a ni kha. Lazar kha Bethani-a um a ni
a, Isu kha Jerusalem-a um a nih. Bethani le Jerusalem inkâr kha kilometer thum vêla hla a nih. Isu Bethani a va tlung khan ni lî lai zet a lo liem ta a Lazar nata inthawk khan. A lo thi hmin dêr ta a, thlânah an lo inzâl hman dêr tah. Sienkhawm Pathien ta ding chun inhnûk inhmâ tî a um ve nawh, thlâna zâl ta hnung chu mi dam inlusu kei tho ang elin a kei tho a ni kha.
Einîhai khawm hi ieng ang harsatna khawm lo tuok inla, beidawng el loa Isu Krista beisei taka ei nghâk fan fan a ni chun, mi ṭhangpui dingin iengtik nia' mani chu ei kuomah a la hung ve ding a nih. Lazar thi sâwnga a zâl lai khawmin ni hni lai zet Isu chu a umna ngaiah a la ṭhung muong ta zing a, ni lî hnungah a va nang hman chau a nih. Pathien chu inhmaw lo le muongchâng ngai si lo a ni a, a hun taka che hlak mî a nih. Chûleiin eini khawm ei natna mi sukdam dingin amani, annâwleh ei harsatnahai mi chingfelpêk dingin ei ko a, ei lo beisei hunah a mi zuk dawn el naw a ni khawmin hlawsamah inngai nghâl el ngai nâwm ei nîu, lampuiah a la châmbâng khawm a ni thei. Eini nêka pawimaw le thaw hmasak lem dinghai chu la'n thaw hmasaktir zet phawt ei tîu. Pathien kut chu mi ṭhangpui dingin a tâwi naw a, ei kona râwl hre dingin a nâ a sêt bawk nawh.
Lazar natna chunga ei Lalpa Isu thukhawchâng ang khan, natna hi ei thîna ding kher a ni chuong naw a, hrisêlna khawm hi dam sâwtna a ni chuong bawk nawh. Harsatna ei tuokhai khawm hi vângduoina a ni vawng chuong naw a, malsâwmna hmêl danglam put dâm hi an lo ni nuom vieu lem hlak. A khâ phawt hi tûr a ni vawng naw a, a thlum phawt hi khuoizû a ni bawk nawh. Chuong ang bawk chun hmêl ṭha chu lungril ṭhatna a ni naw a, hmêl sie khawm lungril sietna a ni chuong bawk nawh.
Ieng po khawm chu ni sien, natna hi thîna ding a ni kher nawh tî thukhawchâng hin ei sermon bung le châng khâr zai rêl ta'ng ei tih.
Tiemtuhai in rêngin Lalpa'n mal sâwm raw se chêu.
Isu'n a lo hriet chun, "Hi natna hi thîna ding a ni nawh, Pathien ropuina ding a ni lem. Hi lei hin Pathien Nâupa hi châwimâwiin a um ding a nih" a t'a.
(John 11 : 4)
Harsatna le rimsik tuornahai hi vângduoina a lo ni vawng kher naw ang hin, natna khawm hi thîna ding a lo ni vawng bîk chuong nawh. Chuong ang bawk chun hlawsamna khawm hi hlawsam sawngna a lo ni chuong naw a, hlawtlingnahai khawm hi malsâwmna vawnga ruot ding hi a lo ni nawh. Innuina khawm ṭapna hma ṭhuoitu a lo ni thei ang bawkin ṭapna khawm innuinain a zui ve châwk hlak.
Natna hi tuor naw inla mi sukdam theitu chu Pathien a nih tî hi inhmai awl vieu a tih. Dam beisei um ta lo, mi tam tak el mak tak taka A sukdamhai zo zâi hieng zât ei hmu ta khawmin ei la ringhlel ta rawp sî chun. Harsatna khawm hi tuok dêr naw inla ei dam sûngin, harsatna chingfeltu chu Pathien a nih tî hi inphat awlsam hle'ng a tih. Amiruokchu harsatna ei hei tuok a, Pathien ei ko a, a mi hei dawn zet chu Pathien hi ring tlâk Pathien a nîzie ei hung hriet chieng tak tak chau hlak.
