Responsive Ad Slot

SWF in Rûl chuk mi 2 an ṭhangpui; Rûl tur nei chuk 1 Antivenom vial 7 a thlawnin an pek

Sunday, October 13, 2019

/ Posted by Simon L Infimate
~ LRS Puruolte

TUIṬHAPHAI/CCPUR: Oct. 12, 2019 zantieng dar 6 lai bawr vel khan Mrs. Sumtinkhawl W/o Mr. James Lallungawi Biete of Rengkai Road, Rengkai, CCPur chu Rengkai Road a Life Café le Buongpui Compound inkar laia lampui sir lai Rabbit bu ding hlohna a lak/at laiin rûl pakhat hrietchieng loin a kut lai a chûk a, hi thu Save Wildlife Foundation (SWF) member Tv. Kevin Lalrintluanga Khawlhring in a hriet le in ruolin a ruolhai (SWF) a'n hriettir nghal a, inrang takin CCPur District Hospital Casualty an panpui a, a thisen test a ni hun ah rûl tur hmu a ni naw leiin a chûktu rûl hi rûl tur nei lo chi (Non Venomous) nia hriet a nih. Hospital a thisen check a ni zoin rúl i chûk hi Hospital a admit ngai loin in tieng in lawi pui nawk a nih. A chuktu rûl hi an vak hmanga ieng ang rûl tak am a nih ti chu SWF chun an hriet naw thu an hril.


Anni in vengna dinga an sie rûl tur thatna (Antivenom) khawm a ṭul ding chun tiin le in hmang tir el dingin in ringlawksa diemin hi hun a hin an um a nih.

Hi zo met hin naupang rûl tur nei i chuk an um thu SWF hai inhriettir a ni a, ngaiven nawk nghalin an thei ang anga ṭhangpuiin mihriem hringna sanhim dingin anni in vengna dinga an sie rûl tur thatna (Antivenom) chu a thlawnin an inhmang tir, an pek a nih.

Master Songlianlal (8 yrs) S/o Mr. Pausiamlian of Bisanmual Village, CCPur chu Oct. 12, 2019 zantieng bawk khan thimbut/dar 6:30 lai bawr velin a'nhnelna hmuna hlo lai rûl in a chuk a, a'nrang thei ang taka CCPur District Hospital Casualty panpui a ni a, Hospital ah rûl tur thatna a um naw leiin mimal (Private) a ngaituo dinga hril an ni a, rûl tur nei chuk naupang sunghai chu an beidawng hman hle a, a san thei ding Social Media a hai khawm zawng hiel a nih. Chuonglai zing chun Save Wildlife Foundation (SWF), CCPur in rûl tur nei i chuk an san thei le rûl tur thatna an kawl ti thu an hrietin anni hi biekpaw nghal an ni a, SWF chun inrangtakin Antivenom anni invengna dinga an sie chu an pek tah a nih. Master Songlianlal hi CCPur District Hospital a hin admit niin enkawl mek a ni a, Children's Ward corridor sir a room pakhat khum khawm um lo, Natna inkaisawng thei hai umna ding bika plywood banga siem fawm pindan cabin/room ah umin admit a ni zan a inthawk khan hi lai hmun a hin hi thu ei ziek lai chen a hin sie a ni a, ṭuong (floor) ah a zal el a nih. Hi ang a ni lei hin lungsiet a um hle a, thuneitu ha'n ngaiven vat hai sienla nuom a umin ṭha hleng a tih.

Ama hi SWF chun Oct. 13, 2019 Pathienni zingkar khan a hranpa taka kanna neiin kutchawi (sum) in damnaw hi an en a, Pathien kuoma ṭawngṭai pekna khawm an nei a nih. Hmatieng ah Antivenom a ṭulsa pal ding chun an la ngaituo pek nawk pei thei ding thu Master Songlianlal a sung hai kuomah SWF chun hi hun a hin an hril a nih.

Antivenom hi mi pakhat damna dingin 5-10/10-15 vial a ngai a, vial khat hi cheng ₹ 565 vel man a ni a, SWF hin an in vengna dinga an sie vial 7, cheng ₹ 3955 vel man ding chu a thlawnin an pek tawp a nih.

