Responsive Ad Slot

NSCN (IM) le India sawrkar an inbiekrem, inremna thuthlung ziek vat beisei

Thursday, October 31, 2019

/ Published by Simon L Infimate
New Delhi, October 31, 2019, Virthli (ONP): India rama helna fesawt pawl tak tah le India anthawka zalenna suolsuok tuma nasataka thawtu NSCN (IM) hai chun India sawrkar leh inbiekremna an lo nei tah.

Kum 2015 a Framework Agreement an ziek hnungin NSCN(IM) le India sawrkar chu vawi iemanizat inbiekna an nei tah a, Flag le Constitution hran nei thua inbiekremna a um thei naw leiin inbiekna sunzawma um pei ani a. October 31 hi sawrkar thlungpuiin Naga issue chingfelna hun tawpni ding a ti le inzawmin vawisun khan sawrkar thlungpui aiaw Interlocutor le Nagaland Governor ni bawk Pu RN Ravi le NSCN (IM) hotu mi 15 hai chu New Delhi hmuna inbiekna an nei sunzawmna, hi inbiekna hi tumhni lai nei niin, chawhnunga inbiekna a tum hnina a chun Flag le Constitution chungchang ah inbiekremna an lo nei tah a nih.



Chanchin ei lakna in a hril dan dungzui chun Naga Flag chu condition um dinga pawm pek ani a, Constitution ruokchu remti pek anni naw thu dawng a nih. Naga Flag chu India ram sung le puotienga an thilthawna haia hmang phal remti pek ani a, amiruokchu sawrkar hmunpui,nipui le Office haia hmang ruokchu phal pek an la ni hri nawh. Vawisuna inbiekremna le inremna thuthlung (accord) ziekna chu nei vat ani ding thu le December 1-10 inkar sunga Hornbill Festival hmang dinga PM Narendra Modi in Nagaland a sir huna puong ani ding thu a hrilsa bawk a nih.

NSCN (IM) hin inremna tluontling siem tuma India sawrkar le kum 1997 a inthawka sawrkar thlungpui le ceasefire lo nei le 2015 a Framework Agreement lo ziek tah an ni a. NSCN (IM) hin Naga Flag le Constitution hran nei bakah Assam, Manipur le Arunachal Pradesh haia Naga mi hai delna ram po keikawp vawnga ro inrel theina an phut a nih. Assam, Manipur le Arunachal Pradesh hai chungchang le inzawmin vawizantieng khan BJP hotu Pu Himanta Biswa Sarma chun hieng State hai hi rawntlang anni hnunga mipui ditdan in thlutlukna siem ani chau ding thu a hril.
Don't Miss
© all rights reserved
made with by Simon L Infimate