Silchar, October 19, 2019, Virthli (ONP): October 16, 2019 nia Saihriem Punji, Cachar District, Assam hmuna Hmar nunghak Elizabeth Hmar Sungte nunrawngtaka sawisak ani hnunga an thatna le inzawmin vawisun khan Hmar Students' Association hmalakna hnuoia DC, Cachar office tuola Nk. Elizabeth a sunghai, inchuklai le pawl dang dang a thuoitu hai an pungkhawm. Hi huna hin placard hai chawiin mipui pungkhawm hai chun Nk. Elizabeth thina chungchanga sawrkar in dan ang taka hma la dingin le inhnamhnawina nei hai chunga hremna pe dingin an khekpui.
HSA thuoitu hai chun chanchinbumihai inpawlpuina an neia, hieng ang tuolthatna hi an dem hle thu le an lungawinawna hai an inzawt. Chanchinbumihai inpawlpuina an nei zo hin HSA thuoituhai chun DC a um remchang naw leiin, District Development Officer hmuin memorandum an pek. Hi an lekha a hin Nk. Elizabeth a sunghai chu zângnadawngna sumfai Rs. 20 lakhs pe dingin an ngen a nih.
Tv. Lalsiemthar Hmar, Vice President, HSA Barak Valley JHQ chun vawisunni chena DC le SP in Nk. Elizabeth a sunghai kanna an la nei naw chu an dem hle thu a hril a, an pasie lei le khuo kilkhawra um anni leia an uksak nuom nawh? tiin zawna hai a siem bakah Cachar Police haiin inrang taka Nk. Elizabeth chunga kutthlaktu hai an manna le inzawmin lawmthu a hril bawk a nih.
Hienglai zing hin Cachar Police hai chun Nk. Elizabeth chunga kutthlaktu laia thang ni dinga ringhla le tlanhmang Moina Das chu vawisun an man. Ama bak a hin zanikhan mi pathum an lo man ta bawk a nih. Chuong hai chu;
1. Samiran Das (Elizabeth a sung hai le buoina lo siemtu. Nk. Elizabeth a thattutaka ringhla Rajen Das (inkhaihlum tah) in kha zana Zu a dawnna In neitupa)
2. Shishir Das (Samiran Das a naupa)
3. Biswajit Das (An khaihlumpa sangpa)
Kutthlaktu ni dinga ringhlatak Rajen Das chu inkhaihlum sa in Zirtawpni khan hmu a lo ni ta bawk a nih.
