~ Rev. Alan L. Ṭhiek, Sielmat
Vawisun Thlaṭau ni 22, 2020 hi ka pienga inthawka khawser (lockdown) ka vawi khat hmangna a nih. Tam tak ta ding khawmin a ni ve ka ring. Vawi sun hin India mipui maktaduoi 1300 bâwrin khawser ei hmang a na, khawser hmanga chu a tam pâwl tak ei ni ka ring.
Ei pi le puhai khan khawser an lo hmang hlaka. Khawser hi khawtlang hrisêlna dinga an hmang hlak, khawsunga hri le hrai leia thi an tam pha, tlangbiek inthâwi thawin, khawser an thaw hlak a nih. Hi ni hin khaw mi tu khawm khuo a inthawka suok an phal nawha, mikhuol tukhawm lût an phal ngâi bawk nawh, lockdown a nih. Khaw mi kim taka khuoa an um ni a ni leiin, hla ṭawnga "Ser ang kim" (Khawser ang kim) ei lo ti a nih. Khawser nia khaw mi kim taka an um angin, vanrama chu Sandam nauhai a kim naw um loa, kim taka ei um ding hrilna a nih. (Puhai L. Keivom le SN Ngurte hril dan le chu an ang naw deu el thei).
Khawser ni hin kawtsuo daiin an khâr a, sawl an bânga, mikhuol an lo hung pal khawma khawser an hmang hriet theina ding a nih. Khawser, lockdown, hi an lak ursun em em a, a bawsie an um chun siel le salam an inchâwitir hlak. Hi ni hin thiempuihaiin dawi an thaw a, kawtsuoah saha hrâp dam, ui hrâp dam an khaia, khaw mipui chu mani in sengah to ṭawkin an inkhârkhum a, risie siem phal an nawh. Ui le arhai khawm bâwma khumin khawhnawmah an sie hlak. Thuka mei an that vawnga, mei sêm phal an nawha, ṭawng loin to chipin mani insûng sengah an inkhârkhuma, thiempu'n kawt a hawng hma po chu kawt hawng awi an nawh. Lal le khâwnbâwlhai bâwlhmuna an inthâwi zo pha, khuo an hung lûta, lal inah meiril lapin mei an sêm ṭan hlak, chu mei thar chu a khuoin an lâkkâi seng hlak. Kum 1927 a kan puhai khawsât Patpuihmun khaw thar an kâi dinga an khawser hmang hieng ang hin Vangai Sumtuk lal, Pu DR Ṭhuoma naupa, Upa Lalthanzam Amo in a ziek, "Khawkawlah daikhâr an siem a, khaw sûnga mikhuol lût an khap a. Thiempu (Darnupa) chun zan puonsuk hâkin, khamhna châwiin, berva in a zui a, uite a dunga ât thisa keiin, inthienna thu inzâwt peiin, in tinah an lût pei a, an zap thiel a, mei an that pei a, ri hau rêng rêng nei an khap tlat a . . . Lal ina invawng ban thek hnangin an nâwt a, mei a hung de a, meitawk pawnin an lâkkâi a, meithar chu a khuoin an sit tah a" tiin. Ngainuom a um rum rum hle. Hi taka inthawk hin ei pi le puhai khan khawser kha an lo lâk ursûn hle a, an ring dana khaw mipui ta dinga hrisêlna ding, dam khawsuok thei dan nia an hriet kha, khun, titak le ursun takin an lo hmang a nih ti ei hriet thei.
Ei ni khawm Chanchinṭha ni êng le hrietna varin a mi sun êng hnungah, corona hripui laka ei him theina dingin India Sorkar thusuok zawmin khawser (lockdown) ei hmang a na. Vawisûna ei hmang hi a tâwpna a ni da'l thei. Corona hripui hin inkieng zâi a rêl naw chun, kar a tiem khawser khawm ei la hmang el thei, ei dam khawsuok theina dingin.
Corona hripui nêka ṭibaium, taksa thina chau ni lo, chatuona thina chen intlun theitu Eden hripui hi a nih.Hi Eden hripui a inthawka damna chu, Pathien hmangaina leiin, a dam nuom taphawt ta dinga ringnaa chang thei a na. Ei pi le puhaiin khawser an thaw ni a, kawtsuo a ui hrâp an khâi ang el a, Jerusalem khawkâwla kum 2000 bâwr liemtah a an khai ve, Isu Khrista chun hi hripuia inthawk hin a mi sandam taha. Van Lal Thiempu ropui Isu Krista chun, ama thisen ngêi châwiin, kuta bâwl naw, Van Lal In Thienghlim ropui chu lûtin, Pa Pathien hmaa intlanna famkim chu a mi tlingtla pêk tah a nih (Hebrai 9:11-13). "Aw hlimin lâwm rawh, ka thla inrieng. Inhmangna inthûk sien khawm. Paradise a an tlun ta che. Aw! Hla taka hung zawngtu che khan" ti naw ruol am ei nih!
