Responsive Ad Slot

EI RIM A SIE ZO TAM A NIH

Saturday, July 20, 2019

/ Posted by Simon L Infimate
~ Jami Darngawn


July 19, 2019  khan ṭulna leiin ka piengna ram Churachandpur tieng chun kan fe a, lampui a chun thil ramtin ka ngaituo laia ka lungril hluosiptu le kan vawi em em chu leilethai a ṭawl bawr bawr kha a nih. Kum ṭhat kum chun July a hin bu ei phun zo vawng ta hlak a nih a, turuok hin chu van ruotui a tlak tlawm leiin leilet a hai chun bu phun thei lovin a um a nih.


Awleh, Imphal phairuom le Churachandpur phairuom hang ti el inla (Ka hmu phak chin a ni leiin) van ruotui a sûr ding anga a sur naw hi ngaituo tham a va tling de ! Van ruotui a hung sûr tam theina dingin ei lo ṭawngṭai hlak ka ring a, kei ngei khawm ka lo ṭawngṭai hlak a nih. Sienkhawm ei ṭawngṭaina Pathienin Ami dawn naw ti thei dingin a um a nih.

Jakob 5 :
17. Elija chu ei ni nungchang ang put mihriem bawk a na, ama chun ruo sûr nawna dingin ṭhahnemngaitakin a ṭawngṭai a; chun kum thum le thla ruk sûng po chu, hnuoi chungah ruo a sûr ta naw a.

18. Chun a ṭawngṭai nawk a, vânin ruo ân sûrtir a, hnuoiin a ra a hung insuoktir ta a.

Elija'n ruo sur nawna dinga a lo ṭawngṭai anga lo ṭawngṭai ei lo um tam a ni ding maw !!!

Churachandpur kan fena hmun kan tlung tah a, nisa sat vanglai tak chun mi pakhatin ngaina takin a mi biek mawl mawla kei khawm chun ka ngaina hle a nih. Sienkhawm kan biekpui chu a baurim a siet em leiin a mi biekna chauh ka dawna ka biek tam ngam ta naw a nih. Asan chu kei hi thil rimsie le rim hrat em em ka hriet/dawng hin ka hriselnan a zo ngainaw lei a nih.

Imphal kan in ka tlung hnung chun inthiemlo tak chun kan biekpui lungril ding chu ka dawnkir taha "Indu a mi ti el dim chu aw" tia ka ngaituo laiin hi thu hi kei ah chieng em em in a hung um a nih.

Kha kan biekpui baurim sie tak kha thil a fak lei a nih a, chu a thil fak leia ka biek sawt theinaw ang bawkin "Kei ngei khawm hi Lalpa kuoma ka ṭawngṭainahai Ami dawn nawha a to ṭawk ṭawk a ni chun Lalpa laka ka rim a lo sie hle ning a tih" ti chu a nih. Mihriem chun bau rimsie le taksa rimsie hi ei ngai thei nawh a, ei Pathien ruok chun lungril/sungril ṭha naw a ngai theinaw a nih.

Ani ngei nang le kei khawm a bikin van ruotui ei dawng ding anga ei dawng theinaw hi eiin enchieng a va ṭul de !

Ei ram mipui hin indiknawna ei lo nei el am an ta ding ?
Lalpa Pathien ta dingin ei rim a lo sie zo tam a ni ding ?
Ti chu ka hung khekpui a nih.

LALPA TA DINGIN RIM INHNIK NITUM SENG EI TIU KHAI
Don't Miss
© all rights reserved
made with by Simon L Infimate