Pathien hi mi tin deu thawin mamaw ei nei huna le harsatna ei tuok huna chau hin ei ko deu tak hlak a. Natna amanih, harsatna dâm ei tuok hunah Pathien hi ei hriet fûk chau hlak. Hieng harsatnahai hi vawi khat khawm ei dam sûngin tuok dêr naw inla chu, vûr rama barap (ice cream) ei mamaw naw ang char hin Pathien hi mamaw nâwm ei ni a, a um le um naw khawm ngaisak kher nâwm ei nih. Pathien le ei kâr khawm hla nuom sâwt ngawt a tih. Chu chu thil chu Pathienin a lo hmu fai vawng leiin, Ama le ei kâr a'n hlat nawna dingin natna le harsatna chi hrang hrang dâm a mi pêk hlak. Chu chu a nih Pathien mi kona ei tî vet hi.
Mihriem taksa bung hi 100-ah 60 chu tui vawng a ni a, chu chun mihriem hi tui boa khawsa thei lo ei nîzie a sukchieng hle. Mihriemin chî ei inthlâna hmangruo khawm hi tui tho a nih. Chûleiin tui hi mihriemin ei damna dingin ni khatah litre 3 annâwleh litre 2 bêk hi dâwn hlak ding a nih. Tui dâwn râwn ṭhatzie hi mi tinin ei hriet seng; amiruokchu ei dang a châr naw chun dâwn ei tum chuong nawh. Chuong ang char chun Pathien hnâi hi a ṭhazie ei hriet seng khawmin, rinumna ei tuok zet naw chun a hnîmhnâi pei hi ei um chuong nawh. Chûleiin Ama ei hnâi theina dingin hling inzum tak tak mi sun natû ding hi a mi pêk ta hlak a nih. Ṭawngbâuin mi ko chie naw sien khawm, râwl (harsatna) chi dang dang hmangin a mi ko hlak a nih. Chu chu einihaiin hre thiem lovin vângduoi thilah ei ruot a, mi tam takin ei tuor thlâwn pha rawp hlak hrim a nih.
Kei ngei khawm hi, thî ngama accident râpthlâk tak ka tuok kha mi ngaia chu vângduoina tâwpkhâwk lo ni sien khawm, vângduoi leia tuok ka ni naw a, ka vângnei luot leia malsâwmna danglama Pathien mi vurna a lo ni lem a, Ama le kan kâra hnuoi kak lien takin hun sâwt tak infe pâw thei ta loa a mi lo kârṭhena leia ka lo sir riel ta hnung chu, insir pâw nâwkna dinga leilâk a mi hung dâwpêkna a lo ni lem ta zing a. Suol mi dâidanna bang sâ tak el nêr tlang ruol lo chu ka natna hmangin a mi hung ṭhiek darpêk ta a nih. Ka accident tuok kha a hâihû lai khan vângduoi thilah lo bel hlak lang khawm, tû tieng ruok hin chu Pathien mi kona râwl mak le danglam, malsâwmna ropui tak a lo nîzie ka hung hriet thiem ve deu deu tah. Ka natna kha mi tam tak thîpui a nih. Sienkhawm ka thîna dinga ruot a la ni tlat sî naw leiin, a nat em leia zuk thi el ding hi ka lo ni bîk nawh. Ei thîna dinga chu nat rak khawm a lo ngai nawh. Cancer invawi kher khawm a ṭûl chuong nawh. Pathien tâ ding chun Cancer khawm hi thil hming pakhat ve el chau a nih.
