CCPur, August 17, 2019, Virthli (ONP): Pu Siekzapau Pulamte (86), Apollo Veng, CCpur chu brain tumor leiin vawituk dar 7 vel khan ei lo the tah. Pu Siekzapau Pulamte hi Sawrkar sin LDC anthawka tanin SDC chena pension thei, Kohrana mi tangkai tak el, nauhai inchukna tieng panga Hmar lai chu a hlawtling pawl ve a nih. Pu Siekzapau Pulamte hi Virthli in nuhmei Admin tlawmte chau a nei laia mi Nk. Rose Pulamte a papui a nih.
Pu Siekzapau Pulamte, SDC (Rtd) (1933-2019): A CHANCHIN TAWI
Pu Siekzapau Pulamte (86) hi 1st January 1933 khan (L) Lienpum (Ex. Havildar) le (L) Kapneikim hai inkarah Muoldak khuo a pieng a nih.
Inchukna le a sinthawna: Thingtlanga um nihai sienkhawm a pa sepoy niin lekha inchuk thei ding ngirhmunah a um hlauh a. 1955 khan ThienlamVaiphei High School a (tuta Churachandpur Govt. HS/S) inthawk Matric a pass a, khang laia an umna Vaiphei ram/ biela Matric pass hmasatak a ni nghe nghe a nih. 1959 khan Manipur sawrkar hnuoia LDC sin interview a tling. 1959 - 1972 inkar sung LDC (Zilladar) sin Churachandpur SDO Office ah a thawa, 1972 - 1979 inkar sung Revenue Inspector, Bishenpur le Moirang ah, 1979 - 1996 inkar sung Sub-Deputy Collector sin hi Henglep, Churachandpur DC Office le Chongkhozo ah a chel a nih. Kum 37 chuong zet sawrkar sin a thaw hnungin December, 1996 khan SDC-in sawrkar sina inthawkin a pension a nih.
Kobrana a rawngbawlna: Kum 1942 khan Kristienah inpein, kum 1984 khan chieng taka piengtharna a chang a. Pathien rawngbawlin a thei ang angin kohranah an hmang hlak a. Evangelical Methodist Church of East India (tuta Wesleyan Methodist Church of East India tia ko tah) Board of Directors-ah Founder Vice Chairman (1987) le Member (1988) a nih. Sorkar sin a chawlsan hnungin WMCEI kohranah mawphurna hrang hrang a chel a, chuonghai chu - Regional Headquarters Office-ah Accountant (1998-2003); Executive Comm. Member (1998-2006); Regional Treasurer (2003-2009); Wesleyan Byron College Board-ah Member (2001), Treasurer (2002); Hope For Children-ah Associate (2003-2006): Thutak Puongtu Magazine Board-ah Member (2000), Circulation Manager (2003); Pay Commission-ah Member (1996, 2017); Regional Finance Committee-ah Secretary (2002), Member (2015-17. 2018-2020). Chun, Tuithaphai District Board of Administration-ah Treasurer (1991-94, 1995-98, 2003-05) le Convener of Auditors (2003-05) a ni bawk. Kum 2006 khan kohran sina inthawk inchawl tir a lo ni tah bawk.
A nuhmei, a nauhai le a tuhai: June 25, 1960 khan Darrolut (Luti) d/o (L) LZ Kapa Khawzawl leh Lamka ICI biekinah an innei a, nau pasal pali le nuhmei pakhat an nei. June 25, 2020 hi a nuhmei le an innei Diamond Jubilee ding a nih. An nauhai -
1) Upa (Dr.) Lalsiemlien Pulamte, Senior Principal Scientist (CSIR-NISTADS, New Delhi). A nuhmei Rakily Lalrotluong leh nau pahni an nei.
2) Pumzalal Pulamte, Under Secretary (M/o Chem. & Fert., New Delhi). A nuhmei Dr. Alice Lalsangkim leh nau pahni an nei.
3) K. Remsang Pulamte, Chief Manager (Shipping Corp. of India Ltd, Kolkata). A nuhmei Lamkhonei leh nau pahni an nei.
4) K. Himpui (Churachandpur). A pasal Rev. Khamkhosiam Hangnung leh nau pali an nei.
5) E. Lalringum Pulamte MPS (Assistant Commandant. 1st IRB, Churachandpur).
Tu sawm (pasal 5 le nuhmei 5) a nei a, a upatak, Tv. Laldawmsang Pulamte (B. Tech student. IIT-Kanpur) le a naupangtak Lalmalsawm Hangnung (Cl. III student) an nih. Nau hming 8 a phuok bawk, Ama hi mi tawng tlawm, zainem, tawng dam duom hmang hlak, mi indik, ruol ngai hlak mi le mi ringzo le ngainat a hlaw hlak.
