Kohran inrêlbâwl chungchâng thusep ziek hmasa a khan, tiemtu hai anthawk chona le phurna nasatakin an mi pêk leiin thiem le thiemnaw thu hril lovin inthlahrung le insit tak pumin sunzawm nawk. Kohran thilthaw (activity) laia pawimaw tak chu Biekin inkhawm hi a ni leiin Biekin inkhawmna a hunser bîk hmang huna chanvo nei hai thlûrbing deu ei tih.
Pathien biek inkhawma hin mawihphurna bîk nei an um a, chuong mawphurna nei hai chun an chanvo uluk le felfai taka an hlensuok ngei hin inkhawm a suk inzâumin a suk puithu hlak. Hieng chanvo nei hai hin inbuotsei lawkna ṭha tawk an nei ngei hi duthusâm a nih.
1. Chairman
Inkhawm ṭhuoitu - Chairman mawhphurna a lien hle a. Inkhawma hun neitu hai ko suok tu el chau a ni nawh a, inkhawm boruok siemtu le enkaitu pawimaw tak an nih. Chuleiin Chairman hi uluk taka inbuotsei lawk ding a nih. Chairman chun a bul anthawka a tawp chenin inkhawm ṭhuoi hi a mawphurna a nih.
Pathien chawibiek dinga hunser a ni ang hrimin inkhawm ṭhuoitu - chairman chun Pathien Chawibiek Dinga Fielna ‘Call to Worship’ tawi fel takin nei hmasa ngei sien, chawimawina hla annawleh inhlanna tieng hla tlângin sak zo huna ṭawngṭaiin zui hi a mawikhaiin a huntawk hle. Call to Worship a chairman in Pathienthu tiem lang hin, a hnunga thuhriltu ding midang ruot an um tho leiin hrilzui tum kher ding an nawh. Chairman-in Pathienthu tiem ding tawma ‘Pathien thu lo ngaithlang ei tih’ ti hi tawi huntawk hle a. Ṭhenkhatin 'Bible chang tiem ei tih' tia an ṭan hin anfûk chie naw in anlang. Châng tiem lovin Pathienthu ei tiem lem hlak.
Chairman in Pathienthu a tiem zovin an ṭawngṭai tlângpui. Chairman ṭawngṭai hi tawifel takin inkhawma hung hai titakzeta Pathien an pawl theina dingin ngen sien, ṭhenkhat chun thil hrang hrang sâmkuolin ṭantu hril awm ding chen sâmsa an um hlak. Hla thlang huna khawm hla ṭhuoitu le mipui hai zawng buoi kher ngailo dinga hlabu le hla number fel taka hrilsa nghal hlak ding a nih.
2. Kohran Thupuong
Kohran thupuong hi Secretary sin a nih a, a remchangnaw a ni chun Asst Secy in a hmun ah thu puong dinga ngai a nih. Kohran thupuong hi inkhawm laia thil pawimaw pakhat ve a nih. Secretary in a thu puong ding hin kohran mipui laia puong awm chi chu tawifel taka puong thei dinga insingsa lawk thei sien a ṭha. A thei chun a hmasatakin Kohran inkhawm programme puongin, chu zova thil dang puong ṭul haiin zui sien. Kohran thupuong huna thawsuol a um pal khawma innui mani, fiemthu mani, kohran mipui tadinga ṭangkai lo hrilsa hin Pathien biekin inkhawm a suk ho thei. Pathien chawibiek a inkhawm ani ang hrimim inzaum taka thupuongtu in thu a puong ding a nih. Nuhmei pawl, KṬP le a dang dang hai thupuong ding a um châng kohran thupuongtu kuoma ziek ngeia pêka, kohran thupuongtu in vawikhata a puong nghâl hi a felfaiin hun a lâk tlawm pha.
3. Ṭantu
Inkhawm ṭantu hi chanvo pawimaw tak a nih. Biekin inkhawm ṭantu hi a tlângpuiin Kohran Committee-in rawngbawltu dinga a thlang suok bîk laia ṭhang ve an nih. Ṭantu chu kohran mipui aiaw a chanvo hmang a ni leiin uluk taka inbuotsei ve ding a nih. Pathienthu a tiem huna a bu hming, bung le châng fie takin hril hmasa ngei sien, a tiem zo huna, "Lalpa'n a thu malsawm raw se" ti ngei hlak ding a nih. Ṭantu hin a ṭawngṭai huna kohran mipui aiaw a ṭawngṭai a nih ti inhrie in, mimal ṭawngṭaina a thu sam hlak ang hi hmangnaw hrâm nisien, Pathien kuoma ngenna khawm mimal hnina ṭawngbau 'Ka' ni lovin kohran mipui hai huom "Kan" ti thumal hi hmang hram hlak ding a nih.
4. Thawlawm Inhlântu
Thawlawm inhlantu hin inkhawm ṭhuoituin thawlawm inhlân dinga ko ani angin thil dang tamtak hril kuol lova thawlawm inhlân el hi a felfai. Thawlawm petu an um lei, pêk ding ei nei lei le pêkna lungril ei nei leia lawmthu hrilsa chu a remchang laiin Inkhawm inhlân, Thuhriltu ta dinga ṭawngṭai le mani ta dinga ngên le thil dang hrilsa hi a ṭul lêm nawh.
5. Thuhriltu
Kohran rawngbawlna a ei ngaipawimaw em em chu thuhrilna hi a nih. Thuhriltu umna ding pulpit hi mipui hma bang le bang kâra a lailung taka ei siem hin a hril chieng hle awm. Kohran mipui ta dinga thlarau bu chawmtu a ni leiin Thuhriltu chun a thei ang tawka nasain anpuocha ding a nih. Pulpit anthawka an inpuocha ṭhanaw thu a hril ding an nawh, a inpuocha ṭhanaw thu a hril anthawk khan thlaraua mi a chawmna ding boruok a kei hnuoi thei. Rawngbawlna chanvo pawimaw a ni ang ngeiin a mawphurna chanvo chu a ngai pawimaw ding a nih. Intihthlarau mi lei ringawta pulpit tlânga a dawn thar le a tla chawp hril dinga beisei an ni nawh. Pathian thu hi inza a um leiin a thuhril ding chu kohran mipui chawmna ding tawka inpuocha kha a mawphurna a nih. Pulpit hi ngampa taka fiemthu thawna hmanglo hrâm a ṭha bawk. Thuhriltu a lo hlim deu a ni khawma, Pulpit ah a kai hmunga lâm dinga ṭum suk nawka pulpit a ruoka maksan hi a mawi nawh.
6. Khuongpu, hlapawl le malzai
Biekin inkhawmna a Khuongpu hi inhma lai lem khan chu an ngai pawimaw hle, mi nazawng ṭhang an phal ngai nawh. Khuongpu hi rawngbawlna pawimaw a ni ve leiin a remchang nazawng vuok el ding an nawh. Khuongpu le hla ṭhuoitu hin Biekin inkhawm boruok nasatakin a suk danglam thei leiin a hun le hmun a zira hla thlang le lâk thiem a ṭul. Khuongpu, hla ṭhuoitu, malzai le hlapawl hai hin mani dit le mawi ti zawng thlang a awl khawp el. Mani dit le mawi ti chau thlang lovin kohran mipui chawm thei ding an thlang thiem a pawimaw. Hlapawl le maizai ṭhang ding hin mawihnai taka inchei ding a nih. A thlîrtu lungril la pêng thei le mit khamnaw tawka inchei thiem a pawimaw hle.
