Responsive Ad Slot

Aizawl ah HSA Day vawi-80na ropuitaka hmang

Friday, October 4, 2019

/ Posted by VIRTHLI
Aizawl, 3 October, 2019, Virthli (ONP): Hmar Students' Association (HSA), Joint headquarters, Aizawl huoihawtna hnuoiah October ni 3, 2019 khan Chanmari YMA Hall, Aizawl ah HSA piengchampha vawi-80na ropuitak le hlawtlingtaka hmang a ni a, hi hun hi Zoram Medical College (ZMC) Director hmasatak le ni lai mek Dr. L. Fimate chun khuollien in a hmangpuia, khuolzaum in Pu J. Lalchhanhima, Vice President, Hmar Inpui, General Headquarters in a uopa, Pu L. Rothanglien Khawbung, President HSA, GHQ chu Day intlungtu (Chief Host) niin Pu LT Hrangchal, IPS (Rtd) chu Functional President a nih.

Hun khatna hi HSA Jt. Hqrs, Aizawl adviser Pu K. Lalramtana le Nk. Lalrinzuali in an keihruoia, Rev. Lalrotluong, Regional Secretary, EFCI Mizoram Region in hunser a nei zovin HSA Aizawl Jt. Hqrs President Pu Henry L. Khojol in lawmlutna thucha a hrila, General Secretary Tv. Jerry H. Pulamte a'nthawkin report ngaithlak a ni bawk.

Khuollien Dr. Fimate chun ram le hnam hmasawnna ding chun inchukna tieng thanglak a tul thu hrilin, harsatna le retheina palthlang ngam dingin inchuklaihai an cha a, Mizoram ah Hmar nauhai chu second citizen anga in ngai hnuoi lova, a ram mi indiktak le mani hnam zierang le tawnghai khawm huoi taka hmang dingin an cha bawk a nih.

Hun khatna a hin Aizawl Jt. Hqrs President lo ni ta hlak mi 11-Dr. Lalsiamhnuna (Founder President), Pu Laltlanchhunga Hmar, Pu James Hrangchal, Dr. Paul B. Chonzik, Pu HP Lalthlahliana, Pu JC Tlangthansiama, Pu HB ROhmingliana, Pu Lalhratliana (L), Pu Lalrawngbawla Ralte, Pu Lalremsanga Biate le Pu K. Lalramtana hai kuomah chawimawina inhlan a ni a, anni baka hin Pu Lala Khobung, Mizoram Law Commission Chairman le Pu L. Rothanglien Khawbung hai kuomah Special Award inhlan a ni bawk.

Hi huna hin ram le hnam, inchuklaihai, hnam thuoituhai le Kohran thuoituhai ta dingin tawngtairuolna Rev. V Ramchuoilo Varte, Presbytery Superintendent, ICI Aizawl Presbytery keihruoina ah nei a nih.

Hun hnina hi HSA Aizawl Jt. Hqrs Vice President Pu Samuel Zoramthanpuia le Nk. Mercy Khawlhring ha'n hne takin an keihruoia, inchuklai thaw tha zuol bik hai mi 16- M.Phil-1, PG-2, MBBS-1, Graduate-6, Class XII-3 le Class X mi 3 hai kuomah chawimawina citation inhlan a ni a, anni baka free coaching for competitive exam a tutor mi 6- Pu Kapremvel Pulamte, Pu Joshua Z Khawbung, Pu Travis Ramsang, Nk. Lily Sangpui, Pu Malsawmthang Infimate le Tv. JL Sinate hai kuomah chawimawina inhlan a ni a, HSA GHQ in a i tum naupang thiemthei bik sungkuo harsa hai kuoma inhlan hlak One Time Scholarship (Rs 5,000) chu Tv. Hmangaizuol S/o Zalawmthang tuta Zirtiri Science College a B.Sc Chemistry inchuk mek kuomah inhlan a nih.

Function nei sung popo hlasakthiem - R. Lallawmsanga, Marina V Varte, Margy Lalremruati, Thawlehnaniropuia, Rebeca Sellate, Laltluangzeli, Lalrawngbawla Ralte le Mary Sungte ha'n an rawl mawiin mipui fekhawm hai an in awia, mipui na a tlei hle. Hi baka hin Govt Aizawl North College a HSA member haia inthawkin hnam thuom inentirna nei a ni bawk. Khuolzaum, Chief Host, Functional President, HSA founder president le Hnampual Zirlai Pawl hai a inthawkin thu thatak tak ngaithlak a ni bawk.

Hun hnina a hin kum 2019-2021 sunga thuoitu dinghai thlangna nei a ni a, hieng a hnuoia hai hi thlangtling an nih.

1. President: Pu Henry L. Khojol (Uncontested)
2. Vice President: Pu Kapremvel Pulamte
3. General Secretary: Tv. Jonathan Lalremsiem (uncontested)
4. Asst. General Secretary: Tv. Ngurrivung
5. Fin. Secretary: Jerry H Pulamte
6. Treasurer: Nk. Jasmine Ramtharmawii (re-elected).
Thuoitu thar hai hi Rev. Lalhmunsang, PS EFCI, Aizawl Presbytery in sesamna an nei tir a nih.

Zantieng Bawngsa chartang le Sizo hmepawk ruoi the a nia, mipui thahnem tak pungkhawmin sawrkar milien, Hmar Inpui thuoitu le prominent citizen tam takin an uop bawk a nih.

Don't Miss
© all rights reserved
made with by Simon L Infimate