Corona hripui hi ieng chen am an lêng ding ei hriet nawh. Ei chêngna India rama lem hin chu nitin an vawi ei pung met met pei a na, tuta ei Sorkarin theitawp suoa, thapui sanga a dang chât naw chun, ei hma bâk ding chu a rapthlak vieu el thei. A maktaduoi a tiemin ei invawiin ei thipui el thei. Hi ngîrhmun rapthlâk taka inthawka ei pumpel theina umsun chu, ursun taka khawser (lockdown) hmang hi a n'el. Lampui dang a um hriin a'n lang nawh. Khawvel ram var hmasa le changkânga ngâi, Italy ram khawm, an sorkarin khawser a puong inhnu deu met leiin, corona hripui hi nasa takin an darsar hmana. Tuhin hi hripui ṭibaium hin phaivuo hrâttak angin a nawt mêka, ṭhâl laia thing hna inung deu tahai thliin a mûtṭil ang elin, a upa le taksa châu deuhai chu, a zaa tiemin, nitin a sawi ṭil zing a nih. A mangang thlâk hle.
"Jerusalem fê san naw ro, Pa thuthiem ka hril inhriet kha lo nghâk zing ro" tiin ei Lalpa Isu Khrista khawmin, a ṭhuoihruoihai vân tieng a mâksan tâwmin, a'n fûi ngawng ngawng a ni kha (Thilthawhai 1:4). Ei ni khawm ei himna dinga Sorkarin khawser a puong sung po chu, thuawi takin, mani inah inkhum ei ta, inpan khâwm duol duol dam, ṭûl loa lêng par vêl dam bânin, hi hripui ṭibaium hi do vêng ei tiu. Pathien hring betuhai ei na, ṭawngṭaiin Pathien ko ei ta, Ama naupa ngêi khawm hla loa ei rênga aia petu chun (Rom 8:32) a hun taka Thlamuongtu chu a mi hung tir pêk ding an nawm.
Vawisun Thlaṭau ni 22, 2020 hi ka pienga inthawka khawser (lockdown) ka vawi khat hmangna a nih. Tam tak ta ding khawmin a ni ve ka ring. Vawi sun hin India mipui maktaduoi 1300 bâwrin khawser ei hmang a na, khawser hmanga chu a tam pâwl tak ei ni ka ring.
Ei pi le puhai khan khawser an lo hmang hlaka. Khawser hi khawtlang hrisêlna dinga an hmang hlak, khawsunga hri le hrai leia thi an tam pha, tlangbiek inthâwi thawin, khawser an thaw hlak a nih. Hi ni hin khaw mi tu khawm khuo a inthawka suok an phal nawha, mikhuol tukhawm lût an phal ngâi bawk nawh, lockdown a nih. Khaw mi kim taka khuoa an um ni a ni leiin, hla ṭawnga "Ser ang kim" (Khawser ang kim) ei lo ti a nih. Khawser nia khaw mi kim taka an um angin, vanrama chu Sandam nauhai a kim naw um loa, kim taka ei um ding hrilna a nih. (Puhai L. Keivom le SN Ngurte hril dan le chu an ang naw deu el thei).
