Responsive Ad Slot

MOTOR ACCIDENT, TRAFFIC FINE LE INSURANCE

Saturday, August 24, 2019

/ Posted by Simon L Infimate
A. MOTOR ACCIDENT

Motor accident le inzawma hriet ding thenkhat

1. Motor in a sukhliem hai Hospital ah thaklut hmasatak ding. Doctor in Police case a nih, Police lekha hung chawi phawt ro, an lo ti thei ta nawh. A hliempa damsuok dan ding Doctor in an ngaituo hmasa phawt ding a nih. Chu zova Doctor haiin Police chu an inhriettir thei. Accident a hliem uksak nuom lo Doctor Police lekha ti suonlamtu chu case khum thei a nih. Hringna kha first priority a nih. An lo sukdam kha a pawimawtak. Police lekha chu back date khawma nakie siem thei a nih. Doctor in a hmasatakin hringna sanhim theina medical care a pek ngei ngei ding a nih. Chu zova attending doctor in Police hai inhriettir a tih.


Sung hai signature le hospital inenman fee ti tiengpang iengkhawm hieng hun a hin la hril awilo a nih. A hliem pa kha a dam tha deu pha a sung le kuo hriet an ni chun form fill up le signature thaw dingin Medico-Legal Counter ah tir ning an tih. Chu hun a chu Police khawm Hospital an lo tlung hman ta hlak.

Accident a hliem annawle thawsuol pal leia thi thei ngirhmuna ngir annawle heart attack thut, etc hrim hrim Hospital ah tlanlut pui nghal kha ei sin a nih. Hospital fee, doctor fee, etc kha ngaituo hmasa lova "Primary life saving medical care" an pek nghal thei dan ding lampui ngaituo ning a tih.

2. Motor accident witness in accident dan a hriet hriet Police hai hril thei a tih. Amiruokchu, Court ah an lang kher a tul ta nawh.

3. Motor accident pui chun Police Station lut hmasatak ding mipui chawkbuoi inlau chun. Annawle a hliem hai Hospital a thaklut vat ding. Boruok i zirin a pakhat lem lem thlang ding.

B. GOOD SAMARITAN

Ei hril ta ang khan

1. Motor accident a hliem hai hrim hrim Hospital hnaina taka tlanlut pui nghal ding.

2. Accident lai hmutu in Police a phone chun a hming le address a hril kher a tul nawh. Chu hmuna chun accident an tuok ti kha a hun tawk.

3. Hospital doctor in hliem hai damna ding life saving treatment pe nghal a tih. Police lekha, FIR ti hai a suonlam thei nawh. A suonlam a ni chun a chunga "Professional misconduct" ti thupui sirsanin IMCR 2002 dungzuiin suspend ning a tih. A hliem pa kha doctor negligence leiin a hliemna tuor zo lovin a thi lem chun death due to negligence a awr thei bawk. Amiruokchu, a thei tawp a suo hnunga a hliem pa kha a thi chun doctor intum thei ni naw nih.

4. Hliem pa Hospital a thakluttu hai chu Doctor le Police in an hmatawk tawk zawna an indawn thei nawh. An hming le address an pek naw khawma hliem pa Hospital a thakluttu chunga thubuoi iengkhawm siem thei an nawh. A thaklut chen chau kha a mawphurna a nih.

5. Hospital bill, doctor fee, etc leiin Hospital in accident a hliem pa hnawl thei naw ni hai.

C. DYING DECLARATION

Motor accident leia hliem, etc. thi vang vang dam in hmu a, Hospital in panpui malamin thil umdan indawn hlak ro. A hril kha Police hril ding. A hliem pa kha a thi chun a thi tawma a hril po kha Court ah thudik anga pawm a nih. Dying Declaration hi ei tawng chun "Thi tawm Tawng" ti mei ei tih. Police case a chu a pawimaw nasa.

Thi tawm tawng record theitu hai

1. Magistrate

2. Doctor

3. Police

4. Mi tu el khawma an record thei.

Mi pakhatin FIR a lo thaw ta a. Kar khat hnunga thatin a um chun a FIR thelut kha Dying Declaration anga pawm a ni bawk. Vai hai chun FIR hi invengnan an thelut hlak. A hming an lampa kha Police in man hai sien an ti lei a ni vawng nawh

D. TRAFFIC FINE

Motor neitu le motor khal hlak hai hriet ding:

