Responsive Ad Slot

Independent Church of India Kristien Thalai Pawl, Lamka in Diamond Jubilee hlimtlang takin an hmang

Sunday, December 22, 2019

/ Posted by Simon L Infimate
Tuithaiphai, December 22, 2019, Virthli ( ONP): Independent Church of India Kristien Thalai Pawl, Lamka chun December 22, 2019 khan Lamka ICI Biekin Campus ah Diamond Jubilee hlim le lawm takin an hmang. Hun hmangna hi Nk. Lal Nissi le Nk. Gloria Rochanmawi han hnetakin an keithuoia, Rev. Varsangsanglur in Lungdaw hawngna a nei zoin Alumni hai anthawkin  inpakna hla ' Halleluiah Chorus' ngaithlak a ni a, Jubilee Hlapui mipuiin sakna neiin Jubilee Dar vuokna nei a nih. Lawmlutna thucha Diamond Malsawmthang, Chairman, DJCC in hrilna neiin Youth Coordinator, ICI le Tuithaphai Presbytery ICI KTP le Lamka ICI Local Church Committee han greetings hrilna an nei . Hi huna hin khuo dang dang a KTP Unit han Jubilee lawmpuinain thilpek inhlanna an nei a, Pu Laldatlien Tusing, Chairman, DJCC in Souvenir thlirlawkna a nei zoin Pi Lalsangzuol in Souvenir  tlangzarna a, Rev. T. Remthang Hrangchal in Pathien kuomah inhlanna a nei. Pi Lalthiengzo le Pu Dardinglien Darngawn han kum 2000 hma poa Lamka ICI KTP chanchin le kum 2000 hnunga Lamka KTP chanchin hrilna an nei bawk.

Hi huna hin Rev. H. Chungthang Thiek chu Jubilee Speaker niin Jubilee thucha ropui tak tak el ngaithlak a ni a, ICI Central Choir, Blessed Choir han inpakna hla sakin hlaa rawngbawlna an nei a, Lamka ICI KTP han Pathien thu le inzawmin short play hmu nuomum tak el inentirna hun an nei bawk. Jubilee hmang huna hin Nk. Rebecca Ramengmawi, Secretary, DJCC in kum 60 sunga Lamka ICI KTP a thuoitu lo ni tah hai chawimawina thilziek inhlanna hunser a hmang a, Upa Gouzamang in hun khar tawngtaina le Jubilee Ruoi inhlanna a nei zoin hlimtling takin kiltlang a nih.


Zan hunah Tv. Lianminthang le Nk. Jennifer Lalbiekkim han program an keithuoia, Pu K. Neikham Tusing in hun hawng tawngtaina a nei zoin  hla ruoi the a ni a, tulaia hlasak thiem inlar tak tak el- Semikah Band, Nk. Lorinda Varte, Nk. Gloria Khawlhring, Nk. Hossanmawi Songate, Nk.Grace Ramhlukim, Nk. Florence, Nk. Christina Khawbung, Nk. Florence Sungte le Local artistes han inpakna hla sakin mipui fekhawm hai an inawia, hun hlim um tak el hmang a nih. Hi huna hin Mr le Ms KTP in Pu Kenneth Malsawmthang le Nk. Joyce Lalhmangaikim thlang an ni a, Pu  Pu Rambuotsai Tusing anthawk Pathien thucha ngaithlak a ni a, KTP Unit sung lawmman semna hai nei a ni zoin hun suktawp a nih.

Don't Miss
© all rights reserved
made with by Simon L Infimate