Responsive Ad Slot

EFCI 47th General Assembly, 2020 a ṭumṭiek

Monday, March 2, 2020

/ Published by Simon L Infimate
Shillong, March 01, 2020, Virthli (ONP): Evangelical Free Church of India (EFCI) 47th General Assembly, 2020 chu “Kristien Nun Puitling” (Christian Maturity) Hebrew 6:1 ti thupuia hmangin EFCI Church (General Headquarters), Shillong-ah February 26, 2020 a inthawk ṭanin vawizan (March 1, 2020) khan hlawtling takin a lo ṭumṭiek tah.


February 26 khan Pastoral Committee, Pastor exam, Central Ramthar Board, le Assembly Musical Committee inṭhungna hai an neia, February 27 khan 102nd Executive Council inṭhungna an nei. Chun, February 28 le 29, 2020 hai khan Assembly rorelna an neia, hi huna hin Assembly Palai fekhawm 300 vel fekhawmin thuoitu thar thlangna neiin, a hnuoia hai hi thlangtling an nih.
President: Rev. Lallienvel Pakhuongte
Vice President: Rev. C. Kawldinglien Joute
Secretary: Rev. Hrangchunghnung Inbuon
Moderator: Rev. Zoramsiem Nungate
Vice Moderator: Rev. Lalbiektluong
Assembly Secy: Rev. Simon L Darngawn
Assembly Asst.Secretary: Rev. G.B Niropui Joute

February 29 zan khan General Assembly mipui inkhawm hawng nei a ni a, hi huna hin President, Bibles  For The World le President, EFCI haia inthawk report ngaithlak a nih.

Vawisun khan Assembly mipui inkhawm hunah Moderator, EFCI le President, EFCI han Ordination & Commendation of the Seniors hun chu keihruoin nei a nih. Rev. Dr J. Huoplien Neitham, Moderator, EFCI in “Kristien Nun Puitling” ti thupui hmangin Pathien thucha tha tak el hrilna a nei. Chawhnung inkhawm ah Sunday School inchuktirtu le Kohran Upa chawimawina hun hai hmang ani bakah Assembly thupui hmangin Rev. Lalbiektluong, Vice President, EFCI in thu hrilna a nei.

Zan inkhawm huna thlangthara umhai installation nei a ni zovin Rev. Lallienvel Pakhuongte, President, EFCI in Pathien thucha hrilna a neia, Rev. Lallienthil Selate, PS, Cachar Presbytery in Benediction in Assembly kharna a nei. Inkhawmpui hi felfai taka nei a nia, thu le hla tieng khawm thlarau malsawmna dawngin hlimtlang tak le hlawtling taka inkhawmpui hi hmang zo a nih. EFCI Central Choir han inkhawmpui sung hla tienga rawngbawlna hring takin an nei hlak bawk a nih.





Don't Miss
© all rights reserved
made with by Simon L Infimate