Responsive Ad Slot

Kangreng Gospel Centenary ropui taka hmang

Sunday, December 29, 2019

/ Posted by VIRTHLI
Kangreng, December 29, 2019: Kangreng khuo chun an khuo indina inthawk kum za (100) tling lawmna ropui takin 28th & 29th December, 2019 khan Kangreng ah hmang a nih.

A ni khat ni 28th December, 2019 Inrinni zingkar dar 10:00 AM velin Centenary Lung hawngna hunser hmang a nia, Upa Hrangthanngur in a keihruoia, Centenary Lung hawngna Rev. T. Lawmthang in neiin, Centenary Choir a inthawk hlapawl ngaithlak a nih. Centenary dâr vuokna selected haiin neiin, hun tawp țawngțai Upa Velkhawlal Neitham in a hmang zovin Thingpui ruoi țhe a nih.

Lung hawngna nei a ni zovin Biekin Inkhawmna nei a nih. Pu Vanlalkung Neitham in a keihruoia, Hall hawngna Rev. Paul Rozarlien, EAC in a neia, Centenary message Upa S. Neițhuom in hrilna a nei, Centenary Fund dawlna neiin, Upa Hrangliensong in țawngțaina'n an hlân a. Rev. T. Lawmthang in Pathien thu thiem tak le, a ngai taphawt thiem ti em em chun hrilna a nei.

Inkhawm ținin taksa ruoi țhe a nih. Ni hni hmang a nia, a ni khat ni hin taksa ruoi țhe a nih. Hi taka hin Bawng 2, Vawk 1 le, Ar 5 thatin khuolrala inthawk fekhawm hai le, a khawsung mipui mi 500 bawr velin khawp taka kiltlang a nih.

Inrinni zanin Pu James Hrangchal in a keihruoia, Centenary message Upa Zolienkung Neitham in hrilna a nei. Centenary Fund khawnna neiin, Pastor Jones R. Joute in țawngțaina'n inhlanna a nei a, Upa Evan John in Pathien thu ngainuom umtak in a hril.

A ni hnina Pathienni zingkar inkhawm chu Pastor Lienzamang Gangte, EFCI in a keihruoia, Centenary message Upa Velkhawlal Neitham in hrilna a nei. Centenary Fund dawlna nei niin, Upa Mangkhawlal Pakhuong in țawngțaina'n inhlanna a neia, Pathien thu Upa Evan John in hrilna a nei.

Pathienni sun inkhawm ținin Seminer nei a nia, Resource Person in Pastor Jones R. Joute hmang a nia, Kristien Sungkuo ti thupuia neiin hun hlimum le țhuoitu a inthawkin hun hmang a nih.

A ni hnina Pathienni zan inkhawm Pro Upa Vanlalrem in a keihruoia, Centenary message Upa Zawlthanlien in hrilna a neia, Centenary Fund hi Upa Lalzarlien in țawngțaina'n inhlanna a nei. Upa Evan John in Pathien thu hrilna a neia, Finance Secretary in report pêkna hun a hmanga, Upa Hrangthanngur in lawmthu hrilna a nei zovin, Upa VL. Thanga in Benediction in Kangreng Gospel Centenary program chu kharna a nei a nih.

Pathienni zan inkhawm țin hin Fellowship cum Singing Festival (hla ruoi) țhe a nih. Hi hun hi Tv. Lalkiemlo le Nk. Lalnivarmawi haiin hnesaw takin an keihruoia, hla ruoi țhenaa țhang hai inhawi an ti tlang hlea, Local Artiste hieng - Pu Zoremlien Neitham, Nk. Grace Lalpienghun Zote, Pu Zosanglien Zote, Nk. Edilla Lalrinpui Huolngo, Nk. Jennifer Joute hai a inthawk mitin ngai nghawk umlo, hlasak thiem em em le Pathienin a ni dan ding ang taka rawl a pêk hai chun hla sakin, mipui nâ a tlei hle. Hi hun inpâm umtak el hi ditkhawp lo tak le, inro tak pumin hmang zo a lo ni tah.

Don't Miss
© all rights reserved
made with by Simon L Infimate