1. Driving license bo Rs 500 fine

2. Insurance lekha bo Rs 1000 fine

3. RC bo Rs 2000 fine

4. Kum tlinglo motor khal chu Rs 500 fine.

5. Motor neitu phalna lekha bova motor lo khal Rs 1000 fine

6. Seat belt bo Rs 100 fine

7. Helmet bo Rs 100 fine

8. Inrui puma motor khal Rs 2000 fine

9. Overload phur Rs 1000 fine passenger pakhat peiah

10. Fitness certificate bo Rs 5000 fine

11. Overspeed chu Rs 400 fine

12. One way bawsietu Rs 2000 fine

13. No parking Rs 2000 fine

14. Motor mumal lo taka lamliena khaltu chu Police in case an siem khum thei.

15. Speed limit neka tama motor khal Rs 1000 fine

16. No entry bawsietu Rs 500 fine

17. Pollution lekha neilo Rs 1000 fine

18. Number plate bo Rs 100 fine

19. Registration number plate chieng raklo Rs 100 fine

20. Lampui obstruct zawnga motor parking Rs 100 fine. Thana tawllut thei. Recovery van hmang man khawm motor neitun tum a tih. Rs 50 per hour fine pe bawk a tih. Lekha bo a ni chun fine sang a tih.

21. Town sunga no entry time hun a motor khallut chun Rs 2000 fine

22. Bull guard le crash guard hmangtu Rs 1000 fine. A zawrtun Rs 5000 fine a tih.

23. A/F ti char char Rs 4500 fine

24. Police signal ngaipawimawlo chu zankhat lockup

25. Motor khal puma mobile hmang Rs 1000 fine.

26. Side mirror bo Rs 100 fine.

27. Silencer bova motorcycle khal chu Rs 500 fine.

E. INVESTIGATION

Sipaiin motor accident case an sui dan a hnuoiah hin hei tarlang ei tih.

1. A hmuna hung an ta.

2. A hmuna evidence lakhawm an ta, sui an tih.

3. A hmutu titipui an ta. Indawnna nei an tih.

4. A hrietu titipui an ta. Indawnna nei an tih. Man khawm an nei el thei. Mana um hai statements la bawk an tih.

5. An mi hril dan ti kha danin a pawm ngai nawh. Ka hmu dan le ka hriet dan ti kha a pawm.

6. Chu zova sipaiin thudik suidawk tum an tih.

7. An suizo thawkkhat pha FR annawle chargesheet Court-ah file an tih.

8. Police report thelut a ni pha Ukil haiin an mi le sa hai indikna court ah inzawt veng an tih.

9. A tawpah dan hmangin Court-in intanghai indikna or indiknawna puong a tih.

10. Chu hma chun intanghai bailin lakdawk thei an nih. Amiruokchu Police hai bawkin bail pelo dingin Court-ah lekha an la thelut thei.

F. MVI LE POLICE

Motor chu accidentna hmun a inthawkin Police in la phawt an tih. Amiruokchu,

1. Motor kha a sie naw chun MVI report chu 24 hours in hmu thei. A neitu pek nghal ning a tih.

2. Motor kha a sie met ringawt chun fine theina lekha check ning a ta. Fine ning a tih. A tul chun FIR khawm file thei. Court permission laka motor lakdawk thei. Hliem na raklo chu motor neitu le hliem hai karah inremna siem pui thei a nih.

3. Motor kha a siehrep a, mi a tawk/rawt hlum bawk chun MVI report siem ning a ta. A khaltu le motor neitu chu Sec 304A IPC case inawrtir ning an tih. Kum hni jail intang theina a nih.

G. MOTOR INSURANCE

Motor accident a hliemna leia insurance claim huna lekha pawimaw hai

1. Medical report (A hliem na hle ti ding)

2. Damdawi inchawkna cash memos

3. Hliem pa kum hriet theina birth certificate

4. Hliem pa income certificate

5. Motor lekha

6. Driver a driving license

7. Motor insurance lekha (Hliemna kha driver pa thawsuol lei tiin MVI report nei a tul)

8. FIR copy

9. Police report/Accident report

A hliem pa kha a hliemna tuorzo lovin a thi chun a hnuoia lekha pathum khu zepsa ding

1. Postmortem report

2. Inquest report

3. Heirship certificate.

H. THUKHARNA

Motor accident le traffic fine naw dan thenkhat

1. Zing tin motor khal hmain motor brake check ding

2. Motor khal ta chun tukhawm hnawt lo ding. Mani speed a normal deuva khal hlak ding. Control thei speed kha normal speed a nih.

3. Motor lekha chawi tul hai soft copy-in chawilawn ran ding. Motor document hard copy a chawi chi chu hard copy a chawi hlak ding.

4. Polite deuva Police biek hlak ding.

5. Helmet khum ding lo theinghil pal khawma, theinghil thu hril ding with due courtesy. Police inselpui ngai lo ding. I am sorry, ti khan sipai lungril hne thei a nih.

-Lakhawmtu

James A. Songate, APS
DSP (Law and Order), Sivasagar, Assam

23.8.2019
Don't Miss
© all rights reserved
made with by Simon L Infimate