Kei hî thusep ziektû ngei khawm hi, mihriem hringnain a dawl zo lo ding khawpa râpthlâk hliempui ka tuor a. Ka damkhawsuok a ring hi tû khawm an um ta nawh. Ni iemani zât hiel chu, mîthi dâr phawt kha chu mi dang chanah bel lovin, ditsak takin neitu chan pêkin ka um a, kei le mi hmet bel naw mang mihriem an um nawh tî thei a nih. Kei ngei khawmin ka thîna dâr ka sâwn vâng châng khawm a bo bîk nawh. Rîng lâwm lâwm tlieka mihriem la dam suok chu vâng khat tê an nih. Sienkhawm Lazar natna chungchâng thua Isu thukhawchâng, "Hi natna hi thîna ding a ni nawh, Pathien ropuina ding a ni lem. Hi lei hin Pathien Naupa hi chawimâwiin a um ding a nih," ti kha keima chunga ngei khawm sukdika a hung um ve theina dinga accident kha tuok ka lo ni lem zing sî. Lalpa ka lâwm ie; I hming nasa taka sukropui le châwimâwiin um zuol pei raw se.
Lalzar a damnaw thu Isu an hei hril khan Lazar kuomah va sukdam dingin a'n thawk suok el nawh. Ni hnih Jerusalemah a la châm a, a la tosan vang vang a ni kha. Lazar kha Bethani-a um a ni
a, Isu kha Jerusalem-a um a nih. Bethani le Jerusalem inkâr kha kilometer thum vêla hla a nih. Isu Bethani a va tlung khan ni lî lai zet a lo liem ta a Lazar nata inthawk khan. A lo thi hmin dêr ta a, thlânah an lo inzâl hman dêr tah. Sienkhawm Pathien ta ding chun inhnûk inhmâ tî a um ve nawh, thlâna zâl ta hnung chu mi dam inlusu kei tho ang elin a kei tho a ni kha.
Einîhai khawm hi ieng ang harsatna khawm lo tuok inla, beidawng el loa Isu Krista beisei taka ei nghâk fan fan a ni chun, mi ṭhangpui dingin iengtik nia' mani chu ei kuomah a la hung ve ding a nih. Lazar thi sâwnga a zâl lai khawmin ni hni lai zet Isu chu a umna ngaiah a la ṭhung muong ta zing a, ni lî hnungah a va nang hman chau a nih. Pathien chu inhmaw lo le muongchâng ngai si lo a ni a, a hun taka che hlak mî a nih. Chûleiin eini khawm ei natna mi sukdam dingin amani, annâwleh ei harsatnahai mi chingfelpêk dingin ei ko a, ei lo beisei hunah a mi zuk dawn el naw a ni khawmin hlawsamah inngai nghâl el ngai nâwm ei nîu, lampuiah a la châmbâng khawm a ni thei. Eini nêka pawimaw le thaw hmasak lem dinghai chu la'n thaw hmasaktir zet phawt ei tîu. Pathien kut chu mi ṭhangpui dingin a tâwi naw a, ei kona râwl hre dingin a nâ a sêt bawk nawh.
Lazar natna chunga ei Lalpa Isu thukhawchâng ang khan, natna hi ei thîna ding kher a ni chuong naw a, hrisêlna khawm hi dam sâwtna a ni chuong bawk nawh. Harsatna ei tuokhai khawm hi vângduoina a ni vawng chuong naw a, malsâwmna hmêl danglam put dâm hi an lo ni nuom vieu lem hlak. A khâ phawt hi tûr a ni vawng naw a, a thlum phawt hi khuoizû a ni bawk nawh. Chuong ang bawk chun hmêl ṭha chu lungril ṭhatna a ni naw a, hmêl sie khawm lungril sietna a ni chuong bawk nawh.
Ieng po khawm chu ni sien, natna hi thîna ding a ni kher nawh tî thukhawchâng hin ei sermon bung le châng khâr zai rêl ta'ng ei tih.
Tiemtuhai in rêngin Lalpa'n mal sâwm raw se chêu.
