Tuithaphai, September 27, 2019, Virthli (ONP): Hmar National Union (HNU), Executive Working Committee (EWC) hai chun September 26, 2019 dar 1:00PM khan Pu L. Thanzam Pulamte, Gen., Secy., HNU GHQ a chengna In, Zote veng, Rengkai ah meeting neiin inrawntlangna le hmatieng peia hma lak dan ding hriltlangna an nei. Hun hmasa tieng Upa Zarzolien, Jt. Secy., HNU GHQ in hun hawng tawngtaina a nei zoin meeting hi tan a ni a. Hi huna hin ro chi tum tum rel a ni a, tukum a HNU General Headquarter huop sunga Unit tin le Block tina election nei dan ding, hmatieng peia HNU hma lak dan ding, hi neka hrat nawk zuola a fe pei dan ding hai hriltlang a ni a, palai fekhawm han an ngaidan hai hrilin ro chi tum tum rel niin thu tamtak hi huna hin rel le putlut a nih.
HNU GHQ chun hi huna hin HNU General President ni lai mek- Dr. Chaltonlien Amo , Manipur Financial Year 2019-2020 a dinga Public Account Committee(PAC) Chairman a tling lawmpuina hunser khawm hmang nghal a nih. Upa Lalsanglien, Rtd. ZEO, EWC member, HNU in ruoi inhlanna le hun khar tawngtaina a nei zoin lawmna ruoi kiltlang a nih.
