Responsive Ad Slot

Rengkai Lal- Pu J.C Chongkholien Lekhabu ziek tlangzarna le In Thar hawngna nei

Monday, March 9, 2020

/ Published by Simon L Infimate
Rengkai, March 9, 2020, Virthli (ONP): Thailane, Rengkai,  Sungnu Road bula  Rengkai Lal- Pu J.C Chongkholien a In bawl thar 'Joute Building' chu vawisun dar 1:00 PM khan hawngna hunser hmang a nih. Hun hmangna hi Rev. Joseph R. Joute in a keithuoia, Rev. Dr. J.L. Songate, Executive Secretary, ICI in In thar hawngna le Pathien kuoma inhlanna a nei. Hi In thar hawnga um hi Commercial Centre a hmang ani ding thu In neituhaiin Virthli Palai an hril.

In thar hawngna hunser hmang ani zoin dar 2:00 PM in Lal Compound ah Rengkai Lal- Pu J.C. Chongkholien Joute a Lekhabu ziek " Rengkai Lal- Kailien Joute ( A khaw sathai le a thlahai)" tlangzarna nei a nih. Hi huna hin Upa S. Vanlalruala chu hun vawngtu niin Pu J.C Chongkholien a'nthawk thuhril ngaithlak a nih. Hi huna thu a hrilna a chun mi hrisel lo tak el, dam hlei thei lo ani thu hrilin  kum 86+ hai chen Pathienin a hringna a hla pek el chu mak a ti thu a hril a. Mi anga hrisel an naw leia a natna hai la pek dinga Pathien a buon dan hai le, hrisel naw ding khawma dawmsawtna bek Pathien kuoma a lo ngen hlak thu, Shillonga I.A (P.U) 2nd year an chuk laia fienriel tawngtai a nei huna damsawtna Pathien kuoma a lo hnina hai chu vawisun ni chena  hmutheia a um chu Pathien ringumzie a hmuin lawmum le ropui a ti thu hrilin, a chungah Pathien ring a um leiin a In bawl thar a hin "GOD IS FAITHFUL (1 Cor. 1:9) ziek le tar ani thu a hril bawk.


Upa Lallungawiin Lekhabu thlirlawkna a nei zoin Upa Tuolkhawhmangin Lekhabu hi a tlangzar a, Rev. Neichawngthangin Pathien kuomah inhlanna a nei. Hi huna hin Rengkai HWA le lainatuhaiin Pu J.C. Chongkholien chawimawina thangsuopuon le hnam thuom mawi tak tak el an inhlan.


Hi hunser hmang huna hin Nk. Quilyn Lalrovel ( Rev. Thangngur Awardee) a'nthawkin inpakna hla hai ngaithlak a ni a, in neitu tieng - Pu Lalhmingmak Joute in lawmthu hrilna a nei zoin Rev. S.K Songate in ruoi inhlanna le hun khar tawngtaina a nei a, hmangaina ruoi kiltlang anih. Lekhabu tlangzar a um hi a dit le an chaw nuomhai chun Rengkai HWA Unit hai kuomah ngaiven thei zing a nih.
Don't Miss
© all rights reserved
made with by Simon L Infimate