Responsive Ad Slot

HSA Special Assembly 2019 tan

Friday, May 31, 2019

/ Posted by Simon L Infimate
Muolvaiphei, May 31, 2019, Virthli (ONP): Hmar Students' Association (HSA) Special Assembly 2019 ni 2 aw ding chu May 31, 2019 dar 3:00 PM khan Conference Hall, Victor Rest Farm, Muolvaiphei-ah an nei tan. Hi huna hin state dang dang anthawka HSA GHQ, Assembly Affairs le Joint Headquarters thuoitu hai an thang.

Pu Lalthlamuana Hmar, Speaker, Assembly Affairs in Special Assembly 2019 hawngna a nei zoin Pu L. Rothanglien Khawbung, President HSA GHQ in Presidential Address hrilna a nei. Hi huna hin President, HSA GHQ chun tukum 2019 a HSA members Cl-X le Cl- XII exam a hlawtlingna changhai po po HSA GHQ chun a lawmpui thu le ditsakna insangtak an hlan thu a hril a, hlawtlingna chang zo lo hai khawm lunghnuol el lova nasa nawk zuol a thang la dingin chona thu le ditsakna thu an hlan nghal bawk. Hi huna hin Pu Lalringum Riengsete, Assembly Secretary, GHQ le Pu Rothangkhum Sungte, Deputy Secretary hai chu Recording Secretary niin Special Assembly 2019 nei a ni hunah Palai fekhawm han ro chi tum tum an rel.

HSA chun inchuknaa thaw tha, thiem thei si, khawsakna tienga harsa hai chu an Joint Headquarters le Branch umna hai fethlenga thangpuina "One Time Scholarship" HSA GHQ in pe dingin an rel. Manipur State Coordination committee chu Coordinator inbanna le JHQ term hai khawm alo tawp deu phuor ta leiin GHQ Term tawp ruola tawp dingin HSA CEC chun State Coordination committee le Coordinator hai hi anhma tienga siemtharna nei dinga rel a ni bawk.

Kum tawp tienga Saiphai, Sinlung Hills, Mizorama a 57th General Assembly innghat ding le inzawma thil tulhai le local arrangement a hmun ngeia fea sukfel dingin HSA Central Executive Committee chu mawphurna pek a nih. Hieng hai bak a hin hnam issue pawimaw tak tak le HSA pawl le inzawmin ro iemanizat an rel bawk a nih. Agenda a tam leiin rorel hi zan dar 7:30PM chen an neia, ruoi tuihnang tak el an kiltlang a nih. HSA GHQ chun palai hai fak le dawn lo buotsai pektu HSA Rengkai Unit chunga an lawmthu an hril bawk a nih.

Zing a hin HSA Constitution Amendment Committee in Constitution siemthat țula a ngai hai Assembly a an thelut hai chu entlangna le hriltlangna neiin siemțhat țulhai siem an tih.
Don't Miss
© all rights reserved
made with by Simon L Infimate