October, 03, 2019, Virthli (ONP): Hmar hnam sunga pawl laia upa pawltak le hnam kalchawinaa tangkai em em le hnam pakhat anga mi keikhawmtu Hmar students’ Association (HSA) piengchampha HSA Day tia ko chu HSA umna hmun haia inserin an hmang. HSA Flag keipharna, lung phunna, inchukna tienga inhrilhrietna, inchukna tienga thawtha zuol hai le thuoitu hlui hai chawimawina, thisen pekna hun haiin an hmang a nih. HSA Day hin HSA JHQ le Branch tin anthawka thlangdawk a um inchuklai insung khawsakna tienga harsa, lekha inchuk nuom si le thiem thei si hai chu HSA GHQ One Time Scholarship (Rs.5000/-) inhlanna hai an nei.
CCPur HSA JHQ chun Sielmat tawngtaina tlang-ah "Ei tawng ei hratna" ti thupuia hmangin hi Day hi inserna an nei. Hi hun hi HSA GHQ thuoitu, HSA CCpurJHQ hnuoia Unit hai kim takin an thang baka HPC(D), General Headquarters khawma hi hunser hi an uop ve a nih.
Imphal HSA JHQ khawmin Hmar Community Hall, Lamphel ah sun huna District Health Society, Imphal East le thangkawpin Thisen pekna hun neiin mi 40 chuongin thisen an pek. Zan huna HSA Day le inzawmin Felicitation Programme hmang ani a, hi huna hin Pu Joseph R Hmar, President, Hmar Inpui, GHQ chu Khuollien a hmang ani a, inchuklai thawtha zuol hai le pensioner hai chawimawina thilpek inhlanna le rimawi ruoi an kil tlang.
Jiribam ah Jiribam Unit huoihawtna hnuoia inser ve ani a, sun huna Flag keipharna le Pathien kuoma lawmthu hrilna hun hai hmang niin zan huna hlawtlingna changhai chawimawina inhlanna le inchuklai hai infuina thucha hrilna Rev. Benjamin Shakum, Jt Secy . Hmar Inpui GHQ i/c Jiribam District & Assam State in a nei. Manipur ah hieng hai bak a hin B. Huonveng, Ankhasuo le khuo iemanizat haia khawm inser ve a nih.
Sinlung Hills Council headquarter innghatna Sakawrdai a khawm hi ni hi inser ve niin, Pu Lalthlamuana Hmar, CEM, Sinlung Hills Concil chu khuollien a hmang a nih. Hi huna hin HSA chanchin le HSA hnam tadinga a tangkai zie hai hrilna, inchukna le inzawma Debate, naupang hai drawing competition, hnam lam inentirna le chawimawina chi hran hran inhlanna hai nei a nih.
HSA Aizawl JHQ chun YMA Hall, Chanmari ah HSA Day inserna le Thuoitu thar thlangna in an hmanga, hi huna hin Dr. L. Fimate, Director, Zoram Medical College chu khuollien a hmang niin inchuklai fekhawm hai chu infuina thucha tha tak tak hrilna a nei. Hi huna hin thuoitu hai chawimawina, HSA One Time Scholarship inhlanna, rimawi le taksa ruoi hai the a nih. Aizawl JHQ thuoitu thar ding hai thlang nei ani a, President dingin Pu Henry L Khojol, Vice President dingin Pu Kapremvel Pulamte, Gen. Secretary dingin Tv. Jonathan Lalremsiem, Asst. Secretary dingin Tv. Ngurrivung, Finance dingin Tv. Jerry H Pulamte le Treasurer dingin Nk. Jasmine Ramtharmawii hai thlang an nih. Mizoram a hin Vairengte, Kolasib le hmun dang dang a hai khawm inser ve a nih.
NC Hills le Cachar a chu Hmar khuo tin deu thaw in an insera, HSA Assam Hills JHQ innghatna Haflong/Muolhoi a chun Muolhoi Unit huoihawtna hnuoia puithu taka inser a nih. Zingkar huna HSA Flag keipharna le Pathien kuoma lawmthu hrilna tawngtaina nei a nia, zan huna sunzawm niin Pu Ngamrothang Hmar, EM, NCHAC chu khuollien a hmang a nih. Hi huna hin HSA Day thupui "Ei tawng, ei hratna" ti chu Pu Joseph V Tuolor, Gen. Secy. HSA GHQ in hrilna a nei. Inchukna tienga thawtha zuol mi 50 vel bawr hai kuoma chawimawina inhlan a nih. Hmar rimawi khawvela inlar em em Pengpelep haiin mipui hlaa inawina an nei bawk a nih.
Silchar Branch khawmin Flag keipharna, HSA chanchin hrilna le HSA Calendar 2020 tlangzarna an nei. Hi huna hin inchuklai (Student) hai, sin zawng mek hai le HSA thuoitu hai le Hnam thuoituhai tadingin tawngtairuolna an nei.
Guwahati khawpui a khawm HSA Flag keipharna le Pathien kuoma lawmthu hrilna nei ani bakah Delhi khawpui a khawm Hmar Christian Fellowship Centre, Munirka hmuna inser a nih. Hi huna hin tawngtairuolna le HSA Day Cake mawi tak el cut na an nei bawk a nih.
HSA General Headquarters Office innghatna HSA Campus, Rengkai chu HSA Day inserna in mawi taka candle a sit var ani bawk a nih.
