Responsive Ad Slot

Indian Super League ah Hmar tlangval inkhel ding

Saturday, October 19, 2019

/ Published by Simon L Infimate
Shillong, October 19, 2019, Virthli (ONP): India rama football league insangtak Indian Super League ah Hmar tlangval Alfred Lalruotsang S/o Upa Lalramzau Hmar, Hmarkhawlien, Cachar, Assam chu NorthEast United FC hminga inkhel dingin an lo lak fel tah.


Tv. Alfred hi nikuma Bengaluru FC han an Academy a training pe dinga India ram hmun hrang hranga talent nei tha an zawng huna kha thlang ve a lo nih. Thlangdawk ani hnungin JSW Bengaluru FC Under - 15 Residential Academy, JSW Steel Plant, Vijay Nagar, Bellary, Karnataka ah training la in, 2nd Khelo India Youth Games 2019 a khawm khan Karnataka U-17 hminga inkhelin an team chu Champion Nopui a lo dawmpui ta bawk a nih.

Indian Super League 2019-20 season a dingin NorthEast United FC chun Tv. Alfred hi an Midfielder dinga an lak ani a,  tuhin Guwahati hmuna NEFC chu zawm felin season thar a dingin an training mek a nih. Training lo petu le ISL Defending Champion Bengaluru FC hai leh hung tlung ding October 21 hin Bengaluru hmuna an inkhel tan ding a nih.

Indian Super League a hin Hmar tawng hmang inkhel phak chu ei um hriet ala ni nawa, Tv. Alfred Lalruotsang hi a hmasatak ni dinga ring a nih.

Kum naupangte a hieng chen chena inkhel thei Hmar tlangval ei nei hi ei lawm bek bek a, hi neka insang lem haia khawm lan khel phak ngei dingin Virthli chun ditsakna insangtak ei inhlan a nih.








Don't Miss
© all rights reserved
made with by Simon L Infimate