Responsive Ad Slot

HSA Founding Day Muolhoi ah ursun taka hmang

Friday, October 4, 2019

/ Posted by Simon L Infimate
Halflong/Muolhoi, October 4, 2019, Virthli (ONP): HSA Muolhoi Unit huoihawtna hnuoiah October 3, 2019 zan hunah The 80th HSA Founding Day ursun takin C.H Khawthlang Memorial Hall, Muolhai ah hmang a nih. Hi huna hin Chief Guest in Pu Ngamrothang Hmar, Hon'ble Executive Member, North Cachar Hills Autonomous Council (NCHAC) a thang, Guest of Honour le Functional President in Dr. Lallienkim Tuolor le Insp. J.S. Khawbung, Intelligent Branch Inspector, Diphu, Karbi Anglong hmang an ni a, Chief Host in Pu Sumneikung Thiek, President, HYA, NC Hills Joint Headquarter a thang.



Hun hmangna hi Ms. Bethel Tuolor le Mr. Johnsondia Gangte han an keithuoia,  Upa H.L. Sanga Neingaite, President, MVC in hun hawng tawngtaina a nei a, Mr. Kenneth Lalhlimsang Hmar, Vice- President, HSA Muolhoi Unit in lawmlutna thucha a hril zoin Mr. Albert L. Pangulate, Secy., Muolhoi HSA Unit in Khuollien hai chawimawina thilpek inhlanna hunser a hmang.


Chief Guest Pu Ngamrothng Hmar, EM, NCHAC in thu a hril huna vawisun nia lekha inchuk mek HSA members ditum tak tak hai, tumrunu le taimakna thar neiin inchuk ei tiu a. Amiruokchu, lekha  inchuktuhaiin sawrkawr sin hmuin hlawtling vawng kher naw mei nih a, chuleiin sin dang dang mani thiem zawng le inhnikna zawng hai hrein thil dang dang fak hmuna dingin ei thiem a tul a, ei thaw a ngai a nih tiin a hril. Hi huna hin tukum examna a athaw tha bik zuol HSA Muolhoi Unit sunga members hai Meritorious Award inhlan an nih a, Pu Joseph V. Tuolor, Gen., Secretary, HSA GHQ in " Ei tawng ei hratna" thupuia hmang thuhrilna hun a hmang.


Hi huna hin Guest Artiste- 'Pengpelep' han hnam hla thiem le mawi taka sakin mipui an awi a, Local artiste hai khawma hla in mipui fekhawm hai an inawi hne hle. Hi baka hin hnam lam hmu nuom um tak tak el HSA members han inentirna hun an hmang.

HSA Muolhoi Unit chun October 3, 2019 zing hunah tawngtai ruolna le HSA Flag keipharna hunser  an hmang. Hun vawngtuin Mr. Ezekiel Parate a thang a, Pastor James R. Ruolngul in hun hawng tawngtaina a nei zoin President, HSA Muolhoi Unit in lawmlutna thucha hrilna a nei a, hi hunser hmangna hin School Chapters han hnam lam mawi tak el inentirna hun an hmang a, Nk. Jedidia Joute in hla in mipui fekhawm hai an awi bawk.
Don't Miss
© all rights reserved
made with by Simon L Infimate