Responsive Ad Slot

SMARTPHONE SUKHMANG HMUKIR DAN

Wednesday, February 26, 2020

/ Posted by VIRTHLI
1. THUHMATHUOI

Smartphone man tam tak tak ei hmang deu fur ta a. Ei tangkai pui em em. Amiruokchu, ei smartphone hi an hmang thei a. Min an inruk thei bawk. A sukhmangtu a tamlem chun an hmu ta nawh. An rutu haiin a sukhmang hai an pekkir nuom ta nawh.


2. SIM BLOCK

SIM card inhmang chu ei block hlak. Airtel SIM hmang haiin 198 ei phone a. BSNL SIM hmangtu haiin 123 annawle 9415024365 phone in SIM inhmang chu ei BLOCK hlak. Chun phone handset inhmang kha an rutu in SIM dang thunin a hmang thei ta nawna dingin company chu blacklisting dingin hril thei a nih.

Amiruokchu, smartphone sukhmang chu a hmukir dan lampui thenkhat a um a. Chu taka chun Police thangpuina a tul nawh. Hi le inzawma ei hriet ding thenkhat zuk tarlang ei tih:

3. CELLPHONE

Cellphone ei ti pha thil pathum ei inkawktir hlak. Chuong hai chu Handset, SIM card le Telecom Network Operator an nih.

1. PHONE HANDSET

Handset hin phone identity card a nei a. Chu chu IMEI a nih. *#06# hmetin IMEI No. hriet thei a nih.

Chun phoneset serial number a um. Chu chu Handset Serial No. ei tih. Phone Settings ah lutin ABOUT PHONE ah serial number, model le IMEI No. hmu thei an nih.

Handset IMEI le Serial No. hai hi phone handset le inzawma inchik ding pawimaw bek bek hai an nih.

Handset siemtu companies inlar hai chu

A. Ziaomi. China company a nih. Indian smartphone bazara ah 26% market a nei. Redmi Note 7 Pro hi an handset inlar tak a nih.

B. Realme. China. 8% market a nei. Budget handset chu Realme C2.

C. Vivo. China. 21% market. Vivo Z1 Pro

D. Samsung. South Korea. 19% market a nei. Galaxy M20

E. Oppo. China. 12% market a nei.  F17 Pro.

F. Micromax hi Indian smartphone company laia inlartak a nih.

2. SIM CARD

Handset hi SIM bovin hmang thei an nawh. Handset ah SIM ei inbuk pha phone le SIM chu hmang thei dingin Network in SIM chu permission a pek hlak.

SIM card hin telephone number a nei ve a. Chu chu phone number hi a nih. SIM card zawrtu in an chawtu chu mobile number a pek hlak. SIM card hin identity number a nei bawk. Chu chu SIM Serial No. annawle ICCID ei tih.

SIM card zawrtu company inlar deu deu hai chu

A. Vodafone Idea, 387 million subscriber an nei kum 2019 khan.

B. Jio in 322 million

C. Airtel in 320 million

D. BSNL in 1.16 million

E. MTNL in 3.4 million subscriber a nei.

3. NETWORK OPERATOR

Phone handset le SIM card sukkawpa phone anga hmang thei dinga network petu chu Mobile telecom operator a nih.

India a telecom network operator inlar deu hai chu

A. Vodafone

B. Idea

C. Jio

D. Airtel

E. BSNL

F. MTNL

4. SMARTPHONE INRUTU

Smartphone sukhmang hmutu/inrutu in a thil hmu/inruk le inzawmin thil pali a thaw thei.

Chuong hai chu a hnuoia hai hi an nih

A.  Phone chu a hmang nghal thei.

Hmutu/rukru chun smartphone inhmang chu a hmang nghal thei a. A i biek hmasatak hriet thei a nih. Chuongpa/chuongnu a inthawk a calltu man thei a nih. Hi ding hin Police Station ah Missing Report thelut phawt tul a tih. Phone number le IMEI inchik a ngai a. Smartphone sukhmangtu in a phone an chawkzo hlim khan a smartphone handset Settings ah Security a um a. Chu taka chun IMEI le Serial No. hmu thei an nih. *#06# hmeta IMEI hriet thei a ni bawk.

B. SIM chau card dehawnin phone handset a hmang thei.

Rukru hin Smartphone a SIM card chu dehawnin SIM card thar thunin smartphone chu a hmang thei. SIM card thar neitu hriet thei a nih. Hi ding hin Police Station ah Missing Report thelut tul a tih. Phone IMEI inchik a ngai.

C. Smartphone chu off in a suksiet/hedawn sawng thei.

Phone neitu thil inpam bek bek Smartphone chu an rutu in hmang chuong lovin a suksiet pek hrim hrim thei bawk.

D. Inrutu in phone chu mobile siemna ah zawrin phone repairer in IMEI chu a thleng thei. Hieng hin an thaw vei chun Phone inhmang chu hmukir thei an ta nawh.

E. Chun mobile sukhmangtu duplicate SIM card chu midangin an laksuok thei bawk.

5. SMART TIPS

Chuleiin smartphone hmangtu hai ei fimkhur hle a tul.

i. Mobile thar in chawk pha a IMEI No. le Serial No. inchik hlak la. Sie tha hlak rawh.

ii. Second hand handset inchawk chun IMEI No. nei ngei inchaw hlak rawh. Inruk a ni le ni naw Handset company website annawle GOOGLE ah check hlak rawh.

iii. Mi hminga lakdawk SIM card hmang ngai naw rawh.

iv. SIM card network ni khat dam i nei naw hun a um chun mi dang phone hmangin an rang thei angin telecom operator zuk inhriettir la, a san hriet tum zie hlak rawh. I hmingin duplicate SIM an lak tum dam a ni thei.

Smartphone inrutu in a thil inruk smartphone chu a ON pha an rutu chu mandawk a la ni tho tho hlak. A lo awisawt met el thei. Mobile chu a ON naw chun a thil inruk chu a hmang tangkai nawh ti thei ning a tih.

Smartphone chu a ON pha smartphone inhmang inrutu umna hriet thei a ni a. Phone kha call inri thei a ni bawk. Hi ding hin Police an pawimaw nawh. Smartphone sukhmangtu in phone an chawkzo hlim khan a smartphone handset Settings a Security settings hai a lo set reng tul a tih. Chu settings a FIND MY DEVICE le LOCATION a ON ngei ding a nih. Samsung account le Google account hmang tangkai thei a tih. Hihi Police bova smartphone zawnghmu theina umsun a nih.

Smartphone handset Settings le Google hmang tangkai tum seng ei tiu. TrueCaller App le Google Find My Device App khawm hmang hlak ei tiu.

Thil dang po chu Police sin dingin sietha thei a nih.

-Ziektu

Dada le Jojo-Pa,
Hmarkhawlien, Fulertal, Lakhipur, Cachar, Assam

25.2.2020
Don't Miss
© all rights reserved
made with by Simon L Infimate