Responsive Ad Slot

Henchungpunjee a natna hrietchieng loa thi 4 tling; Medical Team in an pan

Wednesday, September 25, 2019

/ Posted by Simon L Infimate
CCPUR, Sept. 25, 2019, Virthli (ONP): Tulai hnaia Henchungpunjee (Sunggakhal) Village, Pherzawl District, Manipur a natna hrietchienglo hri inleng a hril rik le hi natna hrietchienglo hri leia thi nia hril mi 4 hai thina le inzawma social media a chanchin thedar a um le inzawmin a khuomi, bieltu MDC Pu Lal Hossan le bieltu MLA Dr. Chaltonlien Amo hai chu thil umdan hrietchiengna dinga inbiekpui a chanchin suizui a ni a, Sept. 25, 2019 sun khan hi natna le thina le inzawma enfelna le a ṭul ang anga hmalak a ni theina dingin New Life Trust (PHC Sibapurikhal/Ankhasuo enkawltu NGO le Hengchungpunjee bieltu) le Medical Team ha'n damdawi le a ṭul ding awm hai chawiin Imphal a'nthawk PHC Sibapurikhal (Ankhasuo) le Hengchungpunjee Village hai an pan thu bieltu
MLA a'nthawk hriet a nih. New Life Trust hai hi Imphal a meeting pawimaw nei hi thu an hriet char a chang nghal an nih. Anni NGO bawk hi Senvon, Pherzawl District a khawm umin mipuiin an sawr hle a nih.

Bieltu MDC le MLA chun hi thil hi an ngai pawimaw hle a, an thei tawpa an hmalak dan hai khawm ei inbiekpuina hun ah an hrillang.

Thina tuok mi 4 hai chu (1) Miss Ludya Lalsangzo (13 yrs) D/o Lal Tharlien, Thini - 10.08.2019; (2) Miss Elizabeth (13 yrs) D/o Lalrothlang, Thini - 14.8.2019; (3) Master Michael Lalrochan (7 Months) S/o John, Thini - 17.09.2019 le (4) Miss Fatia Begom (21 yrs) D/o Jabir Hussain, Thini - 23.09.2019 hai an nih.


Hengchungpunjee hi an khuo a inthawka PHC umna hnaitak chu PHC Sibapurikhal (Ankhasuo) le Jiribam District Hospital, Jiribam a ni a, 30 KMs vel dinga hla a um a ni thu a khuomi hai ei inbiekpui huna ei indawnna an dawnna ah an hril.

Hi natna hri le thina tlung hin khuo mipuihai a sukbeidawng hle niin social media haia suklangin a um a. Hi natna invawi khawm an um mek nia hril a ni bawk. Tuta ṭuma Doctor/Medical Team in an enfel hun ah thil umdan a hung chieng vat tah beisei a um.

Hi natna a thi hai umdan tlangpui ei suizui chun an taksa inkuona an bau, hnar le a dang a dam thisen a suok bakah an phing na an ti hle hlak nia hril a nih.

Biel MLA chun hril rika aum tir lai khan doctor le team chun an lo ngaiven tah thu a hril a, Aug. 17, 2019 vel khan doctor in khuo sunga dam naw hai enfelin, a hrie taphawt fekhwmin an in check-up a, damdawi hai khawm a um rem ang ang sem a nih. Chuong laizing chun hi natna ang char tho hin Sept. 23, 2019 khan a thipui an hung um nawk a nih! Sawrkarin dan angin lampui a um thei chun thina tuok hai hi zangnadawmna/ex gratia pe sienla nuom a um.

Sawrkar dan le dun, a ni angtaka hraw ding lem chun DC hlak Churachandpur a um dai ana, kar hla taka um a ni bakah an umna hnai tak PHC ah VA in lekha pe a an in report khawm a la ngai a, a kalhmang, a neu neu a um laiin bieltu MDC le MLA ha'n theitawp an suona leiin an hmatieng ngaiven theiin a hung um a nih. Pherzawl District harsatna chi tum tum hai hi tuta BJP inrawi Manipur sawrkar hin a ngaiven a, hma a lakpek zung zung nuom a um hle.

Sawrkar thil a tam lem deuthaw ding ralkanga enkai/enkawl a nina hi BJP inrawi Manipur sawrkar hin hung thlakdanglam thei vat sien ti chu mipui duthusam le ṭap hla a nih.
Don't Miss
© all rights reserved
made with by Simon L Infimate