Responsive Ad Slot

Assam Public Service Examination Rules 1989 (Siemthat) le Cachar, Hailakandi le Karimganj a Hmar hai beidawngna

Saturday, August 17, 2019

/ Posted by Simon L Infimate
1. Thuhma

July 23, 2019 khan Assam sawrkarin Assam Public Service Combined Competitive Examination Rules 1989 chu a siemtha a. Gazette Notification khawm nikhat khan a lo insuo tah. ACS/APS Exam nawk a mains exam pha chu Cachar, Hailakandi le Karimganj Hmar haiin Bengali annawleh Assamese annawle Bodo tawng paper pakhat bek ei laksa ngei ngei a tul tah. Amiruokchu, NC Hills le Karbi Anglong a ei unau Hmar hai chun Bengali/Assamese language paper hi an lak naw khawma ACS/APS exam fethleng thei an tih. Assam a Hill Districts hai chu language paper an exempt. Amiruokchu, eini Cachar, Karimganj le Hailakandi a Hill tribe Hmar chu an mi exempt ve nawh.



2. HSABV JHQ hmalakna

APSC Combined Competitive Exam (CCE) hi Assam a gazetted officer latu insangtak a ni a. Pasie le taima hai ta dinga sekibusuok umsun a nih. Dan an hung siemtha ta leiin, Cachar, Karimganj le Hailakandi a Hmar inchuklai le APSC exam dinga inpuocha zing hai bei a dawng hle a nih. Chuleiin, language paper thu hi ei thuoitu haiin an bawzui ta a nih. Assam Region, HSABV JHQ le Pu Vanlallien hai ei thlawp a tul. Sawrkar pressure pe theitu an nih.

3. MP Bezbaruah Committee Report

APSC CC Mains Exam a language paper thu hi mi hai chun kum riet hma daia an lo sopui an tah. IAS officer Pu TL Baruah Committee khan APSC CCE chungthuah thurawn tam tak Assam sawrkar a lo pek a. Chu zova IAS officer Pu MP Bezbaruah khawmin sawrkar ah ACS/APS exam le inzawmin recommendation a lo pek lut ve. Nguk taka a study hnungin, nikhat khan Assam sawrkar chun tul le tha a ti po a lak a, gazette notification insuoin language paper pakhat ACS/APS Mains ah an thangsa tir tah. MP Bezbaruah Committee recommendations an suksuok hlim kum 2015 khan hnam dang hai chun sawrkar ah an ngaidan an lo zu thelut a. Students union tamtakin sawrkar an lo zu bel bawk.

4. Bengali or Assamese le Cachar, Karimganj le Hailakandi tlangmi hnam dang hai

Cachar laia tlangmi non-Hmar BA MA pass tah, la pass thei ACS/APS exam ngam hai chun Assamese or Bengali an hmang thei pherphur vawng a. A ziek khawm harsa an ti bek nawh. Eini Hmar chu Barak Valley tawng liu liu Bengali hi khawhri tawng angin ei lo en hlak a. Mi tlawmte in ei tiem thei. A pawi hle. A awmtawk chu ei inchuk a tul an tah.

5. Bengali tawng

Barak Valley hi UT a hlangkai a la hung ni ngei ding a na. Bengali championna hmun la hung ning a tih. An tawng an uongpui a. An thelar zing bawk. Silchar ah Mini Secretariat chen la um a tih. Guwahati a fe lova thil popo zo theina la ning a tih. Cachar a chu tukhawm hin an tawng vawngin sawrkar lekha electoral roll, ram lekha, etc popo an ziek tah. Ei hming zawngtu ding buoi rak rakin ei la zawng kuol hlak. Harsa ei ti ta zing. Sin advertisement hlak an Bengali news ah an pek a. Ei hmu ngai nawh. Eini chu Guwahati a inthawka suok advertisement chau ei lo hmu hlak. Lakhipur SDO office a peon, hill mauzadar, clerk, chokidar, etc advertisement an thaw pha ei lo hmu ve ngai nawh. Ei vengah Bengali newspapers tiem thei ei tlawm a. A tiem thei hai lai hlak job advertisement lo va ngaiven zing an um nawh.

6. Assam Judicial Exam

Assam Judicial Service Grade I Exam a ding khawmin ei LLB pass hai an buoi ve tah. Assamese compulsory paper a um ta a. Hi paper hin 50 marks a carry out of 450 total exam marks. Assam Judicial Service exam pass thei si lo chun LLB thaw nuom ta lo khawm an um tah. Lawyer ni ritawl an pei ta nawh. Advocate popo hlaka sawrkar sin hmunan an certificate hmang thei nawk lo hai. 1994 style hmangin kum 2019 hin Assam sawrkar sin zawng thei an ta nawh.

7. Gone were the days!

Tienlai khan chu BA zo kha sin neinan an lo hmang hlak a. Tun chu MA zo khawma sin an hmu vawng ta nawh, thiembik thil pakhat bek an neisa naw chun. Duniya badal giya. Hi le inzawma inhrilhriet tak tak ei tul. Kha hma met khawn khan BA pasi le typing thei an lo tisa hlak a. Chu zova BA plus Computer diploma hrim hrim an ti nawk a. Chu zova BA plus DTP an hung ti a. Tun chu business khawvel a dingin Commerce le DTP an ti tah.