Khawser ni hin kawtsuo daiin an khâr a, sawl an bânga, mikhuol an lo hung pal khawma khawser an hmang hriet theina ding a nih. Khawser, lockdown, hi an lak ursun em em a, a bawsie an um chun siel le salam an inchâwitir hlak. Hi ni hin thiempuihaiin dawi an thaw a, kawtsuoah saha hrâp dam, ui hrâp dam an khaia, khaw mipui chu mani in sengah to ṭawkin an inkhârkhum a, risie siem phal an nawh. Ui le arhai khawm bâwma khumin khawhnawmah an sie hlak. Thuka mei an that vawnga, mei sêm phal an nawha, ṭawng loin to chipin mani insûng sengah an inkhârkhuma, thiempu'n kawt a hawng hma po chu kawt hawng awi an nawh. Lal le khâwnbâwlhai bâwlhmuna an inthâwi zo pha, khuo an hung lûta, lal inah meiril lapin mei an sêm ṭan hlak, chu mei thar chu a khuoin an lâkkâi seng hlak. Kum 1927 a kan puhai khawsât Patpuihmun khaw thar an kâi dinga an khawser hmang hieng ang hin Vangai Sumtuk lal, Pu DR Ṭhuoma naupa, Upa Lalthanzam Amo in a ziek, "Khawkawlah daikhâr an siem a, khaw sûnga mikhuol lût an khap a. Thiempu (Darnupa) chun zan puonsuk hâkin, khamhna châwiin, berva in a zui a, uite a dunga ât thisa keiin, inthienna thu inzâwt peiin, in tinah an lût pei a, an zap thiel a, mei an that pei a, ri hau rêng rêng nei an khap tlat a . . . Lal ina invawng ban thek hnangin an nâwt a, mei a hung de a, meitawk pawnin an lâkkâi a, meithar chu a khuoin an sit tah a" tiin. Ngainuom a um rum rum hle. Hi taka inthawk hin ei pi le puhai khan khawser kha an lo lâk ursûn hle a, an ring dana khaw mipui ta dinga hrisêlna ding, dam khawsuok thei dan nia an hriet kha, khun, titak le ursun takin an lo hmang a nih ti ei hriet thei.
Ei ni khawm Chanchinṭha ni êng le hrietna varin a mi sun êng hnungah, corona hripui laka ei him theina dingin India Sorkar thusuok zawmin khawser (lockdown) ei hmang a na. Vawisûna ei hmang hi a tâwpna a ni da'l thei. Corona hripui hin inkieng zâi a rêl naw chun, kar a tiem khawser khawm ei la hmang el thei, ei dam khawsuok theina dingin.
Corona hripui nêka ṭibaium, taksa thina chau ni lo, chatuona thina chen intlun theitu Eden hripui hi a nih.Hi Eden hripui a inthawka damna chu, Pathien hmangaina leiin, a dam nuom taphawt ta dinga ringnaa chang thei a na. Ei pi le puhaiin khawser an thaw ni a, kawtsuo a ui hrâp an khâi ang el a, Jerusalem khawkâwla kum 2000 bâwr liemtah a an khai ve, Isu Khrista chun hi hripuia inthawk hin a mi sandam taha. Van Lal Thiempu ropui Isu Krista chun, ama thisen ngêi châwiin, kuta bâwl naw, Van Lal In Thienghlim ropui chu lûtin, Pa Pathien hmaa intlanna famkim chu a mi tlingtla pêk tah a nih (Hebrai 9:11-13). "Aw hlimin lâwm rawh, ka thla inrieng. Inhmangna inthûk sien khawm. Paradise a an tlun ta che. Aw! Hla taka hung zawngtu che khan" ti naw ruol am ei nih!
Corona hripui hi ieng chen am an lêng ding ei hriet nawh. Ei chêngna India rama lem hin chu nitin an vawi ei pung met met pei a na, tuta ei Sorkarin theitawp suoa, thapui sanga a dang chât naw chun, ei hma bâk ding chu a rapthlak vieu el thei. A maktaduoi a tiemin ei invawiin ei thipui el thei. Hi ngîrhmun rapthlâk taka inthawka ei pumpel theina umsun chu, ursun taka khawser (lockdown) hmang hi a n'el. Lampui dang a um hriin a'n lang nawh. Khawvel ram var hmasa le changkânga ngâi, Italy ram khawm, an sorkarin khawser a puong inhnu deu met leiin, corona hripui hi nasa takin an darsar hmana. Tuhin hi hripui ṭibaium hin phaivuo hrâttak angin a nawt mêka, ṭhâl laia thing hna inung deu tahai thliin a mûtṭil ang elin, a upa le taksa châu deuhai chu, a zaa tiemin, nitin a sawi ṭil zing a nih. A mangang thlâk hle.
"Jerusalem fê san naw ro, Pa thuthiem ka hril inhriet kha lo nghâk zing ro" tiin ei Lalpa Isu Khrista khawmin, a ṭhuoihruoihai vân tieng a mâksan tâwmin, a'n fûi ngawng ngawng a ni kha (Thilthawhai 1:4). Ei ni khawm ei himna dinga Sorkarin khawser a puong sung po chu, thuawi takin, mani inah inkhum ei ta, inpan khâwm duol duol dam, ṭûl loa lêng par vêl dam bânin, hi hripui ṭibaium hi do vêng ei tiu. Pathien hring betuhai ei na, ṭawngṭaiin Pathien ko ei ta, Ama naupa ngêi khawm hla loa ei rênga aia petu chun (Rom 8:32) a hun taka Thlamuongtu chu a mi hung tir pêk ding an nawm.
