Ṭhangthar haiin thil ṭhalem, mawilem le thil thawdan indiklema thaw nuomna a hung um a. Chuonghai laia thil pakhat chu SIKPUIRUOI or SIKPUI RUOI ziekdan ah, Sikpui le Ruoi hi ziekkop le ziekkop lo thu hi a nih. Thil poimaw tak siemfel chi niin ka hrieta. Chuleichun ka ngai ve dan ka hung tarlang a. Hi hi pom thei ni sien, mimal le pawl (organization) tum tumin record ah sie ni sien nuom a umin ka hriet.
Tulaia ṭhangthar haiin Sikpui ei hung hmang thar nawk hi kum 1964 a Imphal Branch Hmar Students’ Association in kan hung thaw kha a nih a. Kha hun lai khan Mizo haiin Chapchar Kût an hmang hlak kha inhnarum kan ti thei khop el a. Kan va ṭhang koma inhoi kan ti tak tak si nawh a. Chuleichun Hmar hai khom hin kum khatah ruoi (festival) voikhat bek nei ve hung rot a nih a. Pu L.Tawna MCS, ei Officer neisun rawiin, ama inah HSA Imphal Branch Committee inthungkhawmin SIKPUIRUOI tia nei kan hung rot a. Pu Ngurdinglien Sanate kha Inphal Branch HSA President a nih a, kei a Secretary ka nih a. A hming (Sikpuiruoi) ziekdan thu a hin thil sei tak khawm dawn lovin kan ziekzom a. Kei a Secretary ka ni leiin ka kut ngeia ka ziek a nih.
Tuhin thil indik le ṭha lema ṭhangthar haiin thaw nuomna le rotna an hung nei hi lawmum ka tih a. Chuleichun SIKPUI le RUOI hi a hrana ziek nisien a ṭha ka tih a. Ei pilepu hai khan SIKPUI an nei/hmang hlak ti ei hrieta. Sikpui an ti a, Sikpuiruoi an ti ngai naw niin ei hriet. Chun kût khom an nei ti ei hriet bok nawh. Social media tienga ko lo hmu danin mi thenkhatin Sikpui Kût ti nisien an hung tih a. Amiruokchu Hmarhai cho hin SIKPUI hi ei nei hlak a lo ni leiin ei unau hnam danghai laka ei danglamna tak a ni leiin kût belsa kher a ṭulin ka hriet nawh. Ruoi ti ruok hi chu kût/festival tina anga ei lo hmang tasa a ni leiin la sie chu a ṭha ka tih.
Rev. Kh. Thang Dailo
December 9,2019
Pune,