A chuktu rûl hi rûl chi tum tum hai laiah a ieng ang rûl tak am ti hrietchieng a ni naw a, a hmutu hril danin a rawng dum a nih. Hi rûl in naupang kut a chukna hnuhma en chun Cobra Family (Elapids Family) ni thei dinga ring a ni a, chu umzie chu Neurotoxic venom nei chi Chawngkawr annawleh Khuovangrul/Sawkvawm ni dinga ring a nih, tina a nih. Neurotoxic venom hin mi a chuk hai nervous system a attack a, enkawl ṭhat naw chun thi nghal theina a nih.

Sept. 12, 2019 khawm khan rûl tur nei chuk Mr. Matthew Letminthang Suantak S/o Paukhomang Suantak of S. Bualjang Village, Churachandpur, Manipur chu Antivenom ngaituo pekin 25 Assam Rifles HQ Veng Churachandpur le 31 Assam Rifles Kangvai, Churachandpur hai Antivenom an lakpui a, midang dang khawm hi hma hin rûl tur nei chuk hringna sanhimin Antivenom an lo lakpui/ngaituo pek tah hlak bawk a nih.

SWF hi ramsa, thing le ruo, vate, vadung le ramsa chi dang dang hai humhalna kawnga hmalatu an nih a, kum 3 liemtah sung khan ramsa chi hran hran 30 chuong an sanhim/sansuok tah.

Churachandpur khawpui/Tuiṭhaphai le a sevel a ramsa in a sukbuoi an um chun iengtiklai khawm ṭhangpui dingin an inpei zing a, In sunga Rûl lut khawm that el loin anni pawl hi ko thei zing an nih. Anni hi iengtik lai khawm wildlife le inzawma ṭhangpui ngai an um chun ko thei zing niin an inpei zing a nih.

SWF in an ngai pawimaw em em pakhat, Rûl tur neiin a chûk enkawl dan thu a khawm rawn thei zing anni thu hrilin 9774942883 call a biek le thaw dan ding inhriethriet thei a ni hlak ding thu an hril. Rûl tur nei chuk ṭhenkhat khawm rûl tur thatna damdawi umna hmun panpuiin mihriem hringna an lo sanhim tah hlak a nih. An operational Area sunga chu Rûl tur nei le tur nei lo chuk le inzawma inhrilhrietna nei nuom hai chun ko thei khawm ning an tih. First Aid khawm anni hin thaw dan ding practical in training an pek thei bawk.

Hi anga SWF an inpekzona le tlawmngaina hi inpak an um tak zet a, entawn tlak tak an nih.

Save Wildlife Foundation (SWF), CCPur hi tukum Manipur State Level a 64th Wildlife Week Celebration Grand Finale ni Oct. 7, 2019 khan Manipur State Film Development Society (MSFDS) Auditorium, Palace Compound, Imphal hmun ah Incentives for Protection and Conservation of Wildlife 2019 lawmman khawm Manipur sawrkar hnuoia Forest Department in a'nhlan a nih.

An YouTube channel en nuom hai tadingin - https://www.youtube.com/channel/UC3aZT67JbkBmCt7FHubggdw

Rúl tur neiin mi a chuk chang haia Hospital pan pui an ni hun ah rûl tur thatna Antivenom sawrkar hospital haia hmu ding a um ngai der nawna thu ah ieng lei am a ni a? ti chu indawnna lientak le mi tam tak hrietthiem lo a nih. Hi ang hun haiah Army hai Antivenom hmang pek an ni tlangpui hlak! Rûl tur nei chuk hai enkawlna ding Antivenom hi ieng lei taka vang am an'a? Sawrkar phalna le remtinaa inringsaa hospital le dawmdawi dawr haia sie/zawr dan a um naw am a ni? Sawrkar thuneitu ha'n mipui/mihriem hmakhuo ngaituoin hma hung la thei hai sien ti chu mi tam tak ditdan le ngaidan a nih.
Don't Miss
© all rights reserved
made with by Simon L Infimate