Tienlai khan ALTERNATIVE subject kha ei lo uongpui hlak a. Mizo subject lak kha thabo inchukna ang a nih, an lo ti kha a hung indik pei ta in ka hriet. Inchuk awlsam kha ei lo tum tawl hlak. Tu lem hin chu Hmar MIL hi mi tamtakin First Division passna in an hmang lai zingin thabo an inchuksa, a titu ei um. A awl ti leiin an hun saved kha thil dang inchuk tak tak nain an utilise ngai nawh, an tih. BA General thaw ang deuva degree la tum ei hawi tawl tah, an tih.

Ka nauhai khawm Kendriya Vidyalaya Central School ah kan kai tir a. Assamese le Hindi an lel hle. Class VIII chen Hindi lo inchuk ka ni leiin kan chuktir hlak a. An lel tho. Anachu, a zaiin an tha la fan el a tih ti beiseiin ka beipui fan fan ve. An khawvel ding ka zuk hmu phak sia. An khawvel la pal ding hi an khaw ta em el. Pawl an sawn thei le a hun ka ti el a. Class V hmain Assamese or Hindi or Bengali an lo hmelhriet phawt kha a hun tawk. Subject pakhat chau fail kha kan promotion tho an mi tih. Bu hni ah an fail naw dana lekha inchuktir kan ni ta ie. An inhnel rawn a tul kan ti a. School kan thak thei hi kan lawmna tak a nih.

Assam rama lem chu ACS/APS ni hnung khawma ei Assamese thiem naw ei insir hlak. Officers hai Assamese hmangna lai English lo va hmang hmang dan umlo. Bawng tret truta Assamese hmang ve a tul hlak. Mipui le in dealing huna khawma an tawnga biek thei chun buoina a zatve solve ang a nih. Assamese le Bengali officer a tam lem hin English an lel hle. Eini tlangmi chun tawng dang nekin Sap tawng ei lo ngaina a. A tangkaina a lo tam lem bawk.

8. ACS Mains Compulsory Language Paper

Bengali or Assamese or Hindi hi va thiem filawr ding ei tina an nawh. Va tiem pherphur thei le ziek pherphur thei kha a hun tawk el. Competitive exam a chu qualifying nature chau a nih. Pass mark 30% tina. A awl, ei inchuk met chun.

ACS/APS language paper hi hieng ang deu hin zuk hril ei tih

A. Translate the sentence from English into Bengali/Hindi, 20 marks

B. Translate from Bengali/Hindi to English, 20 marks

C. Usage le vocabulary, 40 marks

D. Small essay pakhat, 100 marks

E. Precis, 60 marks

F. Passage, 60 marks

~Tawng upa chu ei sira Vai hai ei zuk indawn thei.

~Small essay, precis le passage khawm ei sira hai ta ei zuk copy thei.

Anachu, Assamese or Bengali or Hindi hawrawp le A, AW, B, CH or Ka Kha Ga le writing speed kha lo in practise nasa a tul. Chu pha pha ziek pherphur a awl.

Pass mark hmu kha a hun tawk. Pass mark chu 30% a nih. Chu chu 90/300 marks chau a nih. An Assamese tawnga star mark hmu tuma van chuk a ngai nawh.

9. Hindi inchuk dan ding

Naupang chu Bengali or Assamese le Hindi inchuktir a tha. Ei khawvel tawng mek hi a pik ta em em. BA MA pasi ritawlin sin ei hmu thei ta nawh. Computer diploma neisa khawma employability ladder ah a mi nawrkai zo ta nawh. Language hi a hung pawimaw ta bek bek el an tah.

Barak Valley a chu Bengàli tawng hi naupang a inthawka inchuk chi a nih. YouTube a inthawk Assamese/Bengali/Hindi inchuk thei a nih. Google Baba, Simple Textbook, etc hai Bengali or Hindi inchuknan ei hmang thei. Part time tuition khawm lak thei a nih.

10. Thukharna

Tuta sin zawng mek BA MA pasi le kum nawk a ACS/APS exam pe tum hai ta ding chun chawplechila Assamese or Bengali zuk inchuk chu harsang a tih. Amiruokchu, ei naupang hai hin High School level a inthawk an lo uksak chu a tul an tah. Bengali or Assamese van chuk kha inhmusitna a hmang chi an ta nawh. Ei khawvel pal mek le ei la pal dinga hin a tunga lawn ei tum chun ar upai nai. Assamese or Bengali a must. Learn basic Assamese or Bengali and Hindi as well.

English a pawimaw hle. Sin hmuna a nih, a titu ei tam. Hmar MIL khawm hnam culture humna le sikul le college a mark insang hmun theina a nih. Anachu Bengali hi a la hung pawimaw pei ding a nih. Khawvel inhem dan izirin sin khawm an hung siem pei a. Chu sin a chun lut ei nuom ve chun sin latu hai mi lak ve theina dingin an hlutsak thiemna language paper qualifying nature pass thei a tul tah. Khawvel hi nasatakin a hung danglam zing a. Eini ei la pangai zing leiin khawvel danglam mek hi ei hriet ve naw a ni el thei. We have to change with time.

Sum neilo pasie le naufahra milien biek thei nei ve lo Assam a Hmar hai ta ding chun APSC hi ei inhnemnatak an tah. Tuta sawrkar hi job recruitment kawnga hin APSC sukfaitu an nih. Kha chen kha sum, thahratna, biek thei nei le insanmar haiin ACS/APS sin an lo chang hlak a. Tun chu pasie mi peirei le taima thiembik pakhat bek nei haiin sekibusuok ang elin ei hmang tah. Nina nei lo nina mi pe theitu a ni bawk.

-Ziektu

Dada le Jojo-Pa,
Hmarkhawlien, Cachar, Assam

17.8.2019
Don't Miss
© all rights reserved
made with by Simon